Apocalipse 17 - Kaxinawá Bíblia (BR)

Mae ewapa betsa aĩbu hininipa keska Deusũ kupishanikiaki, na hãtxarã

¹ Hanushũ ha sete nai tsumabu betsã sete kẽtxaki Deus sinatamis mata tsuma hushũ ea yuikĩ: “Neri huwe, aĩbu hininipa henewã nemaki tsauwa ẽ kupiai ẽ mia uĩmairã.

² Mai hirabi anu shanẽ ibubu hawẽ kemui habe txutanamei keskai ma habe beyabuki. Haska inũ, yuraburi mai hirabi anuaburi Deus kayabi ikũwãma hamẽ yushĩ betsa betsapa ikũwaĩ hawẽ kemui txutai keskai habũ kemu paewẽ hawẽ paẽa keskabuki. Uĩwẽ”, iwanã,

³ hanua ha nai tsuma ha ẽ yushĩki nukushũ nama keskawẽ ea uĩmaitũ hanu tsua hiweabuma anu ea iyua harishũ uĩkĩ aĩbu betsa yuinaka mese atimapahaira taxipaki katsaumea ẽ uĩshuki. Ha yuinakarã, sete bushkaya inũ dez mashũyã inũ Deuski shetxakati kena haki yabukuaki.

⁴ Ha inũ, ha aĩburã, tari taxipa ushna duakabi inũ taxipahaira sawea inũ, hawẽ hawẽruai daukĩ ouro mane inũ, nẽkati mane hawẽrua karuhaira sawea inũ, txuri mane pérola hushupa karuhairari saweatũ hamapai pepa danaĩ hawẽ atimapamis kẽtxaki tsuma haya

⁵ inũ, hawẽ betũkuki hawẽ hunea kena kenea: “Babilônia mae ewapa mesehaira ea ẽ hatũ ibu hininipaki. Ea anu aĩbu hininipa dasibi inũ hamapai xarabu mai hirabi anushũ pepa danãkĩ txakabuwamisbu hiweabuki”, ika netãki.

⁶ Haska inũ, Jesus txibãkĩ hawẽ hãtxa yusĩmisbu mirimabu ha aĩbu hininipa itsa mae ewapa Babilônia anuabũ hatu tenãshũ habũ himi akai keska paẽa haskai uĩkĩ xinaĩ e iki teku itã ẽ pes nikẽ

⁷ nai tsumã ea yuikĩ: “Haskai e iki mĩ hawẽ dateai? Ha aĩbu inũ ha yuinaka atimapa mese sete bushkaya inũ dez mashũyã aĩbu haki tsauwa ha dabekiri hunea shabakabi mia yuinũ nĩkawe.

⁸ Yuinaka mese atimapahaira mĩ uĩshurã, bebũkiri hiwebiani natiã ana hiwea hayamabia haskabia ana hawẽ henei Deus kupimakĩ keyumayui kini keyatapa shãkĩhaira anua mapekei tashnia Deusũ yamawashanikiki. Haskakiranai mai damiwaitiã tsuabura Deusbe hiwekuĩshanaibu unaki Deusũ habũ kena netãma ini yuinaka mese atimapahaira mawabiani ana ũ unuatiã hiwea mapekea habũ uĩkĩ yui: ‘Habaa! Hawamẽ?’ ishãkanikiki.

⁹ Ha yuinaka mese atimapahairakiri unãnepa bestibũ xinãkĩ unãtirubuki. Hawẽ sete bushka unãtirã, sete mati Roma anuki, haki aĩbu tsauwa unãtirã. Ha dikabi hawẽ sete bushkarã, sete shanẽ ibu hawẽ unãtiriki.

¹⁰ Ha inũ, cinco shanẽ ibu ma mawanibuki. Hakia betsa natiã shanẽ ibuikiki. Ha inũ, betsa shanẽ ibunũ ika huriamaki. Hanua ha hawẽ henea shanẽ ibui huarã, hatishuĩra bari itxapa shanẽ ibuama ishanikiki.

¹¹ Ha inũ, ha yuinaka mese atimapahaira ha shanẽ ibu sete betsa ibiani ha dukũ hiwebiani natiã ana hayamabia ana hiwea ha oitavo shanẽ ibu ishanikiki. Hakia atimas ha yuinaka mese atimapahaira hawẽ henekĩ Deusũ kupikĩ yamawashanikiki, niti akamarã.

¹² Ha inũ, ha dez mashũ mĩ uĩshurã, dez shanẽ ibubu betsaki. Habu shanẽ ibui taeriabumabiakẽ yuinaka mese atimapa shanẽ ibukĩ hawẽ kuxipa hatu yunutã usha eskarabes ha dez habe shanẽ ibumashanikiki.

¹³ Ha inũ, ha dez shanẽ ibunã, habe shanẽ ibukĩ yuinaka mese atimapã habias hawẽ xinã ashũkĩ merabewakĩ hawẽ yunuti txibãkĩ

¹⁴ txashuwã bakebe detenameshãkanikiki. Hakia txashuwã bake Jesus Cristo dasibi shanẽ ibubu inũ dasibi yununikabu binukĩ keyumiswẽ taeshũ habu Deusũ katushũ hatu kenani txĩtuĩsbumabetã ha dez shanẽ ibubu maemashãkanikiki, nukũ Shanẽ Ibu Jesus Cristobetanã”, ea watã

¹⁵ ha dikabi nai tsumã ana betsa ea yuikĩ: “Ha henewã namaki aĩbu hininipa tsauwa mĩ uĩshurã, ha mae tibi anu hiwebaunabu inũ, yura tibibu inũ, hãtxa betsa betsapa yuiaibu inũ, mai pakea itxapaki.

¹⁶ Ha inũ, ha dez mashũ shanẽ ibubu inũ ha yuinaka mese atimapahairatũ ha aĩbu hininipa itxakawakĩ hawẽ kuxipa danãkĩ hamapai hawẽrua haya yamawakĩ ana hawẽ nuiama henekĩ nuitapawakĩ hawẽ nami pikĩ keyutã hawẽ shau kuashãkanikiki.

¹⁷ Ha inũ, ha dez shanẽ ibubunã, ha yuinaka mese merabewakĩ habũ kuxipa inãkĩ habũ hawẽ yunua txibãkatsis ikĩ haska Deusũ hatu haska wamakatsis ikai hatũ huĩti merã hatu xinãmaya haska yubakani menemakĩ Deusũ hatu amakubaĩshanikiki.

¹⁸ Ha inũ, ha aĩbu hininipa mĩ uĩshurã, ha mae ewapaki, shanẽ ibu kuxipa tibi yunumisrã”, ea washuki.