Deuteronômio 1 - Kaxinawá Bíblia (BR)

Senhor Deusũ yunuima hau txibãkĩ akubaĩshanũbũ Moisĩ hakiri hatu hãtxa yusinikiaki, na hãtxarã

¹ Mae betsa Sufe besuuri Hene Jordão ukeri bari huaikiri mae betsa betsapa Parã inũ, Tofel inũ, Labã inũ, Hazerote inũ, Di-Zaabe namakis tsua hanu hiweabumanu hawẽ kena Arabá anushũ hatũ tari hiwe pũtebaunabu anushũ Israelĩ enabu dasibibũ nĩkaibũ eska hãtxa Moisĩ hatu yuinikiaki.

² Mati Horebe hawẽ kena betsa Mati Sinai anua bui Seir baiwẽ 11 dia kai mati tibi dũkeatãbaini mae betsa Cades-Barnéia anu hikinibukiaki.

^3-4 Hene Jordão kesha betsaurishũ Moisĩ hatu yunua Amorreu nawabu shanẽ ibuhaira Seom, mae Hesbom anu hiwea hawẽ detenamenikabube Israelĩ enabu hatu maemashinabu Moisĩ ana hatu yunua mai pakea kesuakea Edrei anu Basã nawabu shanẽ ibuhaira Ogue Astarote anu hiweshũ hatu yunuaya Israelĩ enabũ Ogue inũ hawẽ detenamenikabu hatu maemakĩ keyushinabu Egito anua tashnibiranibu ma 40 ano kaya 11 ushetiã shaba ha dukũ taeaya ha nawabu hatu yamawashinabu habiatiãri Moisĩ haska dasibi Senhor Deusũ yunuima hau txibãkĩ akubaĩshanũbũ Moisĩ hakiri hatu hãtxa yusinikiaki.

⁵ Hene Jordão kesha betsauria hariria bari huaikirishũ Moabe nawabu mae ewapa pãpawã anushũ yusĩti hãtxa Moisĩ hatu yusĩ taewakĩ yuikĩ:

⁶ “Mati Horebe anushũ nukũ mekenika Senhor Deusũ nuku yuikĩ: ‘Maturã, na mati dapi mã hanus hiwei txaipaki.

⁷ Natiã nenua benibaĩkatsi matũ mabu pewatã bukãwẽ, ha Amorreu nawabu hanu hiwebaunabu inũ hatu dapi dasibi hiwebaunabu mati matipa anurã. Haska inũ buirã, Arabá anu mapãpa inũ kepãpa inũ, mai tsusĩ Neguebe anu inũ, ianẽwã kesha kepãpa Canaã nawabũ mae anu inũ, Líbano anu inũ, ana nortekiri txaihaira hene ewapa Eufrates anuri ha mai dasibi anu hari bukãwẽ.

⁸ Ha mai hirabi dasibi Abraão inũ, Isaque inũ, Jacó inũ, matunabu pakubaĩshanaiburi matũ shenipabu ea Senhor Deusũ inãkatsi ẽ hatu yubani anu bukĩ hanu hiweabu mebĩkĩ putakĩ hatu yamawatã ha mai hirabi ibuwakubaĩshãkãwẽ’, akĩ Senhor Deusũ nuku yuini ẽ matu shinãmaii”, akĩ Moisĩ hatu yuinikiaki.