2 Timóteo 1 - Kaxinawá Bíblia (BR)

Paulõ Timóteokiri xinãnikiaki, na hãtxarã

¹ Ea ẽ Paulorã, Deusũ haska xinaĩwẽ Jesus Cristõ kuxipaya ea wakinã, hawẽ yunuawẽ ea aniki. Haska wakinã, hamẽ ea akama hakia haska bebũkiri Deus yubakani hawẽ hiwea keyuisma ikibi ikakiri haska xinãkubaĩmis haska hayawẽ taeshũ Jesus Cristo ea katumaniki.

² Timóteoõ, ẽ mia kene bumai uĩrawe, mĩ Jesus Cristo ikũwaĩwẽ taea mĩ ẽ bake kayabi keskakirã. Nukũ Epa Deus inũ nukũ Shanẽ Ibu Jesus Cristo miwẽ nuikĩ hau mia unãnuma hiwemakĩ pewakĩ duawapakekubainũbũwẽ.

Paulõ Timóteo pashkabiranimashũ Deus kẽwãshũkubainikiaki, na hãtxarã

³ Punu nuka huĩti nixma mĩ baxikuimakẽ mia xinãkĩ hanu ẽ Deusbe hãtxaitiã bariri inũ mexu tibi mia hakimama mikiri Deus kẽwãkĩ ẽ mia yukashũkubaĩmiski, eã Deus duawakinã. Haska ẽ xinã hawa txakabumakiri ea xinãmaya ẽ akubainaii, haska nukũ shenipabũ Deus ikũwãkĩ apaunibu keskari wakinã.

⁴ Ẽ mia pashkabirana mĩ ewẽ nui kashaya nenu huimashũ ẽ mia xinã heneamaki. Haskawẽ taea ana miki nukutã ẽ mia ana uĩ miwẽ ẽ benimakatsis ikaii.

⁵ Ha dukũ mĩ txitxi Lóide inũ mĩ ewa Eunicẽ Jesus Cristo ikũwãni txĩtuĩsbuma keska habias xinã miãri mĩ ikũhairawakĩ mĩ xinã mĩ betsa watiruma ẽ unaiĩ.

Jesus Cristokiri yusĩ daketimakiaki, na hãtxarã

⁶ Haskakẽ natiã ẽ mia yunukĩ yuairã, nĩkairawe. Deusũ hawẽ kuxipa pepa hau mia inãkĩ kayati wamanũ mia mamepishũ ẽ mia yukashuniki. Habiaswẽ ana kuxipai txi ketiãbu hi imis keskai ana mĩ kuxipa babu wayamawe.

⁷ Deusũ hawẽ Yushĩ nuku inãkĩ yushĩ babu dateti nuku inãma iniki. Hakia hawẽ Yushĩ kuxipa pepa inũ hawẽ abui nuinameti inũ hawẽ nukũmebi nũ pepakĩ xinãtiru nuku inãniki.

⁸ Mia haska washuniwẽ taea nukũ Shanẽ Ibukiri yusĩ hakiri hãtxai haki dakeyamakũkaĩwẽ. Ha dikabi, hawẽ taeshũri nenu ea bitxiabuwẽ taea ewẽri taea ekiri hãtxairi ewẽ dakeyamariawe. Dateama eskakũkaĩwẽ. Deusũ nuku kuxipa wakubaĩmiswẽ taeshũ Jesus Cristo mekenãkiri kakape nũ hatu yusĩayã nuku itxakawaibuwẽ taeshũ miari bika tenemabiabu hatuwẽ dateama Deusũ kuxipayashũ yusĩkĩ heneyamawe.

⁹ Eska Deusũ bebũkiri xinãnirã, hawara pepa nũ amiswẽ taeama hakia haska Deusũ na mai anu hawa wariamahairabia bebũkiri hawẽ xinã duapawẽ taeshũ hawẽ hãtxawẽ hiwei nũ hawenabu meribi pepakubaĩshanũbũ nukũ txakabuwẽ nuku kupikatsi ikama haska yubakaniwẽ taeshũ tsuabũra Jesus Cristo ikũwaĩbu nuku katukĩ kenanishũ natiã nuku ma mekekubainikiki.

¹⁰ Hanushũ txanima Deusũ hawẽ nuikipa nuku unãmakinã, hawẽ bake Jesus Cristo nukũ mekenãwãkĩ mawawẽ dasibibu nũ datemis hatũ maemakĩ nuku binushuniki. Ha kakape hakiri hiwea hãtxa yuikĩ datã ati xara ana huneama wakĩ shabakã tashnimakĩ shabakabi waniki.

¹¹ Haskawẽ taeshũ Deusũ ea katutã hawẽ bakekiri kaka pepa judeubuma ẽ hatu yusĩkubaunũ ea yunukĩ Jesusũ kuxipaya ea wanishũ ea yusĩnã waniki.

¹² Ea haska wanikẽ Deusũ hãtxa ẽ yusĩkubaũmiswẽ taeshũ itxakawakĩ ea bitxibiabũ ẽ Jesus ikũwãkĩ taewaya ea mekenitũ bari hawẽ heneaitiã ea mekekubaĩshanai unaĩ ẽ dakeamaki.

¹³ Jesus Cristo nuku ishuniwẽ taea ikũwaĩ abunamekĩ ẽ mia yusĩmis keska wakĩ hãtxa kayabi kayatapia yusĩkĩ heneyamawe.

¹⁴ Haska wakĩ Jesuskiri yusĩa mĩ tapĩni hau tsuã betsa wayamanũbũ Deusũ Yushĩ Pepa nukuki dasiatũ mia merabewaya hawẽ kuxipawẽ uĩrakubaĩwẽ.

¹⁵ Haska inũ, mĩ ma unaiĩ. Ásia mai pakea anuabũ Jesus ikũwaĩbu dasibi eki dakei eki petxitã ana ea merabewabumaki, Fígelo inũ Hermógenes dikabitunã.

^16-17 Ea haska wabiaibũ nenu Roma anu ẽ bikai hiwebiakẽ nukũ haibu Onesíforõ Roma anu hikituxitã hawa huĩrukuãma ea betxinũ ika ea benatxakayamakĩ atimas ea betximaki. Ẽ mane dispi txiwetameyawẽ ẽ meneshekeaki dakeama hawẽtxaĩs ea merabewakĩ ea xinã txãkãwãbirãbiranimaki. Ea haska waimakẽ Deusũri hawenabuswẽ nuikĩ hau hatu merabewakubainũwẽ.

¹⁸ Éfeso anushũ Onesíforõ nuku merabewakubaini mĩ unãhairaii. Bari hawẽ heneaitiã Deusũ yurabu hatu unãti waitiã nukũ Shanẽ Ibũ hau Onesíforo duawashanũwẽ.