2 Samuel 5 - Kaxinawá Bíblia (BR)

Davi hatu shanẽ ibushũkĩ Israelbu shukuabu inũ Judábu shukuabu hatu yunukubainikiaki, na hãtxarã

¹ Hebrom anu Judá enabu Davi hatũ shanẽ ibu ikaya Israelĩ enabu shukua tibibũ anibu unanepabu Davibe hãtxanũ ika Hebrom anu bushũ Davi yuikĩ: “Dasibi nũ nukuburã, Jacó nukũ shenipabuwẽ taea nũ habiabuski, huni betsamarã.

² Txanima Saul nukũ shanẽ ibubiakẽ miã Israel detenamenikabu mĩ hatu yunu pewakubaĩkĩ Filisteu nawabube mĩ hatu detenamemakubainimaki. Ha inũ, shanẽ ibukĩ Israelĩ enabu dasibi mĩ yunukubaĩshanũ katukĩ Senhor Deusũ mia yubanikiaki. Haskawẽ taea nukũ shanẽ ibu iriakũkaĩshãwẽ”, akeakeabu,

³ haska wakĩ Israelĩ enabu anibu unanepabu dasibi bushũ Hebrom anu shanẽ ibuhaira Davibe hãtxakĩ Senhor Deusũ hau hatu unãti wakubaĩshanũ Davi hatube yubakai taekĩ Israelĩ enabu dasibi Davi habũri shanẽ ibu iriakũkaĩshanũ anibu unanepabu dasibibũ hatũ shanẽ ibu wakĩ Davi katunibukiaki.

^4-5 Hebrom anua shanẽ ibui taei Davi 30 ano hayanikiaki. Hebrom anu 7 ano namakis Judá enabu anua Davi shanẽ ibukũkaini txipu Jerusalém anu maetã 33 ano Israelĩ enabu dasibi anu Davi shanẽ iburiakũkaini mawariama 40 ano Davi hatu shanẽ ibushunikiaki.

Sião mae kushipa Jerusalém Davĩ hawenabubetã hatu mebinikiaki, na hãtxarã

⁶ Israelĩ enabu dasibibũ Davi shanẽ ibuhairawakĩ taewaimabu Jebuseu nawabu Jerusalém anu hiweabu inũ ha dapi hiwebaunabu hatu maemanũ ika Jerusalém anu shanẽ ibuhaira Davi inũ hawẽ detenamenikabu buabu hatu uĩkĩ shinaĩ haskatã hatũ mae anu hikitiruma dabanẽ Davi yuikĩ: “Miarã, haskatã mĩ nuku anu hikitirumaki. Nukũ bekũbu inũ txãtubũ matu hikimatirubumaki. Haska bestiki. Nenuarã, burikãwẽ”,

^7-8 hatu wabiabu Davĩ hawẽ detenamenikabu yuikĩ: “Jebuseu nawabu hatu detekĩ keyuirã, ha hene habakaĩti wanibu anu dasibibu hanu hiki keyubaĩ ha Jebuseu nawabu bekũbu inũ txãtubu ẽ hatu danãhairai nuku nemaibu hatu tenaĩ bukãwẽ”, hatu wa haska hatu yuia hene habati wakĩ mishkiwẽ buyabainibu baiwẽ hikibaĩ hatu maemakĩ atxi keyutã Davĩ Sião kenebaunibu hawena wanikiaki. Ikis Jerusalém anu mananã kenebaunibu kena betsa wakĩ: “Davĩ Maeki”, amisbuki. Ha dikabi Davi hari hãtxaniwẽ taea tsuãra yuikĩ: “Senhor Deusũ kẽwãti hiwe hemaĩtĩ kenekauna anu bekũbu inũ txãtubu hikitibumaki”, ikĩ hatũ beyawẽ yuikubaĩmisbuki.

⁹ Ha mananã mishki kenebaunibu anu hawenabube Davi hiweabu hatu kenakĩ: “Davĩ Maeki”, akaibũ ana mishkiwẽ hatu kene nati amakatsi ikĩ Davĩ hatu yunua nortekiri mishki kene sheni Milo anua ana hatu txitximabaũkĩ mai inũ mishki ture sharabuwẽ mai pãpa wakubaĩkĩ tapaiti keska wakĩ mishki kene bena wakĩ hanu Davĩ hiwe bena ewapa hawẽrua hatu amashanai anu kebẽ nati akĩ deshũ wabaũkĩ kene sheniki meshti anibukiaki.

Nawa betsa Hirão hawẽ hãtxashunikabu Davi anu hatu yununikiaki, na hãtxarã

¹⁰ Senhor Deus kushipa dasibi binuatũ Davi merabewaiwẽ taea shanẽ ibui Davi ana kushipai ewakũkainaya

¹¹ haskai nĩkatã hawẽ datekĩ maewã betsa Tiro anua shanẽ ibuhaira betsa hawẽ kena Hirão hawẽ shanẽ ibu beshmasbu habu nãtabua hãtxashũmisbu Davi anu hatu yunua, hi dayamisbu inũ mishki pewamisbu shanẽ ibu beshmasbũ hatũ tsumabu hi sẽke hatu bumashũ Davi hiwe hatu wamashũkĩ mishki tapa ha dukũ sapa wakĩ pewamatã hanushũ kusha tuash itxapa washĩshũ hawẽ hiwe ewapa hawẽrua Davi ashũkĩ keyutã inũ buaibũ

¹² haska Senhor Deusũ Davi shanẽ ibuwakĩ katuimashũ hawenabu Israelkiri Deusũ hatu mestẽwãmai inũ nãtakeshũ nĩkaibu hawẽ shanẽ ibukiri kushipai Davĩ ibubis unãkĩ tapĩkubainikiaki.

Jerusalém anu maeimashũ Davĩ ana bake itxapa wanikiaki, na hãtxarã

¹³ Hebrom henebaini Jerusalém anu Davi hiweshũ ana aĩbu bikĩ betsa aĩ kayawakĩ inũ aĩbu betsa escrava betsa tibi Davĩ ana bitã huni bakebu inũ aĩbu bakebu hatu bawanikiaki.

¹⁴ Hawẽ huni bakebũ kenarã, Samua inũ, Sobabe inũ, Natã inũ, Salomão inũ,

¹⁵ Ibar inũ, Elisua inũ, Nefegue inũ, Jafia inũ,

¹⁶ Elisama inũ, Eliada inũ, Elifelete hatibu Jerusalém anua kainibukiaki.

Filisteu nawabu Davĩ hatu maemanikiaki, na hãtxarã

¹⁷ Hau hatũ shanẽ ibuhairanũ Israelĩ enabu dasibitũ Davi ma katuimabu Filisteu nawabũ nĩkatã habe detenamekĩ maemanũ ika yubakai itxabirã Davi benai buaibũ haskaibu nĩkatã mishki kenebaunibu kushipa anu hawẽ detenamenikabube Davi hikitã hunekẽ

¹⁸ hanua Filisteu nawabu bei Refains napãpa anua detenamenũ ika kebaunabũ

¹⁹ haska maniabũ Senhor Deus Davĩ yukakĩ: —Filisteu nawabube detenametãpa? Ea merabewakĩ mĩ ea hatu maemamai? Ea yuiwe— aka Senhor Deusũ kemakĩ yuikĩ: —Haa. Mia merabewakĩ ẽ mia hatu maemamaiwẽ taea hatube detenametãwẽ— aka

^20-21 hawẽ detenamenikabube kai Refains napãpa hawẽ kena bena Baal-Perazim anu Davi hikishũ hau hatu dete keyunũbũ hawenabu hatu yunua hawaira Filisteu nawabu maemabũ hatu haska wabu hawairabaĩkĩ hatũ yushibu dami betsa betsapa Filisteu nawabũ henebainaibũ hatũ dami betsa betsapa itxawakĩ Davi inũ hawenabũ hatu biãbainibukiaki. Hawaira hatu maemashuwẽ taeshũ Davĩ yuikĩ: “Pashku bai matahairabiranai txitewashũ tuea keska wakĩ eki sinataibu Senhor Deusũ hatu ea pua ashũshuki”, ashũ kenakĩ: “Baal-Perazimki”, anikiaki.

²² Hakia txipu Filisteu nawabu pashatani ana txĩtũbirã hanua detenameshinabu anu ana habianuri Refains napãpa anu hikitã detenamenũ ika kebaunabu

^23-24 haskaibu uĩtã Senhor Deus Davĩ ana yuka kemakĩ Senhor Deusũ yuikĩ: —Ana hatu bebũ bushũ hatu detenũ ika buyamakãwẽ. Hakia hatu dũkei hunebaũ hatũ petxiuria bei mushu shukua anu hikitã mã ma haskatanaya matu mamaki kauani ẽ banakainai nĩkatã ẽ ma matu bebushunai unãtã hawairabaĩ Filisteu nawabu detebaũshãkãwẽ, ẽ hatu matu tenãshunairã— aka

²⁵ hawẽ hãtxa nĩkatã habias Senhor Deusũ yunua Davĩ akĩ hawẽ detenamenikabubetã Filisteu nawabu maemakĩ hatu deteabu pashaibu Geba anua hatu detekĩ txibãkubaĩkĩ Gezer anu hatu henetani txĩtũtanibukiaki.