2 Timóteo 4 - Kaxinawá Bíblia (BR)

¹ Epa Deus inũ Jesus Cristo ha shanẽ ibuhairai hawẽ kuxipawẽ hushũ mawabu inũ hiweabu unãti washanaitũ nuku shabakabi uĩaĩbũ ẽ mia yunutxakayamai ea nĩkairawe.

² Eska ẽ mia xinãshunairã, Deusũ hãtxa hatu tapĩmakĩ hawa heneama bari tibi benuama akubaĩwẽ, hanu nĩkakatsis ikĩ nĩka pewaibutiã inũ hanu nĩkakatsi ismabia inũ hanu bika teneaibutianã. Haska wakĩ hatu ikũwãmakĩ hatũ txakabu hatu henemakĩ hatu benimawakĩ hatu yusĩ hĩ hĩ ikama akubaĩwẽ.

³ Txipu bari betsatiã yurabu itxatã yusĩa kayabi ana nĩkakatsi ikabuma ishãkanikiki. Hakia haska habũ nĩkakĩ abuai besti anũ ikaibu hatũ yusĩa pepamabiakẽ hawẽ benimanũ ishũ hawara haska nĩkakatsi ikaibu besti hatu yusĩmanũ ishũ yusĩnã itxapabu hatu yusĩmashãkanikiki,

⁴ Jesus Cristokiri txanima hãtxa henei haki petxitã miyui betsa betsapawẽ besti yusĩaĩbu txibãkinã.

⁵ Hamẽ mia ikirã, dasibi mĩ xinãnẽ mekei pekĩ bika tenebiai Jesus Cristokiri kakape datã akĩ hatu yuikĩ daya pepa ẽ mia yunubainai xinã betsa wama hatu yusĩkubaĩshãwẽ.

⁶ Hamẽ earã, natiã ma ẽ yura Jesus Cristo inãkĩ ẽ mawashũshanai ma kemaikiki.

⁷ Earã, Jesus Cristõ soldado pepa detenamekĩ hatu binumis keskakĩ habũ ea itxakawaibu ẽ binuaii. Kuxibaĩkĩ hatu maemakatsis imisbu keskakĩ haska ewẽ Deus yubakani hawa txĩtuãma ẽ ma ishuãki. Ikũwanishũ hawẽ kakapekiri yusĩ bikabiakĩ ẽ hawa heneama ikũkainaii.

⁸ Natiã ẽ dayashũkũkaĩmiswẽ taeshũ haska hayanũ ika ẽ imis ẽ maiti manakuti pepa Deusũ ea mekeshũkubaĩmis bari hawẽ heneaitiã hãtxa pewanika duapatũ Jesus Cristõ ea inãshanai ẽ manaii. Haska wakinã, ea besti inãma dasibi habũ Jesus Cristo ana txĩtũkirãshanai abukĩ manaiburi hatu inãshanikiki.

Paulõ haibuaibũ haskawaibukiri Timóteoki txaninikiaki, na hãtxarã

⁹ Hawa teai bika teneama hawairakirã hushũ ea uĩyuwe.

¹⁰ Demas hawẽ hiweawẽ besti inũ mabuwẽ kemukĩ ea henebaini Tessalônica mae ewapa anu kaxiãki. Crescente Galácia mai pakea anuri kariaxinaki. Tito Dalmácia mai pakea anuri kaxiãki.

¹¹ Lucas besti nenu ebe hiweaki. Hukĩ Marcos benakĩ betxitã iweshãwẽ, mibetã nenushũ ea merabewatirukirã.

¹² Nukũ haibu Tíquico Éfeso anu ẽ yunuyuaii.

¹³ Trôade anu nukũ haibu Carpõ hiwe anu ẽ matsi tari ẽ henebirãyama inũ ẽ una itxapa inũ ha shũska mĩ ha hakimatiruma ẽ una bitxi sebi ewapa ẽ baxibirãyama hukĩ ea keyu beshũshãwẽ.

¹⁴ Mane mabu wanika Alexandrẽ ea harakiri xinãtima kaya wakĩ ea itxakahairawaimaki. Haskawẽ taeshũ nukũ Shanẽ Ibũ haska abuai keskawẽ kupishanikiki.

¹⁵ Nũ hatu Jesus Cristo kakape yusĩmiskiri nuku hatu danãmaikiki. Haskawẽ taeshũ miãri hakiri uĩrakubaĩwẽ.

¹⁶ Hamẽ betsarã, ha dukũ Roma shanẽ ibubu nĩkamakĩ judeubũ ea kũyã akaibũ ẽ txakabuma ẽ hatu yuiaya tsuã kerabewai ea hãtxashunama dakekĩ dasibi ẽ haibuaibũ ea henebainimabuki. Ea haska wabiabainimabũ hatũ txakabuwẽ taeshũ hau Deusũ hatu kupiyamashanũwẽ.

¹⁷ Ẽ haibuaibũ ea henebiabainabũ hawẽ binuti Jesus Cristokiri hawẽ kaka pepa hawẽ pashatikiri ẽ hatu yui keyuaya judeubuma dasibibũ hau nĩkanũbũ nukũ Shanẽ Ibũ ea heneama ea kuxipa washũ hatu daewakĩ mese anua ea piskumaimaki, ea haska nukũ Shanẽ Ibũ hatu binumakĩ inu keneya pĩtsi keshea keska anua ea binumakinã.

¹⁸ Txakabu dasibi nukũ Shanẽ Ibũ ea binumakubaĩkĩ hanu shanẽ ibuai pepa hawẽrua nai anu ea pashawatã ea mekeshanai ẽ unaiĩ. Haskakẽ niti ikama ha duawakĩ kẽwanãkãwẽ. Haskakirã.

¹⁹ Haska inũ, hari hiweabu Prisca inũ Áqüila inũ Onesíforõ enabu: “Haska pebumẽkaĩ?” ikĩ ẽ hãtxa ẽ hatu bumai ea hatu yuishũwẽ.

²⁰ Corinto anu Erasto baxikuaya ẽ huyamaki. Ha inũ, Trófimõ isĩ teneai Mileto anu ẽ baxiyubirãyamaki.

²¹ Ui matsi inũ niwe kuxipa beriamakẽ manama hawaira huwe. “Haska mĩ pemẽ?” ishũ Êubulo inũ, Pudente inũ, Lino inũ, Cláudiã nenushũ dasibi ikũwaĩbubetã hatũ hãtxa mia yunukanikiki.

²² Nukũ Shanẽ Ibu Jesus Cristo mibe nishũ hau mia merabewakubainũwẽ. Ha inũ, Éfeso anushũ ikũwaĩbu dasibi Deusũ hau matu duawakubainũwẽ. Hatiski, ẽ hãtxarã. Paulo