Colosenses 3 - Kaxinawá Bíblia (BR)

¹ Cristo mawa bestẽwãtã Deusũ hawẽ yusiuri tsaumanishũ habe shanẽ ibu waiwẽ taeshũ matũ xinã betsa watã mã ma ikũwaĩbu mã ma habe besteni keskawẽ taea hawara naiuria Cristowẽ Deusũ pepa benakubaĩkãwẽ.

^2-3 Cristobe mã ma mawani keskawẽ taeshũ matũ hiwea Deusũ nai anu matu mekeshunaki, hari Cristobe mã hiweshanai anurã. Hanua na mai anu mã hawẽ hiwea mabukiri besti xinãma Deusũ haska abumiskiri xinãkubaĩkãwẽ.

⁴ Haskawẽ taea Cristo shanẽ ibui benima paeya ana huaya maturi habiaskariai mã habe benimatxakayamashanaii. Cristorã, habia matũ hiwea kayabiki.

Cristoki dasikatsi hiwea bena katutikiaki, na hãtxarã

⁵ Haskakẽ na mai anua matũ kemurã, tenãkĩ akawarikãwẽ, eska tibi Deusũ nemani heneirã. Ana aĩbu betsa tibiwẽ kemuama inũ, ana hamapai tibibe txutanamebaunama inũ, hawara kemu atimapa betsa betsapa mã akatsis ikai inũ, ana pei inũ mabu betsa itxawanũ, iwanã, yauxikĩ kẽwãti betsa keska wakĩ pei inũ mabuwẽ kemukĩ kẽwãyamakubaĩkãwẽ.

⁶ Hakia haska tibi txakabu aki mã Deus nĩkama sinatamamiski. Hawẽ taeshũ ha nĩkaisbuma Deusũ hatu kupihairashanaiwẽ taea

⁷ txakabu habiaskari matũ hiwea sheniwẽ mã abiapauni

⁸ natiã ana haska meama menã hawaira dasibi hene keyurikãwẽ, mã eskamisrã, mã sinatamisrã, mã kemumisrã, mã txakabu wamisrã, mã sheti ikama kũyã imisrã, sherabiãma mã hãtxa txakabu yui shetxakamisrã,

⁹ mã txani txakamisrã. Natiã haska tibi mã ma heneamẽkaĩ, matũ hiwea shenirã. Haskakẽ ana haska Deusũ abuama txakabu tibi ayamakubaĩkãwẽ.

¹⁰ Tari bena sawea keska wakĩ matũ hiwea mã ma benawaki. Matũ hiwea ma benawairã, haska Deusũ abumis keska hiweshũbaĩkãwẽ, hatũ matu damiwani keskairã. Haskakĩ itxapa mã hakiri unãshanaii.

¹¹ Mã ma haskarã, tsuabũra Cristo ikũwaĩbu hawenabukiri eska xinaĩ mã hãtxatirubumaki, Gregonawaburã, judeuburã, habũ judeubũ beya txibãkĩ habũ hina kubitxi meshtemisburã, habũ judeubũ beya txibaĩsbumarã, nawa shukuabu tibirã, pubẽburã, habũ habu dayashũmisburã, tsuã tsumamarã. Nũ haska betsa betsapabubia haska xinaĩ hatukiri hãtxayamakubainãkãwẽ. Cristorã, dasibikirã, dasibibũ shanẽ ibui keyuaki.

¹² Haskakẽ Deusũ matu abukĩ hau hawenabu meribi tari mã inũbũ matu katunikenã, matũ xinã pepa kaĩmakinã, tari bena sawea keska wakubaĩkãwẽ, yura betsabuwẽ nuirã, pepairã, babutã keãmarã, duapairã, hĩ hĩ ikama manakairã.

¹³ Haska inũ, tsuabũra matu txakabuwaya hawaira haki sinatama tenetã merabenaĩ hatũ txakabu hakimatã ana hakiri xinãyamakubaĩkãwẽ, nukũ Shanẽ Ibũ matũ txakabuwẽ Deus matuki sinatai buashuni keska wakinã.

¹⁴ Haskakẽ na yusĩa haska tibi dasibi txibaĩ abunamei heneama inũ putanameama pepai mã hiwekubaĩtirubuki.

¹⁵ Hakia Cristõ unãnuma matu hiwemayarã, ha matũ huĩti uke merã shanẽ ibu wamakãwẽ. Matu haska wakatsi ikĩ Deusũ ma matu katunishũ habias yura matu wakatsis ikikiki. Dasibi ma hatũ matu ashuni xinãkĩ kẽwãkubaĩkãwẽ.

¹⁶ Matubunã, Cristõ kakape hiwetikiri itxapa mã ma tapianã, heneama akubaĩkãwẽ. Eskairã, hawẽ yusĩnanaĩnã, hawẽ unãnepakĩ betsabũ kaneaibu hatu ha akĩ pewakubaĩkinã, matũ huĩtĩ benimai xinã txãkãkĩ: “Peki”, ikĩ Deus kẽwaĩ Deuskiri nawati betsa betsapawẽ nawakubaĩkãwẽ.

¹⁷ Hawara tibi mã akai inũ mã yuiairã, nukũ Shanẽ Ibũ haska abui keska hawẽ kuxipawẽ akubaĩkãwẽ, nukũ Epa Deus: “Peki”, akinã, mã Cristonabunã.

Ikũwaĩbu kayabi haskai hiwetikiaki, na hãtxarã

¹⁸ Beneyabuũ, matu yununũ nĩkakãwẽ. Ikũwaĩ mã ma nukũ Shanẽ Ibuki dasiniburã, matũ benẽ hawarakiri matu hãtxa wai hawẽ hãtxa txibãkĩ nĩkasama ashũkubaĩkãwẽ.

¹⁹ Aĩyãbuũ, maturi yununũ nĩkakãwẽ. Matũ aĩ abui hatuwẽ nuikĩ hatu ha akĩ bikawayamakubaĩkãwẽ.

²⁰ Bakebuũ, maturi yununũ nĩkakãwẽ. Nukũ Shanẽ Ibu benimawakinã, matũ ibubũ matu yusĩkĩ nemai nĩkakubaĩkãwẽ.

²¹ Bakeyabuũ, maturi yununũ nĩkakãwẽ. Matũ bakebu tapĩmakĩ hau matuki sinatayamanũbũ yunutxakayamakĩ nemahairayamakubaĩkãwẽ.

²² Escravo dayarubuũ, maturi yununũ nĩkakãwẽ. Matubunã, matũ tsuma mai anuabu hatu duawakĩ matu uĩaĩbu inũ matu uĩabumakẽ haska bestiwakĩ hatu duawai xinãma hakia matũ huĩti pepawẽ hawara hatu ashũkinã, nukũ Shanẽ Ibũ kuxipaki mesekĩ hatu ashũkubaĩkãwẽ.

²³ Hawara daya tibi mã hatu ashuainã, txikixbetanã hatu ashũama nukũ Shanẽ Ibu mã duawai keska wakĩ hatu ashũkubaĩkãwẽ, yurabu hatu uĩmakĩ ashũamarã.

²⁴ Ha inũ, nukũ Shanẽ Ibu Cristo matũ yununika kayabitũ matu yunua nĩkakĩ mã ashũkĩ mã benimawamisrã, ana matu manakukĩ itxapa matu binumakĩ haska yubakani hiwekuĩa matu inãshanai mã ma unaiĩ.

²⁵ Hamẽ tsuabũra txakabuwamisrã, hatũ txakabuwẽ Deusũ hatu kupishanikiki, yura betsa betsapaburã, aĩbuaiburã, huniburã, bakeburã, ibuburã, escravo dayarurã, yununikaburã. Haska washanikiki, betsa binumamarã.