Amós 8 - Kaxinawá Bíblia (BR)

Israelĩ enabu hatũ txakabuwẽ ma bimi hushĩhaira keskanibukiaki, na hãtxarã

¹ Hanushũ Mekenika Senhor Jeová ana betsa ea uĩmashina matu yuinũ ea nĩkakãwẽ. Kukiki bimi hushĩhaira mata tsaua ẽ uiãyã

² Senhor Deusũ ea yukakĩ: —Amósĩ, mĩ hawa uiaĩ?— ea wa eã kemakĩ yuikĩ: —Kukiki bimi hushĩhaira mata tsaua ẽ uiaiĩ— ẽ wa Senhor Deusũ ea yuikĩ: —Israelĩ enabu hatũ txakabuwenã, ma bimi hushĩhaira keskabuki. Hatũ txakabu tere akĩ ẽ ana besti wakĩ hatu buashũkatsi ikamahairaki.

³ Ha shabatiã Deus kẽwãti hiwe hemaĩtĩ anua kẽwaĩ kãtabiai betsatani bis bis ibaunaibu ha yurabu mirima hatu tenã keyuabu tsuãra hune hatũ yura sharabaĩbaĩkĩ hatu urẽshãkanikiki— ea akĩ Senhor Jeová hawẽ hãtxa mestẽwãshinaki.

Israelĩ enabu hanu hatu kupishanai ma kemaikiaki, na hãtxarã

⁴ Hawa hayabuma nuitapabiaibũ matũ mai anushũ ana hatu itxakawakĩ mã hatu txakabuwamisbuũ, ea nĩkakãwẽ.

⁵ Matubunã, eska yui mã hãtxamiski: “Ushe bena hanu besiti binukainaya nukũ shekiwã trigo hatu inãkĩ pei itxapa bikatsi ikĩ nũ hatu inãkubaĩtiruki. Hanua huĩrukũti shaba binukainaya hawẽ tanati pishta inũ hawẽ shãkama unãti txakabuwẽ hawẽ karu shekatã nũ hatu inãkubaĩtiruki.

⁶ Nuitapaibũ nuku diriabu hawẽ taeshũ pei bikatsi dayaru escravo hau hatu wanũbũ hatu inãkĩ nuku diriabu nũ hatu inã hawẽ nuku pakatirubuki, bitxi tae besti nuku diribiakenã. Ha dikabi shekiwã trigo deshka txakabubiakẽ hari nũ hatu inãriashanaii, pei bikinã”, ikĩ mã shinã txakakubaĩmisbuki.

⁷ “Haska mã txakabuwakubaĩmisbu ẽ hawa hakima taskama ishanaii, ea ẽ Jacó Deus ibubis matukiri ẽ yubakaii”, iki matukiri Senhor Deus hãtxaimaki.

⁸ Bari tibi Egito anu ha henewã ewapa Nilo bai matatã netsutãtãmis keskai mai patxa sakui mai namanua inatã hanua ana maĩ butuaya dasibi hiwebaunabu kasha txakayamashãkanikiki, datehairairã.

⁹ Senhor Deusũ hawẽ hãtxa mestẽwãkĩ yuikĩ: “Ha shabatiã bari mananãbi txashabia bari ibubis nukai mai hirabi meshũ atxi keyushanikiki.

¹⁰ Mã besiaibutiã hanu ẽ matu tenãyã mã bis bis ishanai inũ mã kãtai matu betsa wakĩ mawa beabu mã kasha txakayamashanaii. Minabu mawabuwẽ nui hawẽ punu nuka hawẽ unãmati besha tari sawea nui tenehairai mashtekei mã mawerẽ ishãkanaii. Matũ huni bake bestitxai mawakẽ ana hania bitima nui kasha txakayamai keskai dasibi huĩti nishmai keyushãkanikiki.

¹¹ Mai hirabi anu buni pae ẽ yunushanai ma kemaikiki”, iwanã, hawẽ hãtxa ana mestẽwãkĩ yuikĩ: “Ha shaba haskaitianã, piti kayabiwẽ buniama ũpash kayabi manuama hakia ẽ hãtxa nĩkakatsis ishãkanikiki.

¹² Ẽ hãtxa benai yurabu harakiri kai unãbuma berutubauni ianẽwã itamamahairakiri bui inũ, henewã kesha betsauri bui inũ, nortekiri bui inũ, bari huaikiri bubia hakia hania ẽ hãtxaki nukutirubumahaira ishãkanikiki.

¹³ Habiatiãri txipash hawẽruabu inũ berunã kushipabu ũpash manuhairai unãyamasi shinaneshãkanikiki.

¹⁴ Samaria anua yushibubu dami tsuabũra mã yubamisbuki. Hanua tsuabura yubakai hãtxairã, Dã anu hiweabu matũ yushibũ hiweawẽ mã yubakamisbuki. Hanua Berseba anu yushibubu hiweabuwẽ mã yubakakubaĩmisbu mawai mã di ishanaii, ana haskatã mã benitirubumarã”, akĩ txanima hãtxa Senhor Deusũ ea yuishinaki.