Colosenses 2 - Kaxinawá Bíblia (BR)

¹ Mã ikũwaĩbu Colossos anuabu inũ habu Laodicéia anuabu inũ dasibi betsabube nũ uĩnanãriabumabia matuwẽ nui ẽ dayatxakayamamis mã unãnũbũ ishũ matu xinãkĩ ẽ matu yuiaii.

² Hau mã xinã txãkaĩ henetima binũbũ inũ, hawa betsa xinãma ikũwaĩ betsabube ketashamei nuinamei mã abunamenũbũ inũ, unãnepakĩ Deusũ hawẽ yuba betsa huneni Cristokiri natiã hau shabakabi mã nĩka pehairawanũbũ ẽ matu dayai heneshunamaki.

³ Eskaki, matu yuinũ xinaĩrakãwẽ. Hawẽ unãnepati pepa inũ hawẽ tapĩti dasibirã, Cristo anu hayaki, haska Deusũ hakiri hunenirã.

⁴ Haska matu yuikinã, hau ana tsuãra yusĩa betsawẽ ana matu parãyamanũbũ Cristo besti unãnepahairakiri ẽ haska matu banabimaii.

⁵ Haska inũ, ẽ yura ẽ matubemabia ẽ xinã matu anuki. Mã ma Cristo ikũwãnishũ hawẽ daya ashũkĩ txibãkubaĩkĩ mã pewai mã ma pekẽ matuwẽ nui ẽ benimaii.

Cristokiri ikũwaĩ xinã betsa wanibukiaki, na hãtxarã

⁶ Haskakẽ mã ma Jesus Cristo ikũwãkubainaiburã, matũ Shanẽ Ibu Cristo hiweshunirã, haska abuai keska ishũkubaĩkãwẽ.

⁷ Haska matu yusĩmisbu txibãkĩ bari tibi heneama ana uke merã ikũhairawakubaĩkĩ Cristokiri tapiĩ ewakaĩkĩ matu pepawaikiri Deus kẽwãkubaĩkãwẽ.

⁸ Huni betsabũ hatũ yusĩa beya betsawẽ matu unãnepa wapai matu hatu txibãmakatsis ikaibu hatũ yusĩa pe itsa kayatapiamaki. Uĩrakãwẽ, tsuabũra Cristõ yusĩa danãkĩ hakiri xinaĩ hãtxashunabumakirã. Hakia habu ikirã, na mai anushũ yushĩ kuxipabũ yunuai txibãkĩ yusĩa betsã ani hawẽ yusĩnanaĩ kanenibu txibãkĩ matu amakatsis ikubaĩkanikiki, haska habu yusĩnanãkinã.

⁹ Cristorã, Deusuna hasbia nukũ yura keskatã na mai anu uĩti xarai tashnikiraniki.

¹⁰ Cristo mã ma haki dasitã ikũwaĩburã, Cristona dasibi mã hayaki, Deusũ hawẽ kuxipa habiasri inãniwẽ taearã. Ha dikabi yushĩ dasibi inũ, nai tsuma pepa inũ, txakabu dasibi inũ, shanẽ ibubu mai anua shanẽ ibuhairakĩ hatu binu keyuaki.

¹¹ Hamẽ, betsarã, Abraão Deusũ yununi txibãkĩ Deus unãmanũ, iwanã, judeubũ hatũ huni bake kaĩyã hatũ hina kubitxi meshtemisbu keska wakĩ natiã mã judeubumã Cristo mã ikũwaĩbu matu haki dasiwakĩ matũ hina kubitxi meshtea keska wakĩ matũ xinã txakabu inũ matũ beya txakabu Deusũ meshtea keska wakĩ matu putamaniki, xinã betsa wamakinã.

¹² Haska inũ, Cristo mã ikũwãyã yura betsabu hatu unãti wamai mã naxiniburã, eska tibi hawẽ xinãmatiki. Nĩkairakãwẽ. Naximakĩ matu henẽ bitxiaburã, Cristobe matu mai wanibu keskaki. Hanushũ hene anua matu benibirãkĩ tashnimakĩ kaĩmaiburã, Cristobe besteã keska wakĩ matu akawanibuki, haska wakĩ Deusũ hawẽ kuxipawẽ Cristo bestẽwani ha kuxipa mã ikũwaĩwẽ matu imakinã.

¹³ Hamẽ uatiã matu hiwearã, matũ txakabu mã heneriamawẽ taearã, mã mawa keska hiwenibuki. Hakia natiã tsuabũra Cristo mã ikũwaĩbu dasibi matũ txakabu Cristowẽ matu buashuniwẽ taeshũ Deusũ Cristoki ma matu dasiwatã hawẽ taeshũ hawẽ hiwea kayabi matu inãniki.

¹⁴ Haska wakĩ hawẽ yunua inũ hawẽ nema Deusũ nukubukiri mese wanishũ hawẽ nukũ txakabu tibi Deusũ tanakĩ netãkubainishũ hawẽ taeshũ Deusũ nuku kupitirubiakẽ ha binumai Cristo cruzkia nuku mawashũkĩ nukũ txakabu mastakĩ nuku bepu keyushuniki.

¹⁵ Cristo mawa Deusũ ana bestẽwaniwẽ taeshũ hatu uĩmakĩ Satanás inũ hawẽ tsumabũ kuxipa Deusũ mebĩmakĩ hatu maematã hatu dakewakĩ keyumaniki, yura dasibi habukiri shabakabi unãmakinã.

¹⁶ Judeubu hatũ beya tibi hayabuki. Haska inũ, hatũ beya betsa txibãkĩ piti dasibi pitirubumabia piti betsa besti pitirubuki. Haska inũ, hatũ beya betsa txibãkĩ hawẽ nushuti betsa atirububia betsa atirubumaki. Haska inũ, hatũ beya betsa txibaĩ itxatã besi betsa betsapawẽ besimisbuki, ushe benatiã inũ huĩrukũti sábado tibitianã. Haska tibi txibãkĩ amisbunã, hau matukiri haska xinaĩ ha iyamakubainũbũwẽ.

¹⁷ Na beya betsa betsapa tibiwẽ hawẽ Cristokiri xinãmati besti ikubainibuki. Hakia Cristo ma hunikẽ ha beya ana kuxipa hayama hamẽki.

¹⁸ Haskakẽ tsuabura pepa kayabitikiri xinaĩ keĩsbuma inũ, tsuabũra nai tsumabu kẽwãmisbu inũ, haskamabia usha namai keskakĩ hawara tashnikiranai shabakabi uĩ hatũ xinã merã keĩ xinã txãkãmisbuki. Haskamisbũ hau habũ matu txitekĩ dakewayamanũbũ uĩrakubaĩshãkãwẽ.

¹⁹ Ha habu haskamisburã, Cristorã, hatũ bushkamaki. Hamẽ nukuburã, nukũ bushkarã, Cristoki. Haskakẽ nukũ yura ewakaini pitiwẽ nũ kuxipamis keskariai habũ nukũ Shanẽ Ibu Cristo ikũwaĩburã, pabu tibi haki dasikĩ nũ ewawairã, hawara nũ unãriama tapĩmakĩ haska Deus yubakani Cristõ haska xinãkĩ nuku amaikiki.

Cristobe nũ hiweshanairã, hunibũ yunua keskamakiaki, na hãtxarã

²⁰ Tsuabũra Cristo mã ma ikũwaĩburã, mã ma Cristobe mawani keskabuki. Haskawẽ taeshũ na mai anushũ shanẽ ibukĩ hatũ kuxipawẽ beya betsa betsapa yunuaibũ ana habũ matu tsumatirubumaki. Haskabia haskai ikũwãbumabe hiweshũ habũ matu yunuai nĩkakĩ mã txibãkĩ heneriabumamẽ, habu keskakinã?

²¹ Habũ yunua eska txibãkinã: “Ha meyamawe”, ikaibu inũ: “Ha piyamawe”, ikaibu inũ: “Ha mĩ mekenẽ meyamawe”, imisburã,

²² haska tibi hatũ yunuarã, hunibũ haska xinãkĩ hatu yusĩmisbu besti akaiburã, ha mabu inũ ha pitikiri matu yusĩkĩ unãmakĩ tapĩmaiburã, hawẽ hiwekubainaibu hawaira keyushanikiki.

²³ Ha haska txanima keska wakĩ yusĩnanãmisburã, unãnepakatsis ikĩ yusĩa bena bika ibubis yusĩkĩ txibãhairakĩ hatũ hiwea pe mekekatsis ibiai tsuã hawẽ xinã txakabu nemakĩ henetirumaki. Haska akinã, haska abuaibu besti hatũ xinãwẽ besti kuxipakĩ yuikubaĩmisbuki.