Deuteronômio 6 - Kaxinawá Bíblia (BR)

Nukũ mekenika Senhor Deus betxipaikĩ nukũ yura hirabiwẽ atikiaki, na hãtxarã

⁴ Txipu Moisĩ ana hatu yusĩkubaĩkĩ yuikĩ: “Israelĩ enabuũ, matu yuinũ ea nĩkakãwẽ. Nukũ mekenika Senhor Deusrã, bestitxaiki, hatũ kẽwãti dami betsa betsapa keskamarã.

⁵ Haskakẽ matũ mekenika Senhor Deus betxipaikĩ matũ huĩti dasibiwẽ inũ matũ hiwea dasibiwẽ inũ matũ kushipa dasibiwẽ duawakubaĩshãkãwẽ, heneamarã.

⁶ Na haska dasibi ẽ matu yuishu matũ shinã merã netãtã hakimayamakubaĩkãwẽ.

⁷ Ha dikabi na haska tibi ẽ matu yusĩshu haska tibi hakiri hãtxakĩ matũ bakebu yusĩkubaĩshãkãwẽ, matũ hiwetãshũ inũ, bai namakishũ inũ, ushaitiã inũ, mã besteaĩtianã.

⁸ Na yunuti hãtxa keneshũ hakimatimakĩ bitxi bau pishta watã neshatã matũ mepitiki inũ matũ betũkuki neshetã haya mapukubaĩshãkãwẽ.

⁹ Ha dikabi matũ hiwe beputi istabĩ dabeki habias na yunuti hãtxa kenekubaĩshãkãwẽ. Ha inũ, matũ mae kenekauana hanu hikimisbu shui beputi anu habiaskari wakĩ keneriakubaĩshãkãwẽ”, itã,

Senhor Deus nĩka pewatã hau haki besti txiti ishanũbũ Israelĩ enabu Moisĩ hatu nemakĩ yusĩtxakayamanikiaki, na hãtxarã

¹⁰ “Matũ mekenika Senhor Deusũ matũ shenipabu Abraão inũ Isaque inũ Jacó mai pakea yubani anu ma matu hikimai kaikiki. Mae ewapa hawẽrua sharabu anu dayakĩ mã beniama ini nawabũ ayamabu anu Senhor Deusũ matu ma ibuwamai kaikiki.

¹¹ Hiwe pepa mabu mata haya hawa mã hanu aruama inibu inũ, ũpash banakĩ mã pukiãma iriani inũ, uva bai washũ mã banama iriani inũ, mibã hi oliva itxapa mã banama iriani mã ibuwashanaii, ha mae anushũ bimi pikĩ yaniwai pepeirã.

¹² Egito anushũ matũ ibubu dayaru escravo wanishũ hatu itxakawaibu hawẽ kushipawẽ Senhor Deusũ hatu mebikinãtã iwekubiranishũ mai pepa anu ma matu hikimarã, haska tibi bestikiri shinãkĩ nukũ mekenikaki petxitã hakimayamakubaĩshãkãwẽ.

¹³ Haska shinaĩ Senhor Deuski mesekĩ kẽwaĩ ha besti dayashuni peshũkubaĩshãkãwẽ. Tsuabura mã yubakakatsis ikairã: ‘Ẽ mia parãmaki’, iwanã, Senhor Deusũ kena bestiwẽ shabakabi yubakakubaĩshãkãwẽ.

^14-15 Matũ mekenika Senhor Deus matube hiwearã, yaushinãki, hawa txakabu husia uĩkatsi ikama pepa besti matu uinũ ikarã. Hakia mã kanekubainaya hawaira matuki sinatakĩ Senhor Deusũ matu yamawatiruki. Haskawẽ taeshũ matu dapi hiwebaũshanaiburã, habũ yushibubu tibi kẽwãmisbu hayaki. Hatu txibãkĩ hatubetã kẽwãyamashãkãwẽ”, hatu anikiaki.