2 Samuel 20 - Kaxinawá Bíblia (BR)

Sebã hawenabu Davi hatu henemabainikiaki, na hãtxarã

¹ Belial anushũ Benjamimnẽ enabu huni betsa txakabu Bicrĩ bake hawẽ kena Sebã Judá hunibũ hãtxa hatu dabãmabaĩkĩ Davi henemabaĩkatsi hatube sinatai benikaũ hawẽ trombeta txã txã akĩ Israelĩ hunibu yuikĩ: “Txanima Jessé bakẽ Davĩ hamapai nũ bitirumaki. Israelĩ hunibuũ, Davi henebaini nukũ hiwe anu inũ bunãkãwẽ”, hatu wa

² hawẽ hãtxa nĩkatã Davi henebaĩkĩ Bicrĩ bake Seba txibãbainaibũ hakia Judá hunibu Jerusalém anuabu inũ dasibi Hene Jordão kesha anu hiweabũ mekebaĩkĩ Jerusalém anu Davi pe iyunibukiaki.

³ Hanua hawẽ hiwe ewapa hawẽrua Jerusalém anu Davi hikishũ hawẽ 10 nãtakea aĩ dayarubũ hawẽ hiwe hau mekeshunũbũ Davĩ hatu henebainima hiwe betsa anu hau hiwekubaĩshanũbũ Davĩ hatu maewa hanua hau habũ hatu uĩkĩ pe mekekubaĩshanũbũ hawẽ detenamenikabu Davĩ hatu yunushũ hatuwẽ nuikĩ piti inũ tari hatu inãbiakubaĩkĩ ana habu txutama hawẽ bene ma mawani keskabu tari hiweabu hatunabũ hatu uĩ hatuki batirubu hiwea habianua mawakubainibukiaki.

⁴ Hanushũ hawẽ detenamenika shanẽ ibu Amasa Davĩ kenashũ yunukĩ: —Judá hunibu dasibi itxawakĩ hatu yuikubaũtãwẽ. Shaba dabe inũ besti kaya hatu itxawabirani hatu iwei hushãwẽ— aka

⁵ hatu itxawatanũ ika kashiã hati shaba Davĩ yunushina binumai huriamawẽ

⁶ taeshũ Davĩ Abisai yuikĩ: —Absalãonẽ nuku akima binumakĩ Sebã nuku txakabuhairawatiruki. Haskawẽ taeshũ ẽ detenamenikabu nenu ẽ haya hatu iyukĩ Seba hanũ pashai hunenũ txibãtãkãwẽ. Nũ haska wama mae mishki kenebaunibu kushipa betsa betsapa anu hawenabube Seba pashai hikishũ hari huneshũ betsa betsapawẽ txakabuwakĩ nuku bika tenematiruki— aka

⁷ detenamenikabu Joabẽ yunumis inũ, Quereteu nawabu inũ, Peleteu nawabu shanẽ ibuhaira Davi mekemisbu inũ habu detenamea unãhairaibu hawẽ betsa Abisaĩ hatu katutã Seba txibanũ ika Jerusalém anu shanẽ ibu beshmas Abisaibe kaĩbaini bui

⁸ Gibeão anu mishkipãwã daka dapi hikiabũ hanu Judá hunibu hatu itani Amasa hatuki nukuaya, hanua Joabẽ hawẽ detenameti tari sawea hawẽ nanesheketiki matxatu txaipa hawẽ usũtiki usũkĩ mestẽwãtã Amasakiri kai hawẽ matxatu txaipa mekẽ yusmauri hawaira bitã tsumatã

⁹ parãkĩ daewanikapaikĩ Amasa tãtsu anũ, iwanã, hawẽ keshni txaipa mekẽ yusiuri tsumatã Joabẽ yukakĩ: —Hutxiĩ, haska mĩ kai petanai?— aka

¹⁰ Joabẽ hawẽ matxatu txaipa hayama dabanẽ Amasã hawa shinãma dateamakẽ Joabẽ hawaira hawẽ puku nashtu anu txatxikĩ maĩ di akĩ ukeri pesa Amasa maĩ tĩ ika puku sharabauni itimaskai unãshubira mawaya Joabẽ ana nameama hawẽ betsa Abisaibe kai Bicrĩ bake Seba txibaĩ buaibũ

¹¹ Joabẽ detenamenika betsa Amasã yura daka dapi nishũ beaibu hatu yuikĩ: —Tsuãra Joabe betxipaikĩ nukũ shanẽ ibuhaira Davi merabewakatsis ikĩ Joabe txibãkubaĩkãwẽ— hatu wapakeaya

¹² hakia bai putxinĩ Amasa himĩ iruma mawai dabeakeakeaya itxapa bei Amasa daka anu niti itã uiaĩbũ hanua buriabuma Joabẽ detenamenikã uĩkĩ unãtã Amasã yura sharabaĩ hamauri bai kesha hana dakakẽ tari keshtupawẽ atximatã

¹³ hawẽ yura ana uiãma Seba atxitanũ ika Joabebe bukĩ daĩbaĩbainaibũ

¹⁴ hanua Seba kai hatu benai Israel shukuabu tibi anu Sebã benakeakebainaya hawẽ epa Bicrĩ enabu Sebaki itxabaĩ maewã betsa hawẽ kena Abel-Bete-Maaca mishkiwẽ kenebaunibu anu habe hikiabu

¹⁵ Abel-Bete-Maaca anu kema anu detenamenikabu itxapa Joabẽ hatu iyushũ tsua pashatiruma wakĩ hatu kenebaũtã hanu mapekei inũ hanu butukaĩ pia kuĩwẽ hatu tsakati wakĩ mai mãtxĩkubaĩkĩ kene mati aki kanũ henetã dasibibũ mishki kenenibu berãkĩ maĩ niri anũ ika yubakaibũ

¹⁶ hawaira mae mishki kenebaunibu anu aĩbu unanepa kaĩkaũ nishũ “Huu!” akĩ hatu yuikĩ: —Ea nĩkakãwẽ. Ewẽ nuikĩ ea nĩkakãwẽ. Joabebe ẽ hãtxakatsis ikai ea yuishũkãwẽ, hau neri hununã— hatu wa

¹⁷ hatu haska wa Joabe yuiabu date duakabi Joabe maewã kenebaunibu anu dapi Joabe ka aĩbu unanepatũ yukakĩ: —Miarã, mĩ habiamẽ, Joaberã?— aka kemakĩ yuikĩ: —Haa, ẽ Joabeki— aka aĩbũ ana yuikĩ: —Ẽ mĩ dayaruwẽ taeshũ ẽ hãtxa ea nĩkayuwe— aka kemakĩ: —Ẽ mia nĩkai hãtxawe— aka

¹⁸ hãtxa wakĩ yuikĩ: —“Na maekiri nukũ shenipabũ yuikinã, tsuãra ha dukũ ha mae txakabuwariamarã, Abel-Bete-Maaca hau yukanũbũwẽ”, hatu wa haska na mae Abel anu beshũ hatũ txakabu yukaibu dasibi txakabu pewakĩ hatu keyushũkubainikiaki.

¹⁹ Nukũ maewã Israelĩ enabũ ewa keskaki. Nenu hawama unanuma nũ hiwemiski, Senhor Deus txibaĩ txĩtuãmarã. Nũ haskabiakẽ nukũ maewã yamawanũ ishũ mĩ nuku haska wai? Haskakĩ Senhor Deusũ maewãbiakẽ mĩ yamawakatsis iki ikai?— aka

²⁰ Joabẽ kemakĩ yuikĩ: —Eanã, ẽ haska shinãmaki. Yamawakĩ ẽ berã berã akatsi ikamaki.

²¹ Haska wakatsi ẽ yubakamaki. Hakia Efraimnẽ enabũ mananã mati matipa anua huni bestitxai hawẽ kena Sebarã, nukũ shanẽ ibuhaira Davi hau henebainũbũ hãtxa txakabukirãkĩ Israelĩ enabu Sebã hatu yunubirãshinaki. Ha besti txibãbirã atxinũ ika nũ hushiãki. Ha ea inãkãwẽ, mã ea inãkẽ matũ maewã henebaĩkĩ ẽ detenamenikabu ẽ hatu iyuairã— aka aĩbũ kemakĩ Joabe yuikĩ: —Peki. Kenebaunibu anushũ hawẽ bushka nũ mianu ureaiĩ— abaĩ

²² hawenabube itxashũ hawẽ unanepa hãtxawẽ hatu shinã betsa wama Seba atxishũ teshteshũ Joabe anu Sebã bushka urẽshunabu, bishũ hawẽ detenamenikabu hau henebainũbũ hawẽ trombeta hau txã txã anũbũ Joabẽ hatu yunua txã txã akaibu nĩkatã ha maewã henebaini huni tibi hatũ hiwe anu buaibũ hawẽ bushka Davi uĩmanũ ika Jerusalém anu Joabe txĩtũkainikiaki.

Davĩ shanẽ ibu beshmasbu hati inibukiaki, na hãtxarã

²³ Detenamenikabu Israel dasibi yunui Joabe shanẽ ibu ikũkainaya, hanua Quereteu nawabu inũ Peleteu nawabũ habũ Davi mekemisbu hatũ shanẽ iburã, Joiadã huni bake Benaia inikiaki.

²⁴ Hamẽ Adorãonẽ, hatũ hatu hamẽ hatu dayama txakayamakĩ yunumis hatũ shanẽ iburi ikũkainikiaki. Shanẽ ibu Davi keneshunikarã, Ailudẽ huni bake Josafá ikũkainikiaki.

²⁵ Haskakubainaibukiri habũ kaka tibi Seva hatukiri kenekubainaya hanua hawenabu Deusbe hatu hãtxashunikabu dabe Zadoque inũ Abiatar ikubainaibũ

²⁶ ha mae Jair anua Ira Deusbe hatu hãtxashunikã Davi merabewakubainikiaki.