Deuteronômio 34 - Kaxinawá Bíblia (BR)

Moisés mawanikiaki, na hãtxarã

¹ Hawenabu yusĩkĩ keyutã Moabe nawabũ maiwã pãpa anua kai Mati Nebo anu mapekei ana mati kuburu betsa hawẽ kena Pisga mamaki nishũ habias besusi Jericó uiã anurã, hanushũ Senhor Deusũ Moisés uĩmakĩ hatishũ Gileade enabu inũ Dã enabũ hatũ mai pakebukuã kesua ishanai uĩmakĩ

² inũ hanu Naftalĩ enabu hatũ mai pakea anu hiwebaũshanaibu inũ, hanu Efraimnẽ enabu inũ, Manassésĩ enabu hiwebaũshanaibu anu inũ, bari hikiaikiri Ianẽwã Mediterráneo kesha kesua anu hatishũ Judá enabu hiwebaũshanaibu uĩmakĩ

³ inũ napãpa mai tsusĩ sul anu inũ, Hene Jordão kesha pãpa inũ, Jericó mae napãpa ewapa anu hanu paniwã mapubauna anu kesutani mae pishta hawẽ kena Zoar kesua uĩmakĩ keyutã

⁴ Senhor Deusũ Moisés yuikĩ: “Ha maiwã hirabirã, mĩ shenipabu Abraão inũ Isaque inũ Jacó habu tibi yubakĩ: ‘Ha maiwã pakea matunabu pakubainaibu ẽ hatu ibuwamashanaii’, akĩ ha dabe inũ besti ẽ hatu yubaniki. Ha maiwã pakea mĩ beruwẽ mĩ uinũ ẽ mia uĩmaii. Hakia ukeri pukebaini mĩ katirumaki”, akaya

⁵ habiaskari Senhor Deusũ bebũkiri yuimarã, Senhor Deusũ tsuma Moisés mawakẽ

⁶ Moabe nawabũ maiwã pakea anu Bete-Peor besusi napaku anu hawẽ yura Senhor Deusũ maiwanikiaki. Mawa hanira hawẽ yura Senhor Deusũ maiwanirã, na habiatiã tsuã unãmakiaki.

⁷ 120 ano hayabia hawẽ beru inũ hawẽ yura babuama Moisés mawanikiaki.

⁸ Ma debua unãtã Moabe nawabũ maiwã pãpa anu Israelĩ enabũ Moisés manui shinaĩ kashai 30 dia kashakubaini nesenibukiaki.

⁹ Hanushũ bebũkiri Josué katukĩ hawẽ mekẽ dabewẽ Moisĩ mamepishũ hawẽ unanepati kushipa Moisĩ Josué yunuimawẽ taeshũ haska Senhor Deusũ Moisés yunumaima keska wakĩ Josué hãtxa Israelĩ enabũ hari nĩkakĩ taewabainibukiaki.

¹⁰ Moisés keska Deusũ hãtxa yuishunika betsa Israelĩ enabu anua tsua haska keska hayama inibukiaki, haska habe beisinaĩ hãtxapauni keskarã.

¹¹ Hatu eska washunirã, Egito anushũ hatũ shanẽ ibu Faraó inũ hawẽ shanẽ ibu beshmasbu inũ hawenabu dasibi kupikĩ hawẽ dateti unãmati dami Moisĩ hatu ashuni inũ,

¹² haska Deusũ kushipa inũ hawẽ mesehairawati dami tsuã atiruma hatu washuaĩ Israelĩ enabu dasibibũ uĩkubainibu tsuã haska keska wakĩ Moisés binutirubumahairakiaki.