2 Samuel 6 - Kaxinawá Bíblia (BR)

Senhor Deusũ hãtxa aruni bau Jerusalém anu Davĩ maewanũ ika inikiaki, na hãtxarã

¹ Txipu dasibi Israelĩ enabu 30.000 detenamenikabu hawenabũ hatu katumisbu Davĩ ana hawenawakĩ dasiwakĩ hatu itxawatã

² hanua mae Baalá Judá mai pakea anua Davi hawẽ detenamenikabube kashũ hawẽ mae Jerusalém anu Deus hatube yubakani hãtxa aruni bau maewakatsi inikiaki, ha bau bebunua Deusbe hawenabu hãtxashunika shanẽ ibuhairatũ hatu hãtxashũmis Senhor Deus dasibi binu keyuatũ kena ha querubin hamamaki tsaua yukamisburã.

^3-4 Mati anu huni betsa hawẽ kena Abinadabẽ hiwe Geba anua Deusũ hãtxa aruni bau Jacó bake Levĩ enabũ hawẽ tsumatiwẽ bitã bakebaĩkĩ ina awa dabe tarãbaĩti bena beabuki naneabu Abinadabẽ huni bake dabe Uzá inũ Aiôrã, habũ ha ina awa dabe tarãbaĩtiki bukĩ Aiô bebukaĩkĩ ina awa dabe dispiwẽ tsumashũ ninibainaya hawẽ betsa Uzá txipi kakĩ merabewabainaya

⁵ habiatiãri Senhor Deus uĩmakĩ kẽwãkĩ harpa inũ, saltério inũ, pandeiro inũ, castanhola inũ, címbalo tsumatã bebubaĩkĩ hui kushipawẽ nawai kãtakubaini bui

⁶ hanua huni betsa hawẽ kena Nacomnẽ mati napãpa hanu shekiwã bimi tsekashũ katamisbu anu niti itã ina awa dabe itimaskabaũkĩ Deusũ hãtxa aruni bau berãbu tĩ ikai mekẽ bestitxaiwẽ Uzã tsumapaikĩ

⁷ tsuã metirumahaira hawa shinãma Uzã metsaiwẽ taea Senhor Deus haki sinatahairakĩ tenã Deusũ hãtxa aruni bau dapi tĩ itã hawaira Uzá mawaya

⁸ Senhor Deusũ Uzá tenãshuwẽ taea Davi haska betxipaiama sinatakĩ ha napãpa kenakĩ: “Perez-Uzáki”, anikiaki. Na habiatiã ha kena hakimaisbuma hayaki.

⁹ Habias shabatiãri Senhor Deuski datetxakayamakĩ Davĩ yuikĩ: “Haskakĩ hawa shinãma Senhor Deusũ hãtxa aruni bau ẽ beshumẽ?”, itã “Ana ẽ hari buamaki!” iwanã,

¹⁰ Davĩ hawẽ mae ewapa anu ana bukatsi ikama mae betsa Gate anu Obede-Edomnẽ hiwe anu hau bunũbũ Davĩ hatu yunua

¹¹ Obede-Edomnẽ hiwe anu ushe dabe inũ besti Senhor Deusũ hãtxa aruni bau tsaũbiranimawẽ taeshũ Obede-Edom inũ hawenabus Senhor Deusũ habu besti pe mekekĩ merabewakubainaya

Jerusalém anu Senhor Deusũ hãtxa aruni bau Davĩ ana hatu bimatanikiaki, na hãtxarã

¹² shanẽ ibuhaira Davi anu kashũ hawenabũ Davi yuitãtãkĩ: “Senhor Deusũ hãtxa aruni bau Obede-Edom anu mĩ bashibiranimawẽ taeshũ hawẽ bakebube hawẽ hamapai Senhor Deusũ duawakĩ merabewakubainikiki”, akĩ shinã betsamabu uĩtanũ ika Obede-Edomnẽ hiwe anu Davi kashũ txanima haska wai uĩtã hawẽ mae anu Deus hatube yubakani hãtxa aruni bau Davĩ ana bukĩ maewarinũ ishũ benimakĩ hatu pewamatã

¹³ 4 hunibũ iabaini paibaini 6ki ma tatsekebainaibũ Davĩ Senhor Deus ha menushũkatsi ina awa bene pepa inũ txashuwã bene shuarãwã ma pewa tesẽtã dashpeshũ hawẽ sheni bishũ txiwẽ kuakĩ hawẽ kuĩwẽ Davĩ Senhor Deus benimawabaini

¹⁴ hawẽ éfode linho tari hushupa sawea nawai sheke sheke itxakayamakũkaini

¹⁵ Israelĩ enabũ Senhor Deusũ hãtxa aruni bau buaibũ dasibi benima txakayamai xãxãki ibaĩkĩ hatũ mane trombeta txã txã ati mawakubaini buaibũ

¹⁶ Davĩ mae mishki kenebaunibu anu Senhor Deusũ hãtxa aruni bau iabaini hikiaibũ Saulũ aĩbu bake Mical ha dukũ Davĩ aĩwani hanu niwe hikiti shui anu nishũ haska Senhor Deus bebũ Davi sheke sheke iki nawakũkainai Micalĩ uĩtã haska betxipaiama hawẽ dakekĩ danãtxakayamaya

¹⁷ Senhor Deusũ hãtxa aruni bau iabaini bukĩ tari hiwe ewapa ma haki tanashũ Davĩ hatu pũtemashina namakis tsauãbu ana ha katxu Davĩ hawaira hawẽ tsumabu yunua Senhor Deus bebũ txashuwã itxapa tesẽshũ dashpe keyushũ sheni dasibi bishũ hawẽ nami dasibi meshte meshte akĩ txuri washũ hawẽ nuewẽ Senhor Deus benimawakĩ menukĩ taewaibũ

¹⁸ Davĩ menukĩ keyutã Senhor Deus kushipa dasibi binuatũ kenawẽ hãtxa pepawẽ hawenabu dasibi hatukiri pe hãtxakĩ Davĩ hatu pepawatã

¹⁹ hanushũ Israelĩ enabu dasibi hanu itxabu hunibu inũ aĩbuaiburã, shekiwã trigo misi ewapa bestitxai inũ, nami shui tũku bestitxai inũ, uva bimi tsusĩ tũku wabu inũ, bimi betsa batapari tsusĩ tũku wakĩ keshtu wabu bestitxai hau hatu inanũbũ Davĩ hawẽ tsumabu hatu yunua bestibu tibi hatu inãbaũkĩ keyuabu, piti keyu bitã hatũ hiwe anu txĩtũbainaibũ

²⁰ hawenabusri hãtxa pepawẽ hatukiri pe hãtxanũ ika hawẽ hiwe anu Davi txĩtũkaini kaya hawẽ aĩ betsa Saulũ bake Mical inũ ika kaĩkaini haki nukui kashũ dakewakĩ yuikĩ: —Israelĩ enabu mĩ hatũ shanẽ ibuhaira natiã mĩ hatu peshũkirãkĩ mĩ dayarubũ escrava aĩbuaibu bebũ haskatimabiakẽ hatu uĩmai nawai sheke sheke ikirani mĩ peshukitsa, dakeamarã— aka

²¹ kemakĩ Davĩ yuikĩ: —Txanimaki. Senhor Deusũ ea uiãyã kẽwãkĩ benimawai hamẽ ikama ẽ nawashuki. Senhor Deusũ enabu Israelĩ enaburã, ẽ hatũ shanẽ ibu ikũkaĩshanũ mĩ epa danãtã minabu katuama Senhor Deusũ ea katuniki. Haskawẽ taea ha bebunua ẽ nawashuki, hawa dakeamarã.

²² Enabube ẽ besikũkainairã, ibubis ẽ hawama keskaki, Senhor Deus ishuinã. Haskairã, ẽ keãmaki. Mĩ ea haska uĩkĩ yuiaiwẽ taea ẽ babuamaki. Mĩ ea haska wabiaya ha habias escrava aĩbuaibukiri mĩ ea yuishu habiabũ ea duawakubaĩshãkanikiki— akaya

²³ hanua Saulũ bake Mical hawa bake bisma yushabunikiaki.