Filipenses 1 - Kaxinawá Bíblia (BR)

Paulõ hatukiri xinãnikiaki, na hãtxarã

¹ Ẽ Paulo inũ Timóteõ, Jesus Cristõ tsumapã, mã habũ Jesus Cristo ikũwaĩbu Filipos anuabu inũ, habũ matu mekemisbu inũ, matu merabewamisbu mã dasibi Jesus Cristoki dasiabu nũ matu kene bumai uĩrakãwẽ.

² Nukũ Epa Deus inũ nukũ Shanẽ Ibu Jesus Cristõ hau matu unãnuma hiwemakĩ pewakĩ matu duawapakekubainũbũwẽ.

Paulo ikũwaĩbuwẽ nuikĩ Deus hatu yukashũkubainikiaki, na hãtxarã

³ Hawẽtxaĩs matukiri xinãkĩ matuwẽ taeshũ ẽ Epa Deus ẽ kẽwãkubaĩmiski.

⁴ Hanushũ habe hãtxai benimakĩ matu dasibikiri ẽ matu yukashũkubaĩmiski.

⁵ Deusũ kakape hawẽ bakekiri matu anu hiki taeshũ ẽ matu yusĩa nĩkakĩ ikũwãtã ebetã txibãkĩ ea merabewanishũ hawa heneama natiã mã apakeaii.

⁶ Eã ẽ matukiri xinãnã, haska Deusũ hawẽ daya matu anushũ taewanishũ haska abuai keska mã ikũwaĩ Jesusũ matu hiwemakubaĩkĩ niti akama matu pepa wakubaĩshanikiki, hanu Jesus Cristo txĩtũkiranaitianã.

⁷ Txanima eã ẽ matukiri pe xinaĩnã, matuwẽ nuikĩ ẽ matu abuhairaii. Maturi dasibi mã ewẽ nuiaya Deusũ matuwẽ ea duawaikiki. Natiã ea bitximabu keska nia shanẽ ibubu bebũ hawa hatũ yunutikiri ẽ hãtxaisma eska besti yui ẽ txakabuisma pekiri hãtxai Deusũ kakape Jesus Cristokiri hatu unãmakĩ hakiri shabakabi ẽ txanikũkainaya mã ea merabewai ebetã teneai keskakubaĩkanaii.

⁸ Haska inũ, matube dasibi haibunaĩ nũ pekubainiburã, Deusũ nuku unaĩkiki, Jesus Cristõ nui duapa ea inã ẽ matu ashuniwẽ taea matukiri ẽ hakimaismaki.

⁹ Deus yukakĩ matu ea ashũkinã, hau hawẽ nui itxapawẽ matu ewawakĩ hau apakenũwẽ, heneamarã. Haska wakĩ Deusũ matu unãnepa wakĩ nĩkanika hau matu wakubainũ, iwanã, ẽ matu yukashũmiski,

¹⁰ haska pepa besti abuai mã katukubainũbunã. Haskai hiwekĩ matũ hiwea shũpĩ hawa txakabuma ewakaini hawa txakabuki huti ika keskama nukũ Shanẽ Ibu Cristo huriamakẽ mã pepa hiwekubaĩtirubuki.

¹¹ Ha dikabi matu mã hatu bebushunaibunã, Jesus Cristowẽ taeshũ hawara pepa mã akai tsuabũra uĩkĩ Epa Deus duawakĩ kẽwãshãkanikiki.

Paulõ Jesus Cristõ kakape yusĩkubainikiaki, na hãtxarã

¹² Ẽ betsabu inũ ẽ puibuũ, ẽ bika betsa betsapa teneai anu bebirã bebiranaibu txanima kayabi haska yura betsa betsapabũ Deusũ kakape Jesus Cristokiri nĩkabirãbirãmisbukiri matu yuinũ nĩkakãwẽ.

¹³ Haska Roma shanẽ ibũ hatu binũatũ hiwe ewapa hawẽrua anuabu soldadobũ ea mekemisbu inũ yura betsa betsapabũ ea uĩkĩ hanu ea pewayamabu anushũ Cristokiri kakape ẽ hawẽ hãtxa txaniai dasibibũ ea nĩkamisbuki, ha meketi hiwe anu ẽ hiwe anushunã.

¹⁴ Na ea nenu eska wayamabu ewẽ dateama itxapabũ Cristo ikũwãkĩ hawẽ kakapewẽ benimakĩ dateama huĩti kuxitã nukũ Shanẽ Ibuki txiti itã Deusũ kakape hatu yusĩkubaũkanikiki.

¹⁵ Huni betsa betsapabu hatũ huĩti pepa hayabu Cristokiri yura betsabu ikũwãmanũ, iwanã, pe yusĩkanikiki. Hakia hatiritũ ea binunũ ika eki sinatai keĩ pashkatã yusĩnanãriakanikiki.

¹⁶ Txanima nenushũ Deusũ bakekiri ẽ pe yuikubainũ Deusũ ea nenu yunuyamakẽ habu ewẽ nuikĩ ha Cristokiri daya ẽ henebiranima habũ ea merabewakĩ kakape datã akĩ heneama yusĩbaũkanikiki.

¹⁷ Hakia hatiritũ akinã, anikabia kẽkĩ mestẽwãtã akama pepabiakĩ ea binunũ ishũ habũ haska wakĩ ea ana bika tenemakubaĩkanikiki.

¹⁸ Haskaibuwẽ taearã, earã, ẽ hatuwẽ nui ẽ hatuki sinatamaki, xinã pepawẽ txaniaibu kasmai xinã pe mirĩwẽ Cristokiri kakape txaniaiburã. Haskabaũkĩ ea benimawakanikiki. Ẽ benima keyuriamarã,

¹⁹ mã ea Deus dayashuniwẽ taea tsuki ẽ dakeamaki, hatũ ea mekeawẽ taearã. Haskakẽ tsuabũra berubi hawa hakiri dakeama natiã ẽ hiweawẽ inũ ẽ mawashũshanaiwẽ Cristo kuxipahaira ewẽ dasibibu ẽ hatu uĩmayukatsis ikaii. Haskawẽ taeshũ Jesus Cristõ Yushĩnĩ ea merabewakĩ ea kaĩmashanai xinaĩ ẽ benimakũkainaii.

²⁰ Haska inũ, Deus dayashuni tsuki ẽ dakeamaki, hatũ ea mekeawẽ taearã. Haskakẽ tsuabũra berubi hawa hakiri dakeama natiã ẽ hiweawẽ inũ ẽ mawashũshanaiwẽ Cristo kuxipahaira ewẽ dasibibu ẽ hatu uĩmayukatsis ikaii.

²¹ Natiã ẽ hiweyuarã, Cristo ẽ hiweshũyukũkainaii. Hakia hawẽ taea ẽ mawarã, ẽ nenu hiwemis binuaki.

²² Na ẽ yurawẽ ẽ hiweyukũkaĩkinã, hawẽ dayakĩ yurabu itxapa ẽ hatu ikũwãmatiruki. Haskakẽ ha dabe ẽ katutirumahairaki.

²³ Eã ibubis haska dabe ẽ katuarã, bikahairaki. Ẽ xinãnã, mawatã ẽ Cristobe ma hiwei kai pehairaki, enarã.

²⁴ Hamẽ betsarã, matu merabewayunũ ika ẽ hiweyuarã, peyuaki.

²⁵ Ẽ haska matukiri xinaĩwẽ taea haska mã Jesus Cristo txibaĩkiri matu merabewakĩ matu benimawakatsi iki ẽ matube ana hiweyui katiru ẽ xinaiĩ.

²⁶ Matu anu ana haska kaĩxĩshũ ẽ matu yusĩayã ewẽ taea benimai mã tse ishanaii, Jesus Cristo kẽhairawairã.

Jesus Cristo ikũwaĩ bika tenetikiri Paulõ hatu yusĩnikiaki, na hãtxarã

²⁷ Natiã mã hiweairã, Deusũ hawẽ bakekiri kakape unaĩ haska hiwekũkaĩtikiri benai na keska bestiwẽ hiwekubaĩkãwẽ. Haska ẽ matu uĩkatsis ikai inũ matu anu ẽ kamakẽ matukiria matũ kaka huai ẽ matukiri nĩkakatsis ikaii, haska mã txĩtuãma inũ mã ma dasi keyushũ bika tenebiai heneama matũ xinã kuxipawẽ ikũwaĩ mã Jesus Cristo txibaĩbunã.

²⁸ Habu matuki sinataibuki e iki dateyamakubaĩkãwẽ. Habu matuki haskabiaibũ mã pe hiwekĩ hatu uĩmakubaĩmiswẽ taeshũ Deusũ hanu shabakabi hatu kupikĩ habiatiãri matu besti mekeshanikiki. Deusũ haska wakĩ shabakabi hatu unãti wamashanikiki.

²⁹ Deusũ hawẽ pepawẽ matu kenakĩ katushũ ikũwãmanirã, ha besti ikũwaĩ pepa bestitimaki. Habiaskariai Cristowẽ bika mei nuitapariatiki.

³⁰ Haskakẽ ea inũ maturã, nũ bika tenekanaii. Haska uatiã ẽ ikai mã uĩnirã, na habiatiãri Cristo dayashũkĩ hamapai bika betsa betsapa ẽ tenekubainai mã ekiri nĩkakubainaii.