Filemom 1 - Kaxinawá Bíblia (BR)

Paulõ Filemomkiri xinãnikiaki, na hãtxarã

¹ Ẽ Paulo Jesus Cristokiri kakape ẽ yusĩbaunai ea nemakĩ beshtenũ ishũ ea bitxikĩ akawanibu inũ nukũ betsa Timóteobetã mĩ nukube dayamis nukũ haibu pepa Filemoom, ẽ mia keneshũ bumaii,

² ha inũ, habu mibetã Jesus Cristo ikũwaĩbu mĩ hiwe anu itxamisbu anurã, nukũ pui Áfia inũ nukũ betsa Arquipo, nukubetã Jesus Cristokiri kakape yusĩkĩ bika tenemisbu anurã.

³ Mã unãnuma hiwekubaĩshanũbũ haskatã ibubis mã hawa watirumabiakẽ Epa Deus inũ nukũ Shanẽ Ibu Jesus Cristo matuwẽ nuikĩ matu merabewakĩ hau matu duawakubainũbũwẽ.

Paulõ Filemom kẽwãkĩ Deus yukashũkubainikiaki, na hãtxarã

^4-5 Nukũ Shanẽ Ibu Jesus Cristo abukĩ ikũwãkĩ mĩ txibãkubainai inũ dasibi hawenabu meribiwẽ nuikĩ mĩ hatu duawamiskiri kakape nĩkatã benimakĩ hanu ẽ Deusbe hãtxaitiã mikiri xinãkĩ ẽ Deus ẽ mia kẽwãshũkubaĩmiski.

⁶ Mia haska washũkinã, nũ haska Jesus Cristo ikũwãkĩ txibaĩ keska miãri haska xinãkĩ hawẽ pepawẽ Deusũ nuku dasibi duawamis mĩ nĩka pewanũ ẽ mia Deus yukashũkubaĩmiski.

⁷ Jesus Cristowẽ ẽ betsaã, mĩ nuikipawẽ taea miwẽ taea benimai ẽ xinã txãkaiĩ, ikũwaĩbu Deusunabu meribi huĩti xinã txãkãwãkĩ mĩ hatu nuikipa wakubaĩmiswẽ taearã.

Paulõ Filemom hawẽ escravo dayaru Onésimo ea ashunikiaki, na hãtxarã

⁸ Haskawẽ taeshũ ea ẽ Cristõ kuxipayabiatũ ẽ mia yunua ẽ yunua txibãkĩ mĩ atirubia

⁹ haskakiri ẽ mia xinãma hakia nui nũ haibunameaiwẽ taeshũ ẽ mia ea akaii. Earã, ẽ ma mestebuaii. Haskabiakẽ Jesus Cristo ẽ dayashũkũkainaiwẽ taeshũ natiã ea bitxikĩ akawashũ ea meneshimabuki.

¹⁰ Haskawẽ taeshũ mia daewakĩ mia anu Onésimo ẽ nitxiaiĩ, hau mia dayashũri kanunã. Nenu ea meneshimabu anu hiweshũ Onésimo Jesus Cristo ikũwãmakĩ ẽ xinã betsa wamaimawẽ taea mĩ dayaru escravo ẽ bake keskaki.

¹¹ Uatiã mĩ escravo daya txakabui mia anua pashabiaima ikis nukubetã Jesus Cristo ikũwaĩwẽ taea ana haskamaki. Nuku dabe merabewatiruki, nuku duawakinã.

¹² Onésimo ẽ abuhairai mia anu ẽ ana nitxiã kaikiki. Haki dakeama mĩ ea atiru xinãkĩ haska keska washãwẽ.

¹³ Jesus Cristõ kakapekiri datã akĩ ẽ yusĩkubaũpanã bitxikĩ ea nemaimabu mĩ ea haska washũ merabewatirumakẽ miwẽ Onésimõ ea merabehairawakubaini yauxikĩ ẽ nitxĩkatsi ikamabia

¹⁴ mĩ ekiri xinãkĩ yunuama ibianikẽ ẽ mia haskãwãtirumaki. Mĩ xinãnẽ mĩ ea yunu bestiai haska ea abukĩ mĩ ea amashũtiruki.

¹⁵ Txanima uatiã haskatãra Onésimõ mia heneyubiranima natiã ana txĩtũkaina uatiã mĩ habe imis keskama ma mibetã ikũwaĩwẽ taea mĩ betsa kayabi keska ipakeshanikiki,

¹⁶ ana mĩ dayaru keskama mĩ dayaru pepa binua mĩ abuai mĩ betsa kayabi keskarã. Eã ẽ abutxakayamabiaya miã abukĩ mĩ ea binumashanimẽkaĩ. Dayaru escravo besti hayama hakia dayaru binũa keskai mibetã Jesus ikũwaĩwẽ taea mĩ betsa keska mĩ hayashanaii.

¹⁷ Haskawẽ taeshũ ebetã Jesus ikũwãkĩ mĩ ea haibuwaniki. Haska ekiri xinãkĩ mĩ ea duawai keska wakĩ ewẽ taeshũ Onésimo ana irishãwẽ.

¹⁸ Mia haska wakĩ itxakawabiranimamẽkaĩ. Mia devematã pashaimamẽkaĩ. Haskarara ikiranimarã, ẽ petxiki netãwẽ,

¹⁹ ẽ mia pakashanairã. Ẽ mia Jesus unãmaniwẽ taeshũ miãri mĩ ea devehairaki. Haskakiri ea xinãwẽ. Na mia keneshũkinã, ẽ mekẽ kayabiwẽ ẽ Paulõ ẽ mia ashuaiĩ.

²⁰ Ẽ betsaã, eskaki, xinãwẽ. Mĩ ebetã Cristo ikũwaĩnã, nukũ Shanẽ Ibu benimawanũ ika ana haki sinatama ewẽ nuikĩ Onésimo ea haska washũshãwẽ, ea huĩti xinã txãkãwãkinã, haska nũ Cristõ betsawẽ taearã.

²¹ Ẽ hãtxa mĩ nĩkakĩ txibãmis unãkĩ ẽ mia keneshũ bumaii, haska ẽ mia ea akai binukĩ mĩ pepawashanai xinãkinã.

²² Ha inũ, Deusbe hãtxakĩ mã ea yukashunaiwẽ taeshũ Deusũ hawawama hau hatu ea nitxĩmashanũ ikũwãkĩ ẽ manaii, dateamarã. Haska inũ, matu uĩ ka hanu ẽ iki kashanai anu ẽ ushati ea pewashũshãwẽ.

²³ Jesus Cristo ikũwaĩ atxishũ ebe Epafras meneshabu hawẽ hãtxari mia bumaikiki.

²⁴ Marcos inũ, Aristarco inũ, Demas inũ, Lucasĩ ea merabewai dayamisbũ habiaskari xinãkĩ hatũ hãtxa mia bumariakanikiki.

²⁵ Nukũ Shanẽ Ibu Jesus Cristõ hawẽ pepawẽ hau matu duawakubainũwẽ. Hatiski, ẽ hãtxarã. Paulo