2 Tesalonicenses 3 - Kaxinawá Bíblia (BR)

Nukũ dayakiri Deus nuku yukashũkubaĩkãwẽ, hatu wanikiaki, na hãtxarã

¹ Ẽ betsabu inũ ẽ puibuũ, nũ ma matu kene keyushunai uĩrakãwẽ. Jesuskiri kakape nĩkashũ mã xinã betsa waima keska wakĩ nãta manibaunabũri habũri Jesuskiri kakape nĩkatã hau hawaira xinã betsa watã Deus kẽwãrianũbũ nũ hatu yusĩkubaunaya Deusbe hãtxakĩ kuxipa nuku yukashũkubaĩkãwẽ.

² Ha inũ, dasibibũ Jesus ikũwãbumawẽ taeshũ yura betsa txakabubu inũ dakeisbumã txakabuwakubaĩkĩ nuku itxakawaibu hau nuku nemashunũ Deus nuku ea ashũkãwẽ.

³ Haska wakĩ Satanásã matu kanemakatsis ikaya nukũ Shanẽ Ibu nuku hakimaismatũ nuku shunũbainama matu kuxipa wakĩ mekekĩ txakabu matu binumakubaĩshanikiki.

⁴ Ha inũ, nukũ Shanẽ Ibube nũ habe dasitã matu yusĩtanima hawa heneama txibãkĩ mã habias akubaĩshanai haskakiri nũ matu ikũwaiĩ.

⁵ Epa Deus nukuwẽ nuimis keskai betsabube mã nuinameairã, haska Cristõ bika tenei hawẽ kuxipa babuama ini keskai maturi mã babuyamanũbũ hau nukũ Shanẽ Ibũ matu merabewakubainũwẽ.

Txikixbu tapĩmatikiaki, na hãtxarã

⁶ Ẽ betsabu inũ ẽ puibuũ, nukũ Shanẽ Ibu Jesus Cristõ nuku yunumiswẽ taeshũ nũ maturi yunuai, nĩkakãwẽ. “Nukubetã Jesus ikũwãkatsi ibiai tsuara nũ yusĩaĩ txibãma inũ beya bena nũ matu yusĩma danãkĩ akabumarã, ana hatukiri xinãyamakubaĩkãwẽ”, hatu dakewakinã.

^7-8 Hamẽ earã, matube hiweyushũ hawa tirumakĩ matu daketapawama tsuabũra piti nũ hamẽ piãma ikimaki. Haskakĩ nukũ hamapai ibubis bi bariri inũ mexu merã dayatxakayamai yumãkĩ nũ matu bikawama ikimaki. Matube hiweshũ nũ matu uĩmaima keska ikubaĩkãwẽ, tsua hamẽ ea iki daketapamarã.

⁹ Ha inũ, nũ Jesusũ kuxipayabũ matu yusĩkubaĩkĩ hawẽ taeshũ matũ piti nũ yukatirubia nukũ piti inũ nukũ tari hawẽ biti mã nuku devebiakẽ nũ matu hawa yukama ikimaki. Hakia ibubis mekenẽ dayai haska nũ hiwemis keskai matũri nuku txibaĩ mã hiwekubaĩshanũbũ nũ matu uĩmaimaki.

¹⁰ Haska matu yusĩ kaimashũ matu yunukĩ: “Tsuabura dayakatsi ikama txikixaiburã, hau hatu pimayamarianũbũwẽ”, iwanã, nũ matu yusĩmaki.

¹¹ Hakia matukiria txani huai nũ nĩkaxinarã, hatirirã, mã txikix dayama hawawakatsi ikama kaka betsa betsapa besti nĩkatã betsabu yui mã yuãnanã bestikubaĩkanikiaki.

¹² Haskakẽ nukũ Shanẽ Ibu Jesus Cristõ kuxipawẽ nũ matu yunuaii. Yurabu txikixbu yunukĩ tapĩmakĩ: “Haska besti hiwetirubuma hau tari meribi hatũ daya tapĩtã ana yura betsabu shetukĩ yuãmama hau hatũ piti inũ hatũ mabu hau ibubis bikubainũbũwẽ”, iwanã, matũri mã hatu yununũ nũ matu yunuriaii.

¹³ Ẽ betsabu inũ ẽ puibuũ, hawara daya pepa aki mã hawẽ hiwemis akirã, punu nukai hĩ ikĩ heneyamakãwẽ.

¹⁴ Ha inũ, nukũ hãtxa nũ matu bumai hatiribũ nĩkakĩ tapĩkatsi ikama hatũ txakabu unaĩ hau dakenũbũ ana hatube mapuyamakubaĩkãwẽ.

¹⁵ Hakia hatuki sinatama mĩ betsabube mĩ ikai keskakĩ hatu hãtxa txakabuwama hatu yusĩkĩ nema bestikubaĩkãwẽ.

¹⁶ Nukũ Shanẽ Ibũ hamebi hawenabu unãnuma hiwemakubaĩmistũ maturi unãnuma hiwemakĩ hawara bari tibi betsa betsapa mã akai hau matu uĩrakubainũwẽ.

¹⁷ Ea Paulõ, ẽ hãtxa matu bumakĩ haska ibubis ẽ mekenẽ kenekĩ ẽ keyumis keska wakĩ ẽ matu ashuaiĩ, ẽ tsumapã ana ea ashũamakenã.

¹⁸ Haskakẽ nukũ Shanẽ Ibu Jesus Cristõ hau unãnuma hawama matu duawakubainũwẽ. Hatiski, ẽ hãtxarã. Paulo