Amós 4 - Kaxinawá Bíblia (BR)

¹ Mã Samaria anua aĩbuaibu hawẽruabu mã Basã anu ina awa yushã shuarãwã keskabuũ, ea nĩkakãwẽ. Nuitapabiaibu hatu bika tenemakĩ hawa hayamabiabũ mã hatu itxakawakubaĩmisbuki. Hanushũ paenũ ishũ matũ benebũ hau uva vinho matu bishũtanũbũ mã hatu yunukubaĩmisbuki.

² Mekenika Senhor Jeová meribi hiweatũ matukiri yubakĩ yuikĩ: “Sheamati betãti watã matu hawẽ atxishũ matũ bakeburi sheamati ewapawẽ betãtã matu dasibi iyushanaibu ma txaima bea kemakanikiki.

³ Matũ maewã mishki kenebaunibu beshpa anu matu kekũtã kaĩmabaĩkĩ iyushũ Mati Hermom anu matu urẽshãkanikiki”, ikĩ Senhor Deusũ hawẽ hãtxa txanima mestẽwanikiaki.

Deusũ Israelbu hatu kupibiakubaina hawa tapĩkatsi isbumakiaki, na hãtxarã

⁴ Senhor Deusũ ana hatu yuikĩ: “Betel inũ Gilgal mae meribi anu hari ana buritãtãkãwẽ. Matũ shenipabu ẽ yusini hãtxa danãkĩ ea sinatamakĩ txakabui mã pikuhairakũkainaii. Penama tibi matũ mekenika yushibubu hawẽ daewati nami sheniya bushũ hatu kuashũkĩ shaba dabe inũ besti tibi matũ dízimos hatu inãrikubaĩkãwẽ.

⁵ Hawẽ benimawati misi shasha watiuma txi tapu anushũ matũ yushibu dami hatu menushũriakubaĩkãwẽ. Mae tibi anu tsuabũra hau hatũ inãkuĩti beshunũbũ hatu banabimarikubaũtãkãwẽ. Haska mã betxipaikĩ amis besti shinãkĩ arikubaĩkãwẽ, ẽ hãtxa mã nĩkaismarã”, akĩ Senhor Jeová hawẽ hãtxa txanima mestẽwanikiaki.

⁶ Senhor Deusũ ana hatu yuikĩ: “Matũ maewã tibi anua ẽ matu buni tenemaimaki. Matũ mae tibi anuari matũ piti keyukĩ ẽ yamawaimaki. Hakia ẽ matu haska wabia hawa shinã betsa watã ea shinaĩ ea anu mã txĩtuãma ikubainimabuki”, akĩ Senhor Deusũ hawẽ hãtxa txanima mestẽwanikiaki.

⁷ Ana yuikĩ: “Ha dikabi shekiwã trigo tsekariabuma ushe dabe inũ bestitiã taewakĩ ui ẽ yunuama ikũkainimaki. Maewã betsa anu ui imakĩ hakia maewã betsa anuri ui imakĩ ẽ yunuama ikimaki. Hatũ yunu bai betsa anu ui imakĩ hakia yunu bai betsa anu ui yunuama ẽ tsusĩwãkĩ keyuimaki.

⁸ Ha yurabu hatũ maewã anu ũpash hayamakẽ maewã betsa anua ũpash betxinũ ika benai bukubaũkĩ ũpash eskarabes betxibiabu ha ũpash manukĩ abiabu ũpash itxapamawẽ taea hawa ũpash manuaibu hatu maĩwãma ikimaki. Hakia ẽ matu haska wabia hawa shinã betsa watã ea shinaĩ ea anu mã txĩtuãma ikubainimabuki”, akĩ Senhor Deusũ hawẽ hãtxa txanima mestẽwanikiaki.

⁹ Senhor Deusũ ana yuikĩ: “Niwe kushipahaira inũ isĩ betsa betsapawẽ ẽ matu datekubainimaki, kusha kusha aka keska wakinã. Matũ yunu bai inũ matũ uva bai utsi wakĩ matũ figueira hi inũ matũ oliva hi shinĩ hau pikĩ keyunũbũ ẽ hatu yunuimaki. Hakia ẽ matu haska wabia hawa shinã betsa watã ea shinaĩ ea anu mã txĩtuãma ikubainimabuki”, akĩ Senhor Deusũ hawẽ hãtxa txanima mestẽwanikiaki.

¹⁰ Senhor Deusũ ana yuikĩ: “Haska Egito anu atimapa betsa betsapa ẽ hatu yununi keska wakĩ isĩ betsa paepa matu anu ẽ yunuimaki. Matuki sinataibube detenamei matũ bake berunãbu hau mawanũbũ ẽ hatu heneimaki, hatu merabewamarã. Matuki sinataibũ matũ cavalo itxapa matu biãtã matu buaĩbu ẽ hawa matu nemashunama ikimaki. Detenamei mawashinabu txapui pisi maiai matũ hiwe tibi anushũ ẽ matu shetemaimaki. Hakia ẽ matu haska wabia hawa shinã betsa watã ea shinaĩ ea anu mã txĩtuãma ikubainimabuki”, akĩ Senhor Deusũ hawẽ hãtxa txanima mestẽwanikiaki.

¹¹ Ana yuikĩ: “Haska Sodoma inũ Gomorra nawabu ẽ hatu kupini keska wakĩ matu txakabuhairawakĩ matu yamawabiakĩ ẽ matu keyuama ikũkainimaki, karu menui keyui tsistekainai anua matu neshekĩ akawakinã. Hakia ẽ matu haska wabia hawa shinã betsa watã ea shinaĩ ea anu mã txĩtuãma ikubainimabuki”, akĩ Senhor Deusũ hawẽ hãtxa txanima mestẽwanikiaki.

¹² Ana yuikĩ: “Mã Israelĩ enaburã, eanã, ẽ maturi kupikatsis ikaii. Ẽ matu haska washanaiwẽ taea ẽ matũ Mekenika Deus matuki sinatakĩ ẽ matu kupishanaiwẽ taeshũ haska mã teneshanai bebũkiri shinaĩrakubaĩkãwẽ”, akĩ Senhor Deusũ ea yuishina nĩkairakãwẽ.

¹³ Senhor Deusũ mati matipa wamis inũ, niwe shũku imamis inũ, haska yubakani yurabu unãmamis inũ, shababiakẽ hatũ betsa wakĩ meshu maewamis inũ, mai dasibi anu mati keyatapahaira tibi anu nikaũmisrã, hawẽ kenarã, Mekenika Deus kushipahaira dasibi binu keyua Senhor Deuski.