2 Samuel 7 - Kaxinawá Bíblia (BR)

Davi duawakĩ pepawapakeshanai Senhor Deusũ yubanikiaki, na hãtxarã

¹ Hawẽ hiwe hawẽrua pepawẽ Davi ma unanuma hiwekaĩkĩ haki sinataibu hiwebiabaunabũ Senhor Deusũ Davi hatu nemashũkĩ daewamakubaina Davi ana bika teneama

² Davi ha mesti ma pe hiwekĩ Deusũ hãtxa yuishunika hawẽ kena Natã yuikĩ: —Earã, kusha hiwe hawẽruawẽ ma ẽ hiweaki. Hakia Senhor Deus hatube yubakani hãtxa aruni bau tari hiwe pema duakabi anu tsaua haska merã besti tsaua pema ẽ shinaiĩ— aka

³ Natãnẽ kemakĩ yuikĩ: —Haska mĩ shinaĩ keska ashũwẽ, Senhor Deusũ haskarara mikiri shinãkĩ mia merabewaikikirã— akĩ yuiwãkẽ

⁴ Davibe hãtxakaini kakẽ habias meshu merã Natã anu Senhor Deus hushũ yuikĩ:

⁵ —Ẽ tsuma Davi anu kashũ hãtxa wakĩ: “Eska Senhor Deusũ mikiri ea yuikĩ Davi ea yuishũwẽ: ‘Ea ẽ hanu hiweshanũ miã mĩ ea kẽwãti hiwe ashũtirumaki, ẽ hanu hiweshanunã.

⁶ Mĩ shenipabu Egito anua ẽ hatu tashnimabiranaitiã ẽ hatube hiwekũkirani inũ na habiatiãri kẽwãti hi hiwe amisbu keska anu ẽ hiwekũkaĩsmaki. Hakia tari hiwe pekabaĩkĩ maewatirubu anu matũ shenipabu inũ minabuki ẽ nukukũkaĩmiski.

⁷ Bari tibi mĩ shenipabube ẽ kakũkaini enabu Israelĩ enabu shanẽ ibu tibi ẽ hatu katukubainaitiã hanushũ kẽwãti kusha hiwe hau ea washunũbũ ẽ hawa hatu yunuamahaira ikũkiraniki.’

⁸ Ha dikabi ẽ ea Senhor Deus kushipahaira dasibi binuatũ haska ẽ mia yuai keskari ẽ tsuma Davi ea yuishũtãshãwẽ: ‘Enabu Israelĩ enaburã, mĩ hatu yunui shanẽ ibukũkaĩshanũ txashuwã itxapa mekekubaini nãta basi bai anu nia txashuwã txipi hatxũ mĩ nia kenatã ẽ mia katuniki.

⁹ Hanu mĩ nia ketaĩ anu ẽ mibe kakũkaũriamiski. Habu miki sinataibu ẽ mia hatu tenã keyukĩ nemashũkubaĩmiski. Shanẽ ibu kushipabu hiwebaunabu keska mĩ kena dasibibu ẽ hatu unãmakubainaii.

^10-11 Ha dikabi Israelĩ enabu mã enaburã, mã hatu yunukubaĩshanũ unãti wanika kushipa betsa betsapa matu katukubaĩkĩ hatũ mai pakea betsa hatu mebĩtã ẽ matu pewashuniki. Hanushũ huni txakabubũ matu itxakawamis inũ matu bika tenemakĩ tsuma wamisbu hau ana haska mã hiwepauni keska hiweama unanuma mã hiwenũ ẽ matu iweniki. Hanua miki sinataibũ mia uiaĩbũ ẽ mia hatu nemashũkubaĩshanaii, hau mia ana bika tenemayamanũbunã. Ẽ hatu mekekubaina mĩ bakebu hiwekubaĩshanaibu bebũkiri ẽ mia tapĩmaii.

¹² Anibuhairakũkaini hiwea mĩ ma debunikẽ hau mĩ shãtukũ Israelĩ enabu yununikai shanẽ ibushanũ eã minabu anua mĩ baba bestitxai hawẽ shanẽ ibu keyutima ẽ mia yunushũshanaii.

¹³ Ha inũ, mĩ bakẽ hanushũ ea kẽwaĩ eki nukuti templo hatũ ea ashũshanikiki. Ẽ hatu putama shanẽ ibu henetiruma ipakeshanaikiri ẽ hatuki yubakaii.

¹⁴ Mĩ huni bake Israelĩ enabu shanẽ ibukũkainaya ẽ hatũ epa keska inũ habu ẽ bakebu keska ikubaĩshãkanikiki. Mĩ bakẽ kanekĩ txakabuwai pewakĩ ẽ hatu bika tenemashanaii, hatu kupikinã, haska epa pepabũ hatũ bake pewamis keska wakinã.

¹⁵ Kanebiaibũ ẽ pepa ẽ hatu mebiãma ishanaii, Saul anua ẽ pepa ẽ mebini keskama Saul putatã hawẽ shãtukũ ẽ mia shanẽ ibu wanirã.

¹⁶ Ẽ hatu mekekubainaiwẽ taea minabu Israelĩ enabu shanẽ ibupakeshãkanikiki, niti ikamarã. Ha dikabi haska mĩ hatu yunumis keska heneama ikubaĩshãkanikiki’, iwanã, Davi ea yuishũtãwẽ”— abainaya

¹⁷ habias uĩkĩ nĩkashĩkĩ hawa kaneama dasibi Natãnẽ Davi yuikĩ keyua

¹⁸ Senhor Deus bebũshũ hãtxa wanũ ika Deuski nukuti tari hiwe pũtea anu shanẽ ibuhaira Davi hikikaĩ yuikĩ: “Shanẽ ibuũ, ea inũ enabu nũ hawamabiakẽ haskarakiri ea shinãkĩ mĩ ea shanẽ ibuhaira wanimẽ?

¹⁹ Senhor Deusuũ, ẽ mĩ tsuma anua enabu ẽ bababu kaĩriabumabiakẽ shanẽ ibukubaĩshanaibu bebũkiri mĩ ea banabimashinaki. Senhor Deusuũ, mĩ hãtxai keska huni betsa hãtxai yubakatirumaki.

²⁰ Senhor Deusuũ, ea mĩ tsumakiri dasibi mĩ ma unã keyuaiwẽ taeshũ eã ẽ ana hawa yuitirumaki.

²¹ Haska bebũkiri mĩ ma ea ashũkĩ hatu ‘Habaa!’ imakubaĩshina txanima mĩ ea yubashina inũ haska mĩ betxipaiai mĩ akubainai ẽ unaiĩ.

²² Haska nuku dasibibũ nũ nĩkamis inũ nũ uĩmisrã, hawa mekenika Deus betsa mia binua betsa hayamaki, mia keskarã. Haskawẽ taea ẽ mekenika Senhor Deusuũ, miarã, mĩ pepahairaki, tsuã haska watiruma mĩ nuku ashũmisrã.

^23-24 Israel minabu wakĩ mĩ hatu katuni habu hiwepakeshãkanikiki. Hiweabũ, miarã, Senhor Deusuũ, mĩ hatũ Deus ipakeshanaii. Yurabu shukua betsa betsapa hiweabu keska Israel minabu hatu keska hiweama iriashãkanikiki. Deusuũ, hau minabu ikubaĩshanũbũ hatu tsumawanibu mĩ hatu mebikinãkirãkĩ mina mĩ hatu waniki. Ha dikabi mĩ kushipawẽ dasibi hatu datekĩ hatũ kena ewapa wakĩ habuwẽ ‘Habaa!’ imati wakĩ dasibi hiwebaunabu bebũshũ Egito nawabu anua hatu tashnimabirãkĩ nawa shukua tibibũ hatũ yushibu hatu sa amakĩ mĩ kushipa mĩ hatu uĩmakubiraniki.

²⁵ Haskawẽ taeshũ Senhor Deusuũ, haska ea inũ enabu mĩ hatu yubashina hatu heneama, haska mĩ yuishina akĩ menekubaĩshãwẽ.

²⁶ Mĩ kena kushipa kẽwãkĩ shabakabi yui: ‘Senhor Deus kushipahaira dasibi binua Israelĩ enabu mekenika Deuski’, ikĩ hau mikiri hãtxakĩ dayuikubaĩshanũbũwẽ, heneamarã. Mĩ hatu mekea Davi mĩ tsumapã enabũ mia nĩkai hau pe hatu shanẽ ibushũkubaĩshanũbũwẽ.

²⁷ Enabu shanẽ ibu ikubaĩshanaibu miarã, Senhor Deus kushipa dasibi binuatũ mĩ ea tapĩmaiwẽ taeshũ ẽ mĩ tsuma bestibia dakeama ẽ mia yukaii.

²⁸ Senhor Deusuũ, miarã, mĩ mekenika Deus kayabiki. Mĩ hãtxa txanima kayabiriki. Mĩ tsuma mĩ pepa betsa betsapa mĩ ea yubaii.

²⁹ Mĩ tsuma mĩ duawashanai hakiri shinaĩrawe. Miki txiti ikaibu mĩ hatu kesheshũ duawaya hau hiwepakeshanũbũwẽ. Senhor Deusuũ, mĩ ma ea yubashuki, mĩ hatu pepa waya enabu shanẽ ibui hau benimai pepakubaĩshanũbũwẽ, heneamarã”, anikiaki.