2 Tesalonicenses 2 - Kaxinawá Bíblia (BR)

Jesus ana hushanaikiri Paulõ shabakabi hatu yusĩnikiaki, na hãtxarã

¹ Ẽ betsabu inũ ẽ puibuũ, bari hawẽ henei keyuaitiã dasibibu nuku itxawanũ ika nukũ Shanẽ Ibu Jesus Cristo nai anua ana txĩtũkirã hua nũ habe itxashãkanaikiri matu yuinũ nĩkakãwẽ,

² eska tashnishanaikiri bebũkiri nũ matu ana shabakabi yusĩainã. Tsuãra Yushĩ Pepatũ yuia keska xinãkĩ: “Nukũ Shanẽ Ibu Jesus ma huaki”, ikĩ matu paraĩbu inũ, yusĩa betsa tapĩtã: “Jesus hune ma huimakiaki”, ikaibu inũ, nukuki parana ẽ kene keska bushũ matu yuikĩ: “Paulo eska txanikiki, Jesus ma huimakiaki”, ikĩ mã haska tapiãma ibiaimakẽ matu parãkĩ yuiakeakeaibu nĩkatã e iki huĩti metesheketã matũ xinã hawaira maewai hatuwẽ dateyamashãkãwẽ.

^3-5 Ha inũ, matube hiweshũ hawara ẽ matu yusĩtanimarã, mã ma daki hakimai ikai matu ana yuinũ nĩkakãwẽ. Deus ikũwaĩbu itxapabũ Deus danaĩ txĩtuaĩbũ Jesus hushanai ma kemaya huni txakabu kuxipa bebũkiri ha dukũ hushanikiki, ha huni txakabũ iburã, hau Deusũ kupiti tenetxakayamashanũ Deusũ ma haki tanashũ pewanirã. Ha Deuski sinatamistũ Deusũ yunuti inũ hawẽ nemati danãkĩ hamapai tibi kẽwãkĩ txibaĩbu nemanũ, iwanã, hamapai dami xarabu kẽwãmisbu hatu binukĩ maematã hamebi keĩ hanua Templo Jerusalém anu tsaushũ yuikĩ: “Earã, ẽ Deuski”, ishanikiki. Haskawẽ taeshũ hau matu parãyamashanũbũ hatu hawa nĩkamayamashãkãwẽ.

⁶ Ha huni txakabu hawẽ yuba iriamakẽ natiã kaĩmayuama tsuãra nemayukubainai mã unaiĩ.

⁷ Ha huni txakabu Satanásã kaĩmashanairã, ma hune yubakai dayaikiki, yurabu parãkĩ txakabu ewawairã. Haskabiaya hatũ nemakubaĩmisshũ henea hanua ana nemamakẽ tashnishanikiki.

⁸ Hanua ha huni txakabu tashnikẽ nukũ Shanẽ Ibu Jesus dasibi hawẽ txasha kuxipaya hukirã ha huni txakabũ kuxipa mebĩkĩ paismawatã hawẽ hashpawẽ shuũ akĩ kupikĩ tenãshanikiki.

⁹ Ha huni txakabu hawẽ shanẽ ibu Satanásã kuxipa wakĩ merabewaya dami atimaska betsa betsapa wakĩ yurabu parãshanikiki.

¹⁰ Habũ Deusũ kakape Jesuswẽ mekekatsi iki abunameama danãnãkĩ txanima hãtxa danaĩbu ha huni txakabunã, txakabu atimapa betsa betsapawẽ hatu parãyã haska uĩtã txibaĩbũ

¹¹ haskawẽ taeshũ Deusũ txani yushĩ hatu parãmaya haska txani hãtxa kẽwaĩbu

¹² atimas hanu kupiaitiã ha hãtxa txanima danãkĩ txakabu besti abuaibu Deusũ hatu hawẽ kupishanikiki.

Hawenabu wanũ, iwanã, bebũkiri Deusũ hatu katunikiaki, na hãtxarã

¹³ Ẽ betsabu inũ ẽ puibuũ, Deus matuwẽ nuikĩ matu abukĩ bebũkirihaira matu katuniwẽ taeshũ txanima hawẽ pashati mã bishanai hawẽ Yushĩ Pepatũ matu merabewai kai ma matukiri pewanikẽ txanima mã ikũwãyã haskawẽ taeshũ matu meribi waniki. Mã haskakẽ Deus nũ matukiri pe kẽwãshũkubainaii.

¹⁴ Kakapekiri datã akĩ nũ matu yusĩayã Deusũ matu ikũwãmaniki, hau nukũ Shanẽ Ibu Jesus Cristõ kuxipaki dasitã mã hawenabu ikubaĩshanũbunã.

¹⁵ Haskawẽ taea ẽ betsabu inũ ẽ puibuũ, matu haska wakĩ katunikẽ nukũ yusĩa beya bena hari matũ mae anu kashũ ibubis nũ matu yusĩtanima inũ nukũ kenewẽ nũ matu yusĩainã, hakimama txibãkubaĩkãwẽ.

^16-17 Hanushũ nukũ Shanẽ Ibu Jesus Cristo hamebi inũ nukũ Epa Deus nukuwẽ nuikĩ abukĩ nuku duawakĩ nuku xinã txãkãwã niti ikama nai anu nũ hatube hiweshanai manakamakĩ nuku yubaniki. Hanua mestẽwãtã matũ huĩti xinã txãkãwãkĩ matu kuxipa wai heneama hamapai yuikĩ mã akai pepas hau matu amakubainũbũwẽ.