Amós 7 - Kaxinawá Bíblia (BR)

Shinĩ txakabuwashanaibu nama keskawẽ Senhor Deusũ Amós uĩmanikiaki, na hãtxarã

¹ Eska Senhor Jeová ea uĩmashinaki. Matu yuinũ ea nĩkakãwẽ. Shanẽ ibuhairatũ inabũ basi pishanaibu hatu urushũbiashina ha basi ana beneaitiã Senhor Deusũ shini mirimahaira dami wai ẽ uiãyã

² shini beshũ basi pikubaĩkĩ hawẽ henekĩ piaibũ eã yuikĩ: —Senhor Jeovaã, nukũ txakabu nuku buashũwẽ! Jacó enabu nũ itxapamawẽ taeshũ hatitũ nũ tenetirubumaki, debui keyukinã— ẽ wa

³ hanushũ ea kemakĩ yuikĩ: —Haska shinãkĩ mĩ ea yuiairã, ẽ ana haska kaĩmama ishanaii— akĩ hawẽ kupiti Senhor Deusũ heneshinaki.

Txĩ txakabuwashanai nama keskawẽ Senhor Jeová Amós uĩmanikiaki, na hãtxarã

⁴ Eskari Senhor Jeová ea uĩmashinaki. Matu ana yuinũ ea nĩkakãwẽ. Kupikĩ txi here kuhairai Senhor Jeová yunua bekĩ mai uke meranua hene netsukĩ tsusĩwãkĩ tashka wakĩ keyushũ yunu bai anua dikabi tsusĩwãkĩ keyukubainaya uĩkĩ

⁵ eã yuikĩ: —Senhor Jeovaã, nukuwẽ nuikĩ menaã, neri iweama habiari niti awe! Jacó enabu nũ itxapamawẽ taeshũ ha txi nũ betsistirubumaki, debui keyukinã— ẽ wa

⁶ hanushũ ea ana kemakĩ yuikĩ: —Haska shinãkĩ mĩ ea yuiairã, ha dikabi ẽ ana haska kaĩmama ishanaii— akĩ hawẽ kupiti Senhor Jeová heneshinaki.

Dispiki prumo dunuawẽ hawẽ yushtu unãti nama keskawẽ Senhor Deusũ Amós uĩmanikiaki, na hãtxarã

⁷ Eskari Senhor Deusũ ea uĩmashinaki. Matu ana yuinũ ea nĩkakãwẽ. Maewã mishki kenebaunibu dapi Senhor Deus nia dispiki prumo dunuawẽ mishki kenebaunikatũ hawẽ daya yushtuma pemẽkaĩ, iwanã, unãti hawẽ mekẽwẽ tsumashũ dũtãshũ

⁸ Senhor Deusũ ea yukakĩ: —Amósĩ, ẽ mekẽ anua hawa mĩ uiaĩ?— ea wa eã kemakĩ yuikĩ: —Hawẽ nitxĩ yushtumawati unãti mĩ hayaki— ẽ wa hanushũ ea yuikĩ: —Na nitxĩ pemẽkaĩ, iwanã, unãtiwẽ enabu Israelburã, haska hatũ shinã pewẽ hiwekubaĩkanimẽkaĩ, iwanã, ẽ hatu unãti wakubaĩshanaii. Hatũ txakabu tere akĩ ẽ ana hatu buashunama ishanaii.

⁹ Hanushũ Isaque enabũ ha tari hiwe merãshũ ea kẽwãpaunibu yamawakĩ hatu keyumatã hanushũ Israelĩ enabu nortekiri hiweabũ hatũ mekenika yushibubu kẽwãti hiwe betsa betsapa hatu txakabuwamakĩ keyumatã heneshãkanikiki. Haska wakĩ Jeroboãonẽ enabuki sinatakĩ nupe txaipawẽ hatu deteshãkanikiki— inikiaki.

Amaziasĩ Amós yunukĩ ha anikiaki, na hãtxarã

^10-11 Betel anushũ Amazias hawenabu Deusbe hãtxashunikatũ Samaria anu Israelĩ enabu shanẽ ibuhaira Jeroboão anu hãtxa bumakĩ yuikĩ: “Israelĩ enabu hiwebaunabu namakis anu Amós nikaũkĩ mikiri txanikĩ mia deteshanaibu yuikubaũkĩ hatu yuikĩ: ‘Nupe txaipa kenuhairawẽ matũ shanẽ ibuhaira Jeroboão detetã mã Israelĩ enabu dasibi txaihaira anu matu iyushãkanikiki, ana haska txĩtũbirãtirubumarã’, akĩ yuikubaunai has hãtxa yuiai nĩkakĩ ana tenetirubumakiaki”, ashũ hãtxa bunika yunua hawẽ hãtxa bushũ

¹² hanushũ hawaira Amós kena hua ha bebũ nia Amaziasĩ Amós yuikĩ: —Deusũ hãtxa yuishunikaã, nenua nuku henebaini Judá enabu anu menã kariwe. Deusũ hãtxa yuishũkubaini hari hiwea dayakĩ mĩ hamapai bikubaĩritãwẽ.

¹³ Ha inũ, na kẽwãti hiwe anu nukunabu dasibi bebirã bebirãmisbuwẽ taea hanua ana haska ishanai hatu yui hãtxayamawe. Hakia nenu nukũ shanẽ ibuhairatũ mae Betel anushũ nuku yunuai anurã, tari hawẽ kẽwãti hiwe meribi nũ hayaki— aka

¹⁴ hakia Amósĩ kemakĩ yuikĩ: —Earã, ẽ Deusũ hãtxa yuishunikamaki. Ha inũ, ibubis ẽ haska yuitirumariki. Hakia earã, ẽ Deusũ hãtxa yuishunikatũ bakemariki. Hamẽ ha dayakĩ ẽ hamapai ẽ bimisrã, txashuwã mekekubaĩkĩ inũ figo ni meranua hawẽ bimi tsekakubaini ẽ hawẽ hiwekũkainimaki.

¹⁵ Hakia habiatiãri txashuwã ẽ mekebiakẽ Senhor Deusũ ea henematã ea yuikĩ: “Enabu Israelbu norte anu hiweabu anu kashũ ẽ kushipawẽ ẽ hãtxa ea hatu yuishũkubaĩtãwẽ”, iwanã, ea nitxĩmaki.

¹⁶ Haskawẽ taeshũ Senhor Deusũ hãtxa mia yuinũ nĩkawe. Miã ea yuikĩ: “Israelĩ enabukiri txakabu yuikĩ Deus hãtxashũyamawe. Ha dikabi Isaque enabukiri hatu yuãyamawe”, mĩ ea wabia

¹⁷ eska Senhor Deusũ mia yuikĩ: “Mĩ aĩ maewã anua shabakabi hininipai txutanamekũkaĩshanikiki. Mĩ huni bakebu inũ mĩ aĩbu bakebu nupe txaipa kenupawẽ detekĩ hatu tenãshãkanikiki. Mĩ bai inũ mĩ inabu inũ minabu betsa betsapa dasibi shau sẽke númeroya urẽkĩ hawẽ unãtã hatu pashkakĩ bishãkanikiki. Miarã, txaihaira anu mia iyuabu hanushũ Senhor Deus ikũwãbuma anua mĩ mawashanaii. Minabu Israelĩ enabu atxishũ txaihaira anu hatu iyushãkanikiki, ana haska txĩtũbirãtirubumarã”, akĩ haska shabakabi yuitã kaĩkainikiaki.