Amós 6 - Kaxinawá Bíblia (BR)

Deusũ Israelbu nawabu hatu kupimashanikiaki, na hãtxarã

¹ Sião anu hawa bika teneama mã hiwei pebiamisburã, mã peirashãkãwã! Samaria anu hawa dateama hatuki txiti ika mã hiwebiamisrã, mã peirashãkãwã! Matũ mae shanẽ ibu kushipabu yununikabũ Israelĩ enabũ mã hatu benamisburã, haburã, mã peirariashãkãwã!

² Assíria nawabu maewã Calné anu bushũ uĩtãkãwẽ. Hanua Síria nawabu maewã ewapa hatu binua Hamate anu bushũ hatu uĩriatãkãwẽ. Hanua butubaini bushũ Filisteu nawabũ maewã Gate anu bushũ uĩriatãkãwẽ. Ha nawabu betsa betsapabũ mae matuna keskamabiakẽ mã hatu hawa binuamaki. Hakia matũ mai pakearã, hatũ mai pakeatunã, matunarã, binuamaki. Ha mai pakea tibi hawa dasibi pemaki.

³ Senhor Deusũ hanu matu kupiai shaba txakabu hubiashanaya haskakiri mã shinãkatsi ikamaki. Haskai hiwetimabiakẽ txakabu matũ shanẽ ibu keska wakĩ mã txakabu mese besti pa waii.

⁴ Hanushũ piti itxapa washũ pi elefante makushpi mabu wati benibuwẽ hawẽ dakati hawẽruahaira wanibu hanu bashti itã dakai petã txashuwã bake inũ ina awã bake shua nami matu shuishunabu beyuskĩ mã pikubaĩmisbuki.

⁵ Mimawati betsa betsapa Davĩ ani keska hatu amatã Davĩ mawani keska wama unãmabia unanumas teperewe mã mawa pewaismaki.

⁶ Kẽtxa ewapabuki uva vinho nushukubaĩkĩ mã sheni ininipahaira pepawẽ mã txa iake iakemisbubia matũ mai pakea inũ matunabu txakabuwatirubu hatuwẽ nuiti mã hatukiri shinãkubaĩsmaki.

⁷ Besi watã pitĩ kayãwãshũ pi mã hãtxahairabiamis matu nesewabaĩkĩ matubu dukũ atxishũ nawa detenamenikabũ txaihaira anu matu iyushãkanikiki, haria mã ana txĩtũkirãtirumarã.

⁸ Nukũ Deus kushipahaira dasibi binua Senhor Jeová ibubis hãtxakĩ eska ea yuishinaki: “Jacó enabu ibubis kẽkubainaibu danaĩ ẽ hatuki sinatahairakũkainaii. Hatũ hiwe ewapa hawẽrua betsa betsapa tibi betxipaiama hatũ maewã inũ hawara dasibi haya hatuki sinataibu yunukĩ dasibi hatu inãkĩ hatu atximatã ẽ hatu ibu wamashanaii”, ikĩ hawẽ hãtxa mestẽwãshinaki.

^9-11 Hiwe ewapa hawẽrua dasibi inũ hiwe ewapabuma dasibi hawenabuyabi hau hatu kupinũbũ Senhor Deusũ hatu yunushanikiki. Dasibi txakabuwakĩ keyushanaibuwẽ taea hiwe bestitxai anu 10 huni hatu teshe washinabu dasibi mawariashãkanikiki. Date paepaibũ hawenabu hiwe betsa anua mawa hawẽ yura binũ ishũ hawenabu betsã hatũ hatu biai yuka ikĩ: “Huni betsa hiwea uke merã mibe hayamẽ?” aka kemakĩ yuikĩ: “Nenu tsua ebe hayamaki”, aka hatũ yuikĩ: “Senhor Deusũ nuku kupiaya hawẽ kena hawa datã akĩ hawa yuiyamawe”, akĩ yuishanikiki.

^12-13 Matubunã, hawa shabakabi unãma benimakĩ yuikĩ: “Nukũ kushipawẽ hatu binukĩ maematã ikis nũ yunuti kushipa hayaki”, mã ibiamis ha hãtxa pepa yuibiakĩ betsa wakĩ tenãti dau keska mã wakubainaii. Ana betsa wakĩ maewakinã, ha yunuti pepa mã hawẽ sinatati txakabu wakubainaii. Kushikaini mishki mati matipa anu cavalo kai hawama ishtxuakeakekaĩtirumẽ? Itirubumahairaki. Hanua ianẽwã ukebukũ tsispukĩ pashkabaĩkĩ tsuã atirumẽ? Atirumahairaki. Haska keskariai Deusũ kupiti mã betsa watirumaki.

¹⁴ Israelĩ enabuũ, eskaki. Shinãkĩ peirawakãwẽ. Mekenika Senhor Deus kushipahaira dasibi binu keyuatũ matu yuikĩ: “Matu itxakawanũ, iwanã, nawa kushipahairabu matu anu eã ẽ hatu iweshanaii. Hamate Norte txaihairakiria bekubirãkĩ sul txaihairakiria anuari beriakĩ matu atxitã dasibi itxakawakĩ harakiri matu nitima washãkanikiki”, akĩ txanima hãtxa Senhor Deusũ ea yuishinaki.