Ezequiel 3 - Kaxinawá Bíblia (BR)

¹ hanushũ ea yuikĩ: “Mianã, na una keneya piwe. Haska watã Israelĩ enabu hatu hãtxa wakĩ uĩ kariwe”, ea wakĩ

² ea hashpa watã ha una keneya hatũ ea pimakĩ

³ ea yuikĩ: “Na una keneya ẽ mia inainã, pikĩ sheawe, ikisrã. Yaniwakĩ mĩ hatu mata wawe”, ea wa eã pikinã, hawẽ nis buna bata keska ẽ meimaki.

⁴ Hanushũ ea ana yuikĩ: “Kashũ haska Israelĩ enabu ẽ hatu haska yuikatsis ikai ea hatu yuishũkubaĩwẽ.

⁵ Yura betsabu hatũ hãtxa hunea bika mĩ tapĩtiruma anu ẽ mia yunuamaki. Hakia Israelĩ enabu anu ẽ mia yunuaii, hatũ hãtxawẽ mĩ hãtxai anurã.

⁶ Yurabu betsa betsapa mirimabu anu hatũ hãtxa itimaska inũ bika mĩ tapĩtiruma anu ẽ mia haskanu yunuamaki. Habiaskabiakẽ habu anu ẽ mia hatu yunua habũ mia nĩkatirubu ikeanaii.

⁷ Hamẽ mia hanu yunuama ha dasibi Israelĩ enabu huĩti kushibu inũ besu kushibu habũ ea nĩkaisbumawẽ taeshũ miari nĩkama ishãkanikiki.

⁸ Hakia habu keska ẽ mia wariaii, mĩ besu inũ mĩ huĩti mia kushi wakinã.

⁹ Ha nẽkati diamante keska wakĩ ẽ mia kushipa washanaii, mishki betsa kushipa binua keska wakinã. Ea danã paepa wamisbuwẽ taeshũ hawara mia bebũshũ yuiaibu hatuwẽ taea teku iki dateyamakũkaĩshãwẽ”, iwanã,

¹⁰ ana ea yuikĩ: “Dasibi ẽ mia yuai pes nishũ nĩka pehaira wakĩ mĩ bushka merã netãwẽ, hakimatimairã.

¹¹ Minabu Babilônia anu iwenibu hatu uĩ kariwe. Mia nĩkatirubumẽkaĩ, mia nĩkabumabiakẽ: ‘Senhor Deusũ eska matu yuikiki. Nĩkakãwẽ’, iwanã, ea hatu yuishũshãwẽ”, ea wa

¹² hanushũ Deusũ Yushĩ kushipatũ ea benitã ea dũtãbainaya ea katxũ Senhor Deusũ shãtu anua hawẽ kushipa txasha txasha iki benikainaya mai patxa sakui keskai unãshubima dãka ikaĩkaini keska ẽ nĩkaya

¹³ ha hui dãka ikirã, ha 4 hunibũ pei nuyabaini shũ shũ ibainai anu hawẽ tarãbaĩti tae hatũ yuraki tsamiãwẽ buirã, unãshubima tĩ ikaĩkaini mai patxa sakuhairai keskaki.

¹⁴ Deusũ Yushinẽ ha ẽ nia anua ea nuyãbaĩkĩ ea iyukĩ Senhor Deusũ hawẽ mekẽnẽ ea tsuma txakayamashũ ea iyua punu nuka sinatayabi dunukaini kai

¹⁵ Hene Quebar kesha anu ea butea Israelĩ enabu Babilônia anu hatu iwenibu mae betsa Tel-Abibe anu hiweabu anu hikitã hanu 7 shaba ea hatube hiweyushũ ẽ hawa unãmawẽ taea ẽ hawa watiruma inũ ẽ hawa hatu yuitiruma ikaya

Israelĩ enabũ txakabuwaibu hau hatu nemanũ Senhor Deusũ Ezequiel uinika katunikiaki, na hãtxarã

¹⁶ ha 7 shaba keyuaya Senhor Deusũ ana ea yunukĩ yuikĩ:

¹⁷ “Miarã, Israelĩ enabũ hatũ txaninika ẽ mia waii. Hanushũ haska ẽ hãtxa bebũkiri ẽ mia yuia hatu unãmakĩ ea hatu banabimashũkubaĩshãwẽ.

¹⁸ Eskakiri ẽ shinaĩ ea nĩkawe. Tsuara ha txakabuaikiri ẽ kupitiwẽ hau mawanũbũ ẽ hakiri mia yuia hawẽ txakabu henetã hau hiwekũkaĩshanũ nemakĩ mĩ hawa hatu hãtxa wama, hawẽ txakabuwẽ taea mawashanikiki, ẽ kupiarã. Hakia miã kanekĩ tsuara hawẽ txakabukiri nemakĩ mĩ merabewama ma mawakẽ hawẽ taeshũ ẽ mia kupishanaii.

¹⁹ Hakia tsuara hawẽ txakabukiri yuikĩ mĩ nemaya hawẽ txakabukiri shinã betsa wama hawẽ txakabu heneamawẽ taea mawashanikiki, ẽ kupiarã. Hakia mianã, mĩ hatu nemakĩ shinã betsa wamashinawẽ taea mĩ hiwea mĩ mekeshanaii.

²⁰ Haska inũ, betsa ẽ shinainã, tsuãra ea nĩkai pepabiakũkaini hatũ pepa henetã ana txakabuwakubainaibũ mesekiri ẽ hatu yunua bui huti ikaĩ di ikabu keska nemakĩ mĩ hawa hatu hãtxa wama hatũ txakabu heneabumawẽ taea mawashãkanikiki, ẽ hatu kupiarã. Hatũ pepa akubainimabukiri ẽ ana shinãma hatũ txakabuwẽ taea mawaibũ hakia miã kanekĩ mĩ hatu nemama ishiãwẽ taeshũ ẽ mia kupishanaii.

²¹ Hakia hau txakabuwayamanũ nemakĩ bebũkiri mĩ shabakabi yuia mia nĩkatã ana hawa txakabuwamawẽ taea hiweyushanikiki, ẽ ana kupiamarã. Bebũkiri mĩ hatu yuishinawẽ taea hamẽ miarã, ibubis mekei mĩ hiweyukũkaĩshanaii”, itã,

Senhor Deusũ Ezequiel huyu wanikiaki, na hãtxarã

²² ea haska hãtxa wakĩ hawẽ kushipawẽ ea mekĩ Senhor Deusũ ana ea yuikĩ: “Nenua benikaini kairã, napãpakiri kawe, haria ẽ mibe hãtxairã”, ea wa

²³ benikaini napãpakiri kashũ Hene Quebar kesha nishũ haska ẽ uĩma keska harishũri Senhor Deusũ kushipa txasha txasha ikai ana uĩ dãti iki maĩ ẽ beti ikẽ

²⁴ hanushũ Deusũ Yushĩ kushipa ea merã hikitã ea benia ẽ nikẽ Senhor Deusũ eska ea yuikĩ: “Kai mĩ hiwetã hikitã mĩ hiwe beputi beshetãwẽ.

²⁵ Uiã. Mĩ hiwe anua mĩ kaĩkaĩyamanũ dispiwẽ habũ mia binesh shanikiki, kaĩkaina mĩ ana yurabube niyamanunã.

²⁶ Ha dikabi eanã, mĩ ana hãtxatiruma wakĩ mĩ hãshakaki mĩ hana ẽ mia tsãpa waii, mĩ huyununã. Habũ ẽ hãtxa danãbiamisbũ hatu ha akĩ mĩ hatu pewatiruma ishanaii.

²⁷ Hakia hawara ẽ mia yuimakatsi ikaitiã ẽ mia ana hãtxa pesamakubaĩshanaii. Hanushũ hatu yuikĩ: ‘Eska Senhor Deusũ matu yuikiki’, iwanã, mĩ hatu ea yuishũkubaĩshanaii. Minabu hawa nĩkaisbumawẽ taeshũ tsuabũra nĩkakatsi ikĩ nĩkakubaĩshãkanikiki. Hakia tsuabũra nĩkakatsi ikabuma hau nĩkayamakubaĩshanũbũwẽ”, akĩ ea haska waniki.