Ezequiel 2 - Kaxinawá Bíblia (BR)

Deusũ Ezequiel katutã yununikiaki, na hãtxarã

¹ hanushũ hawẽ hui tashniai ẽ nĩkaya ea yuikĩ: “Miarã, mĩ huniki. Beniwe, ẽ mibe hãtxairã”, ea waya

² ha hui kaĩkĩ ea hãtxa waya habiatiãri hawaira Deusũ Yushĩ kushipa ea merã hikitã ea benia ẽ nikẽ habias huiwẽ ea hãtxa washu ana ẽ nĩkaya

³ ea yuikubaĩkĩ: “Mĩ miaki, hunirã. Ẽ mia yunuai Israelĩ enabu ea hatu yuishũtãwẽ, habũ ẽ hãtxa nĩkakĩ txibaĩsbuma patapabũ ea danaĩ eki sinatamisbu anurã. Hatũ shenipabũ ea danãkĩ taewanikẽ na habiatiãri habũ bababũri ea danãriakubaĩkanikiki.

⁴ Hamẽ hatũ bakeburã, huĩti kushi inũ bushka kushi shinã betsa wakatsi isbuma anu ẽ mia yunuaii. Kashũ hatu yuikĩ: ‘Senhor Deusũ eska matu yuikiki’,

⁵ mĩ hatu wa mia nĩkakanimẽkaĩ, mia nĩkabumamẽkaĩ, ha huniburã, nĩkaisma sinatapabuki. Habu haska hiwebiakẽ mia mĩ Deusũ hãtxa yuishunika mĩ hatube hiwea habũ unãshãkanikiki.

⁶ Mia mĩ hunirã, habuki dateyamashãwẽ. Ẽ hãtxa mĩ hatu yuibia haburã, eskabũ mia atxia mĩ hiweshanaii. Mushã mia yabubauna keska inũ nibube mĩ hiwea keskashanaiwẽ taea hatuki mesei dateyamashãwẽ. Haburã, nĩkatirubuma sinatahairabuki. Haskawẽ taea habũ hawara yuikĩ mia datetirubuwẽ e iki dateyamashãwẽ.

⁷ Ẽ hãtxa danãhairai eki sinatamisbũ mĩ hãtxa mia nĩkakanimẽkaĩ, mia nĩkabumabiakẽ habiaskabiakẽ ẽ hãtxa hatu yuikubaĩshãwẽ.

⁸ Hawara ẽ mia yuiai nĩka pehaira wawe, hatu keska sinatapakĩ ẽ hãtxa danãma hawara ẽ mia inaĩ hashpatã mukukĩ piwe”, ea waya

⁹ hanushũ mekẽ tashnimabirãkĩ una kene sebi tsuma haya ekiri sanãbiranai ẽ uiãyã

¹⁰ ea bebũshũ ha una sebi txureai uke bukũ keneya kashai bis ikai kene haya inũ, isĩ mei bika teneai kene haya inũ, pubẽ hãtxa kene haya ẽ uiãyã