Colosenses 1 - Kaxinawá Bíblia (BR)

Paulõ hatukiri xinãnikiaki, na hãtxarã

¹ Ea ẽ Paulorã, Deusũ hawẽ xinãnẽ Jesus Cristõ hawẽ kuxipaya ea wakĩ ea katuniwẽ taeshũ nukũ betsa Timóteobetã

² tsuabura Colossos mae ewapa anuabu Deusũ hawenabu meribi matu wani mã nukubetã Cristo ikũwaĩ mã txĩtuĩsmakẽ habetã ẽ hãtxa ẽ matu bumai uĩrakãwẽ. Nukũ Epa Deusũ hau matu unãnuma hiwemakĩ duawakĩ hau matu xinã txãkãwãkubainũwẽ.

Jesus Cristo ikũwaĩbu Paulõ hatu xinãkĩ hatuwẽ taeshũ kẽwãkĩ Deus hatu ea ashũkubainikiaki, na hãtxarã

³ Matukiri xinãkĩ nukũ Shanẽ Ibu Jesus Cristõ Epa Deusbe hãtxakĩ matu yukashũkĩ nũ matukiri kẽwãkubaĩmiski.

⁴ Matukiria kaka huai ẽ nĩkamiski, mã Jesus Cristo ikũwaĩ nukubetã ikũwaĩbu betsa hatube abunamei mã hatuwẽ nuimis nĩkairã.

⁵ Mã haskairã, Jesus Cristokiri kakape txanima nĩkatã benimakĩ matũ hiwea nai anu Deus anu mã haya mã manakaibu nũ matu unaiĩ.

⁶ Haska inũ, mai hirabi anushũ Deusũ kakape hawẽ bakekiri nĩkatã ikũwãbauni pakĩ yurabũ hatu uĩmabaunaibu keskai mã ikairã, txanima habias habiaskari matu anuri tashniai mã hayaniki, haska Deus duapakiri hãtxaibu nĩkai: “Txanimaki”, itã mã ikũwãniburã.

⁷ Mã haska ikaiburã, nukũ haibuhaira Epafrasĩ nuku keska Cristõ tsuma nukube dayakĩ matu anushũ txĩtuãma matu nuku yusĩshũkubaĩmis

⁸ hatũ matukiria kaka beshũ nuku yuikĩ haska Yushĩ Pepatũ matu merabewakĩ amai mã abunamei nuiaibu nukuki txanixinaki.

⁹ Haskawẽ taea mã abunameaikiri nĩkatã Deusbe hãtxakĩ nũ matu yukakĩ heneshuĩsmaki, Deusũ hau hawẽ xinã shabakabi matu unãmakĩ haskai unãnepati tibi inũ nĩkati xara matu wamakĩ hawẽ Yushĩ Pepatũ hau matu inãmakĩ unãmakubainunã.

¹⁰ Mã haska habũ nukũ Shanẽ Ibu txibaĩbunã, haskai hiwekĩ haska abuai benimawakĩ ashũkubaĩkãwẽ. Haskakĩ yura betsabu uĩmakĩ hawara daya pepa betsa betsapa akĩ Deuskiri tapĩ unãnepai ewakubaĩkãwẽ.

¹¹ Haska inũ, eska ẽ matu yukashũmiski. Deusũ hawẽ kuxipa paepawẽ hau matu mestẽwanũwẽ. Haska kuxipa mã hayawẽ taeshũ hamapai bika tenebiai kuxipatã hĩ hĩ ikama inũ benimakĩ

¹² Epa Deus kẽwãkubaĩkãwẽ. Hatũ matu katunishũ ikũwaĩbu dasibibube nuku mekekubaĩkĩ nai anushũ hawara nukuki tanani nuku inãkuĩa hawẽ shabaki pesetã nũ bishãkanaii.

¹³ Uatiã nũ Deus unãma mexu txakabũ nuku tsumabiakẽ Deusũ nuku putamaniki, hawẽ bake ha abuaitũ hawẽ shanẽ anu nuku iyukinã.

¹⁴ Cristo mawakĩ Satanásã nuku tsumani hawena wakĩ nuku mebikinãtã nukũ txakabu nuku buashuniki, ana xinãmarã.

Cristo nuku mawashuniwẽ taeshũ Deusũ hawenabu hawẽ meketi wanikiaki, na hãtxarã

¹⁵ Deus tsuã uĩtirumabiakẽ Cristo ha itsa shabakabi uĩkubainibuki. Hawa dasibi dami wariama hawẽ bake kayabi bestitxai hayaniki.

¹⁶ Cristowenã, Deusũ dasibi nai anua inũ mai anua nũ uĩtiru inũ nũ uĩtiruma yushĩ betsa betsapa kuxipayabu inũ paepabu Cristowẽ damiwanikiaki. Haska damiwakinã, Cristowẽ taeshũ atã Deusũ Cristo hawena wamaniki.

¹⁷ Haska inũ, hamapai betsa betsapa Deusũ damiwariama Cristo hiwepaunikiaki. Hawẽ taeshũ dasibi damiwanishũ pewakĩ keyunishũ heneama mekekubaĩmiski.

¹⁸ Ha dikabi Cristo hawẽ hiweawẽ nukũ Shanẽ Ibushanũ ika kuxipai hawẽ bushkai nuku ishuniki, nũ ikũwaĩbũ hawẽ yura nũ ishanũbunã. Ha dukũ hiweniwẽ taea mawamisbu kuxipa binui ha dukũ mawabu anua besteĩ taekĩ dasibi hatũ dukũ binu keyuniki.

¹⁹ Deusũ hawẽ bake haska wakinã, ha hawẽ kuxipa inã keyukinã, haki dasibi txiti iyukatsi anikiaki.

²⁰ Haska inũ, Jesus cruzkia mawai hawẽ himi nuku habashuniwẽ taeshũ nukũ txakabu Deusũ buashũ hakimakĩ nuku hakimawatã ana nukuki sinatakatsi ikama Deus nuku daewamakĩ hawẽ haibuaibu nuku wamatã hiweabu mai hirabi anu inũ nai anu Cristoki dasitã hanus nuku shukuwakatsi Deusũ hatu dasibi pewakĩ keyukĩ daewanikiaki, yurabu inũ yurabumarã.

Cristõ Deus nuku daewamanikiaki, na hãtxarã

²¹ Maturã, uatiã hawa unãma matũ xinãnẽ matũ huĩtinĩ txakabu abukĩ akirã, txaihaira hiwea keskashũ Deus mã sinatamapaunibuki.

²² Hamẽ natianã, Deusũ bake Cristo ma huni hawẽ yurawẽ nuitapatã matu mawashũkĩ hawẽ mawawẽ Deus matu daewamashuniki. Haska matu wakinã, hawẽ besuuri hawa txakabuma inũ hawa mexu tsamiama inũ tsua txakabu matuki txanitiruma matu nitxĩkatsi iki matu ishuniki.

²³ Mã haskakatsi ikairã, matu tibirã, Deusũ kakapekiri nĩkatã mã ma Cristo ikũwãni henekĩ putai txĩtuãma huĩti mestẽtã haska mã ikũwaĩbu manakakubaĩkãwẽ. Haska Deusũ hawẽ bakekiri hawẽ kakape yurabu mai pakea itxapa anuabũ hau unãnũbũ yusĩkĩ ea ẽ Paulõ ẽ hatu merabewakubaũmiski.

Paulõ ikũwaĩbu uĩyamabia hatukiri nuikũkainikiaki, na hãtxarã

²⁴ Natiã matuwẽ taea nuitapairã, ẽ benimaii. Hau hawẽ taea nũ bika tenekũkaĩshanũ Cristõ nuku yunutã ha dukũ txanima hawẽ yurawẽ ha ikũwãshanaibu merabewanũ ika hatu bika teneshũkĩ haskawẽ taea eari ibubis ẽ yurawẽ menei ẽ ishũriaii, mã ha ikũwaĩbuwẽ taearã.

²⁵ Ha inũ, Deusũ hãtxarã, dasibi hiwebaunabu ẽ hatu yuikubaũshanũ ea katutã ea yununi haskawẽ taea mã Cristo ikũwaĩbu matuwẽ nuikĩ ẽ matu merabewakubaĩshanũ Deusũ hawẽ tsuma ea matu washuniki.

²⁶ Na haska ẽ matu yuiairã, Deusũ hawẽ kakape Cristokiri bari itxapahaira huneni yura betsa betsapa bari betsatiã hiwekubiranibu hatu yusĩama hunenishũ natiã habu Cristowẽ Deusũ meribi hatu wairã, Deusunã, ma shabakabi nuku uĩmaikiki.

²⁷ Tsuabura mã judeubuma Deusũ hawẽ xinã duapa haska bebũkiri Cristokiri yubakabiatã huneni ha shabakabi wakĩ matu unãmakatsis ikikiki, hau mai hirabi anuabũ matũri mã unãnũbũ haska ha hawẽ xinã dasibikiri hunenirã, harã, Cristo aniki. Haska matũri mã Cristo ikũwaĩwẽ taea mã judeubumabia Cristo ma matuki dasiaki. Haska inũ, nai anu Deusũ mae pepahaira anu Deus inũ Cristobe maturi mã hiweshanaii, mã haskakiri xinãkĩ manakaiburã.

²⁸ Haska Cristokiri matuki txanikĩ matu yusĩkĩ nema pewakĩ dasibi matu unãnepa wakĩ haska Cristo bebũ mã pepa mapushanũbũ nũ matu yusĩmiski.

²⁹ Na haska matukiri dayairã, Cristõ hawẽ kuxipa ea inãni ẽ hawẽ dayatxakayamashũmiski.