2 Samuel 9 - Kaxinawá Bíblia (BR)

Mefibosete hawẽ ibu Jônataswẽ taeshũ Davĩ duawanikiaki, na hãtxarã

¹ Shaba betsatiã Jônataskiri shinãbaũ Davĩ hatu yukakĩ: “Ẽ haibu Jônatas shinãkĩ ẽ duawakatsi ikaiwẽ taea Saulũ enabu huni betsa tesheni hiweyuamẽ?” hatu wa

² Saul enabũ dayaru huni betsa Ziba hiwea Davi yuiabu hau yuishũtanũbũ hatu yunua ishũtanabu shanẽ ibuhaira Davi anu Ziba hua yukakĩ: —Habia mĩ miamẽ, Zibarã?— aka kemakĩ: —Shanẽ ibuũ, mĩ dayarurã, ẽ habiaki— aka

³ shanẽ ibũ ana yukakĩ: —Saul enaburã, huni betsa tesheima hiweyuamẽ? eã Deusũ kenawẽ taeshũ ẽ merabewatirukirã— aka Zibã kemakĩ: —Haa, Jônatasã huni bake bestitxai hiweaki. Hakia hawẽ tae dabe txakabuki— aka

⁴ Davĩ yukakĩ: —Hanimẽ?— aka Zibã kemakĩ: —Mae betsa Lo-Debar anu Amielĩ bake Maquirĩ hiwe anu hiweaki— aka

⁵ hanua hau ishũtanũbũ Davĩ hatu yunua bushũ Davi anu hawẽ bakebirãtiki naneshũ iabiranaibũ

⁶ Jônatasã bake, Saulũ baba Mefibosete Davi anu buteabu Daviki mesei ha bebũ dãti iki beti ikaya benimakĩ Davĩ yukakĩ: —Jônatasã bake Mefibosetẽ, mĩ miamẽ?— aka —Haa. Shanẽ ibuũ, mĩ ea kena ẽ hushurã, mĩ dayarurã, ẽ habiaki— aka

⁷ Davĩ yuikĩ: —Mĩ epa Jônatas shinãkubaĩkĩ pepawẽ ẽ mia duawakubaĩshanaiwẽ taea dateyamawe. Mĩ hutxi Saulũ mae tibi bai pepa betsa betsapabu inũ hi pepa shukuabu tibi inũ hawẽ hiwe betsa betsapa ẽ mia ibu wamashanaii, ibu wabianibũ hau mia ana inanũbũ hatu mebĩmakinã. Nenu Jerusalém anu hiweshũ ẽ tapu anushũ ebetã mĩ pikubaĩshanaii— aka

⁸ hakia Mefibosetẽ kẽwaĩ ana beti ishũ yuikĩ: —Mĩ ẽ shanẽ ibuhairatuũ, mĩ tsumakirirã, haskakĩ mĩ ekiri shinaĩ? Earã, ẽ kamã mawa keska bestiki— aka

⁹ haska wabia Saulũ dayaru ha dukũtũ dayashũpauni Ziba hau hunũ Davĩ kena ana hua Davĩ yuikĩ: —Dasibi mĩ tsuma Saul inũ hawenabus hayanibu hawẽ hamapairã, hawẽ baba Mefibosete ẽ yunushuki.

¹⁰ Haskawẽ taeshũ hawẽ bai tibi mĩ huni bakebu inũ mĩ dayarububetã dayashũkubaĩshãwẽ. Mĩ tsuma sheni Saulũ enabũ hau pi hiwekubaĩshanũbũ mibã pawaibu tsekashũ hanu aruti hiwe merã hatu mekeshũkubaĩshãwẽ. Haskabiakẽ Saulũ babã ebetã pikubaĩshanikiki— akaya Ziba 15 huni bakebu inũ 20 dayaruyatũ

¹¹ kemakĩ shanẽ ibu yuikĩ: —Dasibi mĩ shanẽ ibuhairatũ ea yunua ẽ mĩ dayaruwẽ taeshũ ẽ ashũkubaĩshanaii— aka hanushũ shanẽ ibuhairatũ huni bake keska Mefibosetẽ Davibetã pikubainikiaki, hawẽ tapu anushunã.

^12-13 Ha dikabi Mefibosetẽ enabu inũ hawẽ huni bakeishta hawẽ kena Mica Ziba inũ hawẽ dayarubũ hatu dayashũkubainibukiaki, merabewakinã. Hamẽ Mefibosete Davĩ duahairawakubaĩshanaiwẽ taea Jerusalém anu hiweshũ Davibetã pikubainikiaki, haska hawẽ tae dabe txakabu hawa shushamarã.