2 Timóteo 3 - Kaxinawá Bíblia (BR)

Ma bari hawẽ heneaitiã yurabu haskashanaibu Paulõ yuinikiaki, na hãtxarã

¹ Hanu Jesus Cristo ma ana hua kemaya bika betsa betsapa kaĩbirãshanairã, mĩ ma unaĩ uĩrakubaĩshãwẽ.

² Ha yurabu eska bestiwẽ hamebi kẽkĩ hatũ mabu inũ hatũ pei bestiwẽ kemui: “Earã, tsua ea keskamaki”, ikĩ Deuskiri hãtxa txakabukĩ hatũ ibuã hãtxa nĩkama inũ, hawa pepa xinãma inũ, Deus kẽwaĩbuki meseama txakabushãkanikiki.

³ Yura betsabu duawatikiri xinãma inũ, hawa hatuki nuitimakiri xinãma inũ, yuãnanãti besti xinaĩ inũ, hatũ hiwea mekekĩ pewama pubẽ besti xinãkĩ hawara pepa Deusũ abumis danaĩ haki sinatashãkanikiki.

⁴ Haska inũ, betsarã, yura pepabu tsuabura hatuki sinataibu hatũ hatu unãmamis inũ, hawara itiru bebũkiri xinãma hamapai amisbu inũ, hamebi kẽkĩ xinãkĩ: “Yura betsã atirumabiakẽ eã besti ẽ atiruki”, iwanã, xinaĩ inũ, hawẽ kemu pae bestiwẽ xinaĩ pe hiwenũ ika Deus benakĩ xinãma iriashãkanikiki.

⁵ Hatũ keshawẽ bemakis shabakabi Deus kẽwãbiakĩ hawa hawẽ hiweawẽ pepakĩ uĩmama Deusũ kuxipaki dakekĩ kẽwã kayabiama danãshãkanikiki. Haska keskaburã, hatube ketashameama hatu dũkekubaĩwẽ.

⁶ Hamẽ betsabu ikirã, eskakanikiki. Hatubetã txani yui xaranũ ika aĩbuaibu hawa unãma txakabui hiwekĩ kemu betsa betsapa teneai anu hatũ hiwetã hikitã hatu yusĩtxakakĩ hatũ tsumabu hatu wamisbuki.

⁷ Habũ hawarakiri tapĩbiakubaĩkĩ hawa txanima hãtxa shabakabi nĩka pewatirubumaki.

⁸ Huni mukaya dabe Janes inũ Jambresĩ Moisés hãtxa beshtenũ ika inibu keskakĩ habu parananaĩbũ txanima hãtxari nemanũ ika ha hunibu hatũ xinã pema inũ ikũ kayabi wama hamakiri kanekanikiki.

⁹ Ha parananaĩbu unaĩsmapakĩ hãtxa kayabima hatu yusĩaĩbu dasibibũ unãtã itxapabu hatuki txiti ikama ishãkanikiki. Haska Moisés beshtenũ ika Janes inũ Jambres tatima ini keskai haburi haskashãkanikiki, beshtekeirã.

Hawẽ henekĩ Paulo Timóteowẽ nuihairakĩ yununikiaki, na hãtxarã

¹⁰ Mianã, ha parananaĩbu mĩ hatu txibãmaki. Hamẽ haska yusĩ ẽ hiwemis keska mĩ txibãmiski, eska tibi ea txibaĩnã. Haska ẽ xinãmis inũ, haska ẽ ikũwãmis inũ, haska hawaira hĩ hĩ ikama ẽ tenemis inũ, ẽ nui abunamemis inũ, hamapai ekiri kaĩbiranai tenei ẽ kuxipamis inũ,

¹¹ haska Antioquia anushũ inũ, Icônio anushũ inũ, Listra anushũ ea itxakawakĩ ea bika tenemakubirãyamabu mĩ unaĩ keskakĩ miari bika tenemaibu mĩ teneai ea keskakĩ mĩ mekubainaii. Ea haska tibi wabiaibũ nukũ Shanẽ Ibuã ea hatu mepamakubaĩyamaki.

¹² Hamẽ txanima tsuabũra Deusũ hãtxa ikũwaĩ pepakĩ Jesus Cristoki dasia hiwekatsis ikaiburã, hatu bika tenemakĩ hatu nuitapa washãkanikiki.

¹³ Hakia huni txakabu inũ habu parananaĩburã, hatũ hiwea pe buama piku bestishãkanikiki, hatu paraĩbuwẽ inũ ibubis parananaĩnã.

¹⁴ Haskabiaibũ miarã, Deusũ hãtxa pepa mia yusĩabu tapĩtã mĩ ikũwãni habiaskas xinãkĩ txibãkubaĩwẽ.

¹⁵ Mĩ bakeixta Deusũ hãtxa pepa meribi mia yusĩkĩ mia tapĩmakĩ hawẽ besti pashati Jesus Cristokiri mia unãmabu nĩkakĩ mĩ ikũwãnirã, xinaĩrawe.

¹⁶ Dasibi Deusũ hãtxarã, hunibũ xinãma Deusũ hatu xinãma habũ keneniburã, harã peki. Hawẽ yura betsabu yusĩti inũ hawẽ hatu nemakĩ beshteti inũ, hatu hawẽ pewati inũ, hau hawẽ hiwei pebainũbũ hawẽ hatu unãnepa watiki.

¹⁷ Haska yununiwẽ taeshũ habu Deusũ yunua hawẽ hãtxa yuishunikabu hawẽ hãtxawẽ unãnepakĩ pepahairakĩ Deus dayashũkĩ pepa betsa betsapa ashũtirubuki.