Deuteronômio 4 - Kaxinawá Bíblia (BR)

Israelĩ enabũ hau Deus nĩkatã txibãkubainũbũ Moisĩ hatu yusinikiaki, na hãtxarã

¹ Txipu Moisĩ hatu ana yuikĩ: —Matũ shenipabũ mekenika Senhor Deusũ mai pepa matu ibuwamashanai anu hari hikikĩ ibuwatã mã hanu hiweshũ txibãkĩ hawẽ yunuti inũ hawẽ nemati yusini natiã ẽ matu ana yusiaĩ nĩkatã hakimama aki hawẽ hiwekubaĩshãkãwẽ, txĩtuãmarã.

² Haska ẽ matu yusiainã, ana betsa wakĩ txitxikĩ ewa wama inũ hãtxa betsa tere akama haska matũ mekenika Senhor Deusũ yunua besti txibaĩ pehairashũkubaĩshãkãwẽ.

³ Baal-Peor mae anushũ ẽ hãtxa nĩkama matunabu betsa betsapabũ hatũ kẽwãti dami mishkiki dãti iki beti ishũ kẽwaĩmabuwẽ taeshũ Senhor Deusũ hatu kupikĩ tenãkĩ keyuai matu dasibibũ haska mã uĩmaki.

⁴ Hakia matũ mekenika Senhor Deus dasibibũ hawẽ hãtxa mã txibaĩburã, natiã mã hiweyuabuki.

⁵ Haskakẽ matunã, uĩrakãwẽ. Hanu mã hiweshanai anushũ hawẽ hãtxa mã txibãkubaĩshanũbũ Senhor Deusũ hãtxa kushipa inũ hawẽ yunuti inũ hawẽ nemati hãtxa ea yuikubirana ẽ matu yusĩriakubiranimaki.

⁶ Haskawẽ taeshũ Senhor Deusũ hãtxa nĩkakĩ mã akubainaibu tsuabũra matu uĩkĩ mã unanepabu inũ mã nĩkanikabu matu uĩkĩ shinãshãkanikiki. Senhor Deusũ hãtxa mã txibãmiskiri tsuabũra nĩkakĩ yuikubaĩkĩ: “Ha yurabu itxapabu patapama yusĩ nĩkanikabu inũ unanepabuki”, akĩ matukiri yuitirubuki.

⁷ Hakia nawabũ hatũ kẽwãti yushibu itxapa hayabũ kẽwãkĩ yukabiabu hawa hatu nĩkatã kematirumaki. Hakia nukuburã, nukũ mekenika Senhor Deus nũ haya hawẽtsaĩs nũ yukai tibi nuku nĩkatã kemakubainikiki.

⁸ Na yunuti hãtxa inũ hawẽ nemati hãtxa pepa natiã ẽ matu inãshu keska, haratu yurabu hatũ beya pepa hayabumẽ? Haska hayabumaki.

⁹ Hakia 40 ano dasibi mã uĩkubirãshina mã hakimataskayamashanũbũ uĩrahairakubaĩshãkãwẽ, shinã heneamarã. Haska mã uĩkubiranai shinaĩ hiwekubaĩkĩ na habias hãtxa inũ hawara mã uĩkubiranai matũ bakebu inũ matũ bababu shabakabi hatu yusĩkĩ tapĩmakubaĩshãkãwẽ— iwanã,

Mati Horebe anushũ Deus hãtxani Moisĩ ana hatu shinãmanikiaki, na hãtxarã

¹⁰ hatu ana yuikĩ: “Haria nũ huima anu Mati Horebe dapi Senhor Deus bebũ matũ ibubube mã mapubaunibu ẽ shinaiĩ. Harishũ Senhor Deusũ ea yuikĩ: ‘Israelĩ enabu ea bebũ ea hatu itxawashũwẽ, ẽ hãtxa ẽ hatu yusiaĩ nĩkakĩ tapĩtã hau shaba tibi eki mesekĩ ea kẽwãriakubaĩshanũbunã. Habiaskari wakĩ hatũ bakebu hatu yusĩkĩ hau hatu tapĩmariapakeshanũbunã’, ea wa

¹¹ ẽ matu itxawakẽ mati tenãmã matũ ibubube mã bea mapuabũ mati anu txi here hi hi ikaunaya txi kuĩ nai anu inakaĩ meshu dunukẽ

¹² hanua Senhor Deus txi here namakis anua hãtxaya hawẽ hui nĩkakĩ hawa dami mã uiãma inibuki.

¹³ Habiatiãri hawẽ yubati hãtxa matũ ibubu yuitã txipu mati anushũ hawẽ 10 yunuti inũ hawẽ nemati hãtxa mestenepa mesehaira mishki sapa dabeki Senhor Deusũ kenea hau unãkĩ mã tapĩtã akubaĩshanũbũ matu yununiki.

¹⁴ Hanu mai pakea betsa hatu mebĩkĩ ibuwatã harishũ hawẽ hãtxa txibaĩ mã ikubaĩshanũbũ hawẽ yunuti inũ hawẽ nemati hãtxa ea matu yusĩmakubaĩkatsi bebũkiri Senhor Deusũ ea yununiki”, iwanã,

Yura betsabũ dami betsa betsapa kẽwãmisbu keska wakĩ hau Israelĩ enabũ kẽwãyamashanũbũ hatu nemanikiaki, na hãtxarã

^15-18 Moisĩ ana hatu yuikĩ: “Mati Horebe anua txi here namakis Senhor Deus nishũ matũ ibubuya matu hãtxa wai hawẽ hui besti mã nĩkaniki, hawa dami yushĩ keska uiãmarã. Haskawẽ taeshũ haki meseti wakĩ matunã, hawa dami betsa wataskayamashãkãwẽ. Uĩrahairakubaĩshãkãwẽ. Dami wakĩ huni itsa inũ, aĩbu itsa wakĩ inũ, yuinaka itsa inũ, peiyabu itsa inũ, nutawẽ mapumisbu itsa inũ, baka itsa wakĩ haska taska dami wai txakabuyamashãkãwẽ.

¹⁹ Ha dikabi naiuri uĩkĩ bari inũ ushe inũ bishi inũ bishi kauani txashakainai betxitã haki mesei ‘Habaa!’ iki datekĩ haska kẽwãyamakubaĩshãkãwẽ. Yurabu dasibi merabewakĩ hawara sharabu nai anua uĩtirubu Senhor Deusũ hatu damiwashuniki.

²⁰ Senhor Deusũ Egito anua matu mebikinãkirãkĩ matu pashawakinã, hawena wabirãkĩ matu iweniki. Na habiatiã mã hawenabuki.

²¹ Nũ hawenabu kayabibia matuwẽ taeshũ ẽ kaneaya Senhor Deus eki sinatakĩ ea yuikĩ: ‘Hene Jordão mĩ puketiruma inũ mai pepa ẽ hatu ibuwamashanai anu mĩ hikitirumaki’, ea waniwẽ taea

²² na habia mae anua bestikiaki ẽ mawashanaii, Hene Jordão pukebainamarã. Hakia matubunã, pukebaĩ ha mai pepahaira mã ibuwashanaii.

^23-24 Hakia matũ mekenika Senhor Deus yaushinikatũ txiwẽ dasibi kuamis keska matuki sinatatiruwẽ taeshũ haska matũ mekenika Senhor Deusũ matu yubani hawẽ hãtxa hakimama inũ habiaskari dami betsa betsapa ha dami watima matu nemani habu tibi hakimama uĩrakubaĩshãkãwẽ.

²⁵ Mai pepa anu hikinishũ bake pawai inũ baba pawai ha mai anua anibui hakimakubaĩkĩ ha kẽwãti dami betsa betsapa shinãkĩ mã ashanimẽkaĩ. Haska wakĩ matũ mekenika Senhor Deus bebũshũ txakabu tibi wakubaĩkĩ mã sinatamatirubuki.

²⁶ Eskawẽ shinãti shabakabi ẽ matu waii. Nai inũ mai habu txanitirubu keska wakĩ ẽ matu unãti wamaii. Na ẽ matu hãtxa wai danãkĩ mã txakabuwakĩ Senhor Deus sinatamai hauri mã kashanai anua mã debui keyushanaii. Hari mã hiwei txaipama itiruki, yamai keyuirã.

²⁷ Mã txakabuwai matu kupikĩ nawa betsa betsapa anu sa akĩ Senhor Deusũ matu ubisitawashanikiki. Matu haska wa hatiri eskarabes hatũ mae anu mã hiwebaũshãkanaii.

²⁸ Nawa betsa betsapabu anushũ harishũ yushĩ hunibũ hatũ mekẽnẽ dami wakĩ hi inũ mishki dami wamisbu ha damirã, uĩtirubuma inũ, nĩkatirubuma, inũ pitirubuma inũ, huĩsinatirubumabiakẽ nawabũ beya txibãkĩ mã hatubetã kẽwãshanaii.

²⁹ Harishũ atimas yushĩ dami danãkĩ matũ mekenika Senhor Deus hakimatã danãbianishũ ana benakĩ matũ yushĩ hirabiwẽ inũ matũ huĩti hirabiwẽ shinaĩ mã ana haki nukutiruki.

³⁰ Mã nuitapai inũ mã bika teneai uĩkĩ atimas shinã betsa watã ana txĩtũkirã haska Senhor Deusũ matũ ibubu yusini mã ana nĩkakĩ akubaĩtiruki.

³¹ Dateyamakãwẽ. Matũ mekenika Senhor Deus nuikipahairatũ matu putama inũ matu yamawama ishanikiki. Haska matũ shenipabu yubanishũ hakimama matu ana mekekĩ heneama ikũkaĩshanikiki.

³² Shinãkãwẽ. Unu hiwei taenibutiã inũ hari mã hiwei taenitiã ikubirãshinaburã, Senhor Deusũ mai hirabi dami wakĩ huni wani anua mai nati ikĩ tsuabura mã hatu yukatiruki. Na haska ẽ matu yuiai keska nukũ Senhor Deusũ kushipa keska betsabũ unanibumẽkaĩ. Uĩriakanimẽkainã, na haska nũ uĩshina keskarã.

³³ Txi here pueai meranua Deus hãtxai nawa shukua betsã nĩkatã debuama inibu hayamẽ, haska mã nĩkani keskarã, txi meranua hãtxairã?

³⁴ Haska matũ mekenika Senhor Deusũ matũ ibubu katushũ abirani keska nawa betsaburã, tsua haska keska hayabumẽ? Eska tibi akinã, matũ ibubu katushũ hawẽ unãti itxapa inũ, hawẽ unãmati dami itxapa inũ, dami itimaska betsa betsapa wakĩ hawẽ kushipawẽ hatu datemakĩ hatu detenamemakĩ Egito anua Senhor Deusũ matunabu abirani keska habias mã uini keska wakĩ mekenika yushĩ betsanã, atirumẽ? Haska keska hayamahairaki.

³⁵ Matũ mekenika yushĩ pepa txanima kayabi Senhor Deuski. Tsuã Deus binua ha keska betsa hayama matu unãmaniki, haska matu shinãmakinã.

³⁶ Nai anushũ hawẽ huiwẽ matu hãtxa wakĩ mã kaneaibu matu pewakubiraniki. Hanua mai anushũri hawẽ kushipa txi here meranua Senhor Deusũ hãtxa tashniai mã nĩkakubiraniki.

³⁷ Matũ shenipabu betxipai hatuwẽ nuikũkiraniwẽ taeshũ matunaburi pakubainaibu katutã hawẽ kushipa mẽtsisipahairawẽ mebinanãkĩ Egito anua Senhor Deusũ matu tashnimabiraniki.

³⁸ Hanua mai pepa hatu mebĩmakĩ matũ berubi nawa shukua tibi matu nitxĩshũkĩ habu mirima matu binuã kushipahairabiabũ hatũ mae betsa betsapa anua Senhor Deusũ matu hatu putashũkubirãkĩ dama keyuikiki. Matu haska washunaya hatũ maiwã inũ hatũ mae tibi mã mebĩkubaĩshanaii, ibuwakinã, natiã matu ashuaĩ mã uiaĩ keskarã.

³⁹ Haskawẽ taeshũ matũ shinãwẽ tsuma pewatã hakimayamakãwẽ, mistu pewakinã. Matũ mekenika Senhor Deusrã, nai inũ mai hirabi hawenaski. Mekenika ha keska Yushĩ Pepa betsã binuã tsua hayamahairaki.

⁴⁰ Haska natiã ẽ matu yunuai keska hawẽ yunuti inũ hawẽ nemati hãtxa Senhor Deusũ matu yunuima akĩ txibãkubaĩshãkãwẽ. Mã haska waibũ maiwã ibuwamakĩ Senhor Deusũ matu inaĩ anu matu inũ matunabu pakubaini bari itxapa hanus hiwepakeshãkanikiki”, hatu wanikiaki.