Amós 5 - Kaxinawá Bíblia (BR)

Deus hatuwẽ nuiaiwẽ taea hau ana txĩtunũbũ hatu yuinikiaki, na hãtxarã

¹ Israelĩ enabuũ, ea Amós ẽ hãtxai ea nĩkakãwẽ. Matuwẽ taea nui matukiri habuai ẽ kashai ea nĩkakãwẽ:

² Israelĩ enabu hawẽrua hawa txakabuma pepa besti mã ibianibu mã ibubis atimapai txakabutiani mã txakabuki, tĩ itã haska ana benitiruma keskairã. Tsuã matũ txakabuwẽ taeshũ matu benitiruma matũ mai anu tĩ ikima mã maniabuki.

³ Mã Israelĩ enaburã, eska Mekenika Senhor Jeová matu yuikiki: “Maewã anua ha detenamenikabu 1.000 mã hatu yunuabu bua detenametani txĩtũbiranirã, habu hatu deteama ishiãbu 100 besti hiwea beshãkanikiki. Mae hatiubuma anua 100 detenamenikabu mã hatu yunuabu detenametani 10 besti hiweria txĩtũshãkanikiki”, itã,

^4-5 Senhor Deusũ Israelĩ enabu ana yuikĩ: “Betelrã, txakabuwakĩ yamawakĩ di ashiãbu manishanikiki. Gilgal anu hiweabu tsuã hatu merabewama txaihaira hatu iyushãkanikiki. Haskawẽ taea Betel anu matũ yushibu kẽwaĩ buama inũ Gilgal anu ana hari buamari inũ, Berseba anu ana hari mapuyamashãkãwẽ. Hakia ea benakĩ ẽ hãtxa nĩkai eki dasitã haskai ebe hiwekubaĩshãkanikiki”, akĩ ea yuishinaki.

⁶ Mã hiwekũkaĩkatsis ikairã, Senhor Deus anu txĩtũtã hawẽ hãtxa txibãkĩ ea akubaĩkãwẽ. Hakia mã haska wamakẽ betsatiã txi kushipahaira keska Senhor Deusũ matu anu yunushanikiki, mã Israel hiwebaunabu anurã. Ha inũ, Betel anua ha txi ketikainai tsuã nuka watiruma ishanikiki.

⁷ Maturã, mã peirashãkãwã! Deusũ yunuti kushipa pepa betsa wai mã hawẽ Deus sinatamamisbuki. Yusĩti txanima kayabi betsa wakĩ mã txakabuwakubaĩmisbuki, hawara hawẽ hiweti pepabiakẽ mai anu txaka ureã keska wakinã.

^8-9 Bishi shukuabu hawẽ kena Sete-estrelo inũ Órion dami wakĩ Senhor Deusũ aniki. Hatunã, meshu betsa wakĩ shaba tashnimamiski. Hanushũ ha shaba anua maewakĩ meshuri tashnimariamiski. Ianẽwã anua hau hene inabainũ kena ana inabaĩ niri ikĩ mai anu metxa wakubaĩmiski. Mishki kenebaunibu kushipabiakẽ hatũ hatu di amakĩ ha maewã merã hatũ hiwe kushipa hatu yamawamamisrã, hawẽ kena Senhor Deuski.

¹⁰ Maturã, mã peirakãwã! Deusũ yunuti kushipa pepawẽ matu nemabiaibũ mã hatu danãmiski. Txanima hãtxa yuimisbu hatuki txikishkĩ mã hatu ana nĩkakatsis isbumariki.

¹¹ Nuitapaibũ shekiwã trigo tsekaibu mã hamẽ hatu biãmiski, mae shanẽ ibũ yunuti txibãkĩ hatu yumetsũkĩ hatu pema pema aka keska wakinã. Haskawẽ taea mishki hiwe hawẽrua mã hatu amabiaima anu mã ha merã hiweama ikũkaĩshanaii. Uva bai pepa mã hatu banamabiaima hawẽ bimi tsekatã uva vinho wabiaimabu mã hanushũ hawa akama ikũkaĩshanaii.

¹² Kanekubaĩkĩ matũ txakabu heneama mã akubainai ẽ unãhairaii. Pepabu bika tenemakĩ mã hatu danãkubaĩmisbuki. Hau hatũ txakabu kaka wayamanũbũ hune hatũ pei mã hatu biãmiski. Pepa inũ txakabu mã unãti wanikabu bebũshũ habu nuitapaibũ matu merabe yukabiabu mã hatu pewashũkatsi isbumaki, hawa hatu merabewamarã.

¹³ Mã txakabu wabiakubaĩmisbuwẽ taeshũ unanepabũ hawa matukiri yuikĩ pewashũtiruma pes shũ besti matu uĩtirubuki, matũ shinã txakabu haska washũ matu betsa wamatirubumarã.

¹⁴ Txakabu ana benama pepai hiwekũkainũ ika pepa besti benakubaĩkãwẽ. Mã haskakĩ txanima yuikubainaiburã: “Mekenika Deus kushipahaira dasibi binu keyua Senhor Deusũ nuku merabewamiski”, iwanã, mã shinãmisrã, txanima matu merabewashanikiki.

¹⁵ Danãkinã, txakabu besti akubaĩkãwẽ, pepa besti betxipaikinã. Ha inũ, habũ pepa inũ txakabu unãti wanikabũ hau ana matu itxakawama matu pe bestiwẽ manakushũkubainũbũ hatu uĩrakubaĩkãwẽ. Hamẽ mã haskaibu mã Israelĩ enabu nortekiria matu teshewabainimaburã, Mekenika Deus kushipahaira dasibi binu keyua Senhor Deus matuwẽ ana nuikĩ matu merabewatirumẽkaĩ.

^16-17 Eska Mekenika Deus kushipahaira dasibi binu keyua Senhor Deusũ matu yuikiki: “Hanu kupinũ ika ẽ huai anu hemaĩtĩ hanu itxa huĩrukũmisbu shaba tibi anua datei kashabaunaibũ mae bai tibi anua mapua kashai bis bis ibaunaibũ hatũ yunu bai anu dayaibu haburi itxatã kashaibũ peiwẽ taea hatu kashashuni bis bis imisbu haburi datei kasha txakayamaibũ uva bai anu dayaibu kashariashãkanikiki”, akĩ haska Senhor Deusũ ea yuishinaki.

¹⁸ Matũ Shanẽ Ibu Senhor Deus ha shabatiã hanu hushanai uĩkatsis iki mã mana txakayamabiairã, mã peirashãkãwã! Ha shabatiã hanu haskakirãshanairã, mã unaĩ? Ha haskaitianã, meshu keska txakabu besti ishanikiki, hawa shaba pepa hayamarã.

¹⁹ Huni betsã inu betsa leão betxibaini pashabiai unuria yuinaka pubẽ urso huaiki bepusia keska ishanikiki. Hanua betsa ikirã, hawẽ hiwe anu hikitã dunu hawẽ dĩtuki tsamia haki tabiai pia keska ishanikiki. Haska dasibi mese betsa betsapa kaĩshanikiki.

²⁰ Txanima hanu Senhor Deus hushanaitianã, hawa shaba hayama, meshu tẽ ikai keska besti ishanikiki, hawa pemarã.

²¹ Mã eskamisbu Senhor Deusũ matu ana yuikĩ: “Haska ea kẽwaĩ besikũkaĩkĩ mã txakabuwakubainairã, harã, ẽ danaiĩ. Itxai petã mã ea kẽwãbiakĩ hawẽ hiwekaĩkĩ mã ea benimawaismaki.

²² Yuinaka sheni inũ shekiwã trigo duru kuakĩ mã hawẽ ea duawakĩ kẽwãkatsis ibiaya ẽ ana ha betxipaiamaki. Ea ana daewanũ ishũ ina awa bake shuarãwã tesẽshũ hawẽ yura hirabi mã ea menu keyubiashuna hawẽ nue danãkĩ ẽ ana hakiri pe shinãma ishanaii.

²³ Ha mã ea kẽwaĩ kãtai matũ hui kaiainã, ea nĩkamai ikama hamakiri besua ikãwẽ. Ha matũ mimawati harpa hui kaiainã, ẽ nĩkakatsi ikamariki.

²⁴ Matu anua ẽ yunuti pepa kaiaĩ ẽ matu uĩkatsis ikaii, hene habai heneisma keskarã. Huni pepakĩ mã ana hatu parãbuma ẽ matu uĩkatsis iriaii, matũ pepa txatxa ũpash hawa netsuisma keskarã.

²⁵ Israelĩ enabuũ, ea nĩkakãwẽ. Hanu tsua hiweabuma anu 40 ano hiwekubaũkinã, matũ shenipabunã, hatũ inãkuĩ tibi inũ hatũ inabũ sheni ea kuashũkĩ habũ ea kẽwãpaunibumẽ? Ea haska washunaibu ẽ uiãma ikũkiraniki.

²⁶ Hakia na eskatiã matubunã, habũ dami wani matũ shanẽ ibuhaira Moloquẽ dami inũ bishi Quium dami, yushibubu damirã, hawa heneama hune bekubiranibuki. Matubunã, habias keskari mã shinãkubainaiwẽ taeshũ

²⁷ Damasco uke betsauri txaihaira anu ẽ matu hatu iyumakubaĩshanaii, ana haria txĩtũkirãtimawakinã”, akĩ Mekenika Deus kushipahaira dasibi binu keyuatũ ea yuishinaki, hawẽ kena Senhor Deusũnã.