2 Samuel 19 - Kaxinawá Bíblia (BR)

^1-2 Davi hawẽ bake mawashuwẽ taea nuihairai kasha txakayamaya Israelĩ enabu dasibibũ nĩka keyubaunaibũ Joabe anu ana kashũ yuiabu ha shabatiã detenamei maemanãbiakãshu hawẽ benimatima hatu punu nuka wakĩ keyuabũ

³ detenamenikabu betsaburi hatu maemama pashatani beasi dakeyabi hawa benimama hune maewã anu hikibirãbiranaibũ

⁴ Davi huĩti nishmahairakĩ hawẽ besu tariwẽ bepukutã bis bis iki kashakũkaĩkĩ: “Ẽ bake Absalãonẽ! Ẽ bake Absalãonẽ, ẽ bakerã, ẽ bakerã!” iki heneamakẽ

⁵ hanua Davĩ dĩtu anu Joabe kashũ yuikĩ: —Shanẽ ibuũ, mia inũ mĩ huni bakebu inũ, mĩ aĩbu bakebu inũ, mĩ aĩ betsa betsapabu inũ, mĩ escrava aĩ betsa betsapabu hau mawayamanũbũ miki sinataibu nemashũkĩ nũ mia merabewashu mĩ hatu dakewaii.

⁶ Minabu shanẽ ibu beshmasbu inũ, mia dayashũmisbu hawa hatukiri shinãma hatu danãkĩ mia tenãkatsis ishiãbu hatu bestiwẽ nuikĩ mĩ hatu betxipaibiai hakia mia betxipaiaibu mĩ habu danãkĩ dasibibu mĩ ma hatu uĩmaii, kasha txakayamakinã. Natiã nukubu nũ mawanũ mĩ nuku yunuti sharashuki, hau Absalão hiwenunã, haska mĩ nuiai keska shinãkinã.

⁷ Shanẽ ibuũ, kaĩriwe. Mĩ shanẽ ibu beshmasbu inũ mĩ dayarubu inũ mĩ detenamenikabu habũ mia txibãmisbu ikis dasibibu hatu benimawakĩ hãtxa pepawẽ hatu kẽwãwẽ. Mĩ hatu benimawamarã, dasibi pashai na habia meshu merã huni bestitxai mibe bashikuamaki. Senhor Deusũ nuku nĩkaya narã ẽ mia yubaii. Mĩ hatu ana haibuwakĩ benimawama mĩ bakeishtatiã taewai hawara txakabu mĩ mekubirani mia anua kaĩ na txakabu eskatiã pikuhairai mĩ uiaiĩ— akĩ hãtxa kushipawẽ yui keyua

⁸ hawẽ hãtxa nĩkatã kasha nesetã benitã kaĩkaini ka maewã hikiti shui beputi kesha tsaukẽ: “Shanẽ ibu Davi mae hikiti anu ma tsauaki”, itã txanibaunaibu nĩkatã Davi tsaua bebũ dasibibũ daewai beabu hanushũ hãtxa pepawẽ Davĩ hatu ana benimawanikiaki. Israelĩ enabu shukuabũ Absalão txibãbiai hatũ hiwe tibi anua pashaimabu

Jerusalém anu hau ana shanẽ ibunũ Davi itanibukiaki, na hãtxarã

⁹ habu Israelĩ enabu shukuabu tibi anua yurã kaiã ha iki yuinamei: “Ha dukũ nukuki sinatakĩ Filisteu nawabũ nuku itxakawakubaĩbiaibũ Davĩ nuku hatu nemashũkĩ hatu tenãkĩ keyuniki. Hakia hawẽ huni bake Absalãowẽ datei nukũ mai pakea Hene Jordão ukeri Davi pashai hunekainimaki.

¹⁰ Shanẽ ibu wakĩ hawẽ bake Absalão nũ katubiaimakẽ detenamekĩ ma nuku tenanãshinabuki. Shanẽ ibu Davi hau ana hushanũ hawa manakĩ nũ shinaĩ?” iake iakeaibũ

¹¹ haska yuikubainaibũ Hene Jordão ukeri Maanaim anushũri nĩka keyubaunaibũ Davĩ hiwe anushũri habias yuiaibu Davĩ nĩkatã Deusbe hawenabu hãtxashunika dabe Zadoque inũ Abiatar anu hawẽ hãtxa hatu bumakĩ Davĩ hatu yuikĩ: “Judá enabu anibu unanepabube hãtxakĩ ẽ hãtxa eska hatu ea yuishũkãwẽ: ‘Ẽ shanẽ ibui hiwemis anu ẽ ana txĩtũtirumẽkaĩ, shanẽ ibubube ea hãtxashũkãwẽ.’

¹² Habu yuikĩ: ‘Ẽ ana hawaki teatimaki. Hatiã mã ea iyuai? Hatishuĩra ẽ manatirumaki. Maturã, mã enabu kayabiki’, akĩ hatu hãtxa bumatã

¹³ hanushũ Amasakiri hãtxa bumakĩ yuikĩ: ‘Mĩ ẽ puĩ bakewẽ taea nũ habias namiki. Joabe shãtukũ ẽ detenamenikabũ mĩ hatũ shanẽ ibu ikũkaĩshanũ ẽ mia katui kakatsi shinaiĩ. Haska ẽ mia yubai nĩkawe. Ẽ mia yubashina ẽ mia akamakẽ Senhor Deusũ hau ea kupihairashanũwẽ’ ”, hatu wa Zadoque inũ Abiatarĩ habias hãtxa Davikiri hatu yuishunabu

¹⁴ haska nĩkatã Judá enabũ hunibu dasibibũ shinã betsa watã habiaskas shinãkĩ hatũ hãtxa Davikiri yuikĩ: “Shanẽ ibu Davirã, hau dasibi hawẽ shanẽ ibu beshmasbube Jerusalém anu hau txĩtũrikiranũwẽ”, ashiãbu

¹⁵ haskakẽ Davi txĩtũkiranũ ika Hene Jordão pukei huai Davi ana haibuwakĩ beyawakĩ merabewatanũ ika Judá enabu hunibu Gilgal anuabu i buaibũ

¹⁶ Benjamimnẽ enabu betsa Baurim anua kaini Gerã huni bake Simeĩ Judá enabũ ibuaibũ hatubetã ikĩ Davi daewatanũ ika hawaira hatube butukainaya

¹⁷ habũ txibaĩ 1.000 Benjamimnẽ enabu hunibu habe buaibũ habiatiãri Saulũ enabũ dayaru mekenika Ziba hawẽ 15 huni bakebu inũ hawẽ 20 escravo dayarubube kariai shanẽ ibuhaira Davi huriama habu dukũtũ

¹⁸ Hene Jordão pukebaĩ shanẽ ibuhaira Davĩ enabu inũ hatũ mabu beshunũ ika bushũ mabu pewabu kemawatã hene pukematãtãkĩ haska wakĩ hatu merabewaya hakiri Davi pe shinãyã Hene Jordão Davi pukenũ ika kapanã Simei hatũ mishki puta puta akima kai Davi bebũ maĩ di ika beushũ datekĩ

¹⁹ yuikĩ: —Shanẽ ibuũ, txakabukĩ ẽ kanehairaimaki. Jerusalém anua mĩ kaĩkiranaya ẽ mĩ dayarubia mia txakabuwakĩ ẽ mia itxa itxa akima ea shinãma ea hakimashũwẽ, ana eki sinatati huneamarã, haska ẽ mia yukairã.

²⁰ Ẽ ibubis txakabuima ẽ unaĩwẽ taea José enabu inũ Israelbu dasibibũ mia danãbiaimabũ mĩ nukũ shanẽ ibuhaira eã dukũ mia inũ ika ẽ hushuki— akaya

²¹ hanushũ Davĩ pui Zeruiã huni bake Abisaĩ Davi yuiriakĩ: —Mĩ nukũ shanẽ ibuhaira Senhor Deusũ katuni Simeĩ yupukĩ mia atimapa waimawẽ taea ikis na habiatiã hau mawanũwẽ— ikaya

²² hakia Davĩ kemakĩ yuikĩ: —Zeruiã bakebuũ, haska ha hunĩ kaneimarã, matunamaki. Haskakĩ mã ea nemashũkatsis ikai? Israelĩ enabu dasibi ẽ ana hatu shanẽ ibushuni kai ikis ẽ pe shinaĩwẽ taea txanima Israelĩ enabu tsuabura na shabatiã ana mawatirubumaki— hatu watã

²³ Simei uĩkĩ yuikĩ: —Senhor Deusũ ẽ shinã unãyã mĩ txakabuimawẽ taea ikis mĩ mawamaki, ẽ mia yubairã— akaya

²⁴ hanua Mefibosete Saulũ bababiakẽ hawẽ bake keskakiri shinãmisbu hari hatubetã ana beyawakĩ itanũ ika kariai, Davi pashai taekainaitiã Mefibosete Daviwẽ nuihairai hatiã ana hawẽ yura hatu mekemama hawẽ tae ana txukisma inũ, hawẽ keshni ana aisma inũ, hawẽ tari ana hatu patsamaisma Davi unanuma txĩtũkiranaya hawẽ yura hawẽruama

²⁵ Jerusalém anua kaĩkirã Davi ma hikia yukatanũ ika Mefibosete hushũ Davi yukatushia: —Mefibosetẽ, haskai mĩ ebe kama ikimamẽ, ẽ pashai kayarã?— aka

²⁶ hatũ daewanũ, iwanã, yuikĩ: —Ẽ shanẽ ibuũ, ẽ dayarũ ea paraĩmaki. Haki katsaumekaini mibe kanũ, iwanã, ẽ jumento anu hau ea kabekãshunũ ẽ dayaru ẽ yunuimaki, ẽ tae babuwẽ taeshunã.

²⁷ Hakia ea ashuãmabia mia anu ka ekiri txanitxakakĩ mia parãtanimaki. Haskabiaimakẽ mĩ ẽ shanẽ iburã, mĩ Deusũ nai tsuma keskawẽ taeshũ haska mĩ pe shinaĩ mĩ ashanaii.

²⁸ Ẽ hutxi Saulũ mia tenãpai iniwẽ taea ẽ hutxi Saulũ enabu mĩ hatu tenã keyutirubia ewẽ nuikĩ mĩ tapu anushũ ea pimakubaĩkatsi mĩ ea kenatã mĩ ea yubaniki. Haskawẽ taeshũ hawara betsa ẽ mia ana yukatirumaki— aka

²⁹ ana hakiri shinãma shanẽ ibuhaira Davĩ kemakĩ yuikĩ: —Mĩ hutxĩ basi bai inũ yunu bai hau mã pashkashanũbũ mia inũ Ziba ẽ yunubainimaki. Ẽ mikiri shinã betsa wamawẽ taea hamẽmẽ nũ ana hãtxatirumaki— aka

³⁰ haska wabia Mefibosetẽ ana yuikĩ: —Israelĩ enabu dasibi ana yunukubaĩshanũ ika mĩ hiwe anu hawama unanuma mĩ ana txĩtuaĩwẽ taea miwẽ besti ẽ benimahairaiwẽ taeshũ Zibã bai dasibi ibuwatiruki— ikaya

^31-32 hanua huni betsa hawẽ kena Barzilai Gileade anua kaini anibuhaira 80 bariya basi bai inũ yunu betsa betsapa bai itxapa inũ dayaru mirima hayawẽ taeshũ Maanaim anu Davi hiweyuaya hawẽ ushati inũ tari inũ yunu inũ inabu betsa betsapa Davi inũ hawenabus inãkubainaya atimas Jerusalém anu Davi kaya nitxĩtanũ ika Barzilai hawẽ mae Roguelim anua butukirã shanẽ ibuhaira Davi nitxĩ Hene Jordão pukebaĩ kesha betsauria txĩtũkirãkatsi Barzilaĩ Davi yuikĩ: —Ẽ ma kaii— aka

³³ hawẽ haibu uĩ hawẽ nuikĩ shanẽ ibuhaira Davĩ Barzilai yuikĩ: —Jerusalém anu ebe kawe. Hanu mĩ ebe hiweaya ẽ mia pe mekekubaĩshanaii— aka

³⁴ hakia Barzilaĩ kemakĩ yuikĩ: —Mĩ ea pehaira yuibia ẽ shanẽ ibube Jerusalém anu ẽ katirubia ana hatira bari ẽ hiwetiru hayamaki, ma ẽ mestebuwẽ taearã.

³⁵ Earã, ẽ ma 80 ano hayaki. Piti inũ nushuti nis meama ma ẽ hãpaismaniki. Haskawẽ taea nis inũ paisma haratura ẽ yuitirumaki. Ha dikabi hunibu inũ aĩbuaibu kãtaibu shabakabi ẽ ana hatu nĩkatirumaki. Haska kakĩ mĩ ẽ shanẽ ibu ẽ mia bika tenematirumaki.

³⁶ Mibetã besti Hene Jordão pukebaini ẽ kaii. Haskakĩ ha manakuti mĩ ea ashũkatsis ikai? Hamẽmẽ ẽ katiruki.

³⁷ Ea haska wama ea henewe. Ẽ mae anua ẽ mawa hau ẽ ibubube ea maiwashanũbũ ẽ kai, ea nemayamawe. Hakia shanẽ ibuũ, dayaru betsa mĩ hayaki, ẽ huni bake Quimãrã. Mibe kaya haska mĩ shinaĩ amakĩ yunukubaĩshãwẽ, hau mia nĩkanunã— aka

³⁸ shanẽ ibuhaira Davĩ kemakĩ yuikĩ: —Peki, ha ebe nitxĩwẽ. Hawara pepa shinãkĩ mĩ hãtxa mĩ ea bumaya mĩ bake ẽ ashũshanaii. Hawara mĩ ea yukai ẽ mia ashũshanaii— atã

³⁹ huni dasibi Hene Jordão pukebainaibũ shanẽ ibuhaira Davi pukekaĩ hatũ beyawẽ taeshũ Barzilai ikushũ tãtsu atã pe nitxiã hawẽ mae anu Barzilai txĩtũkaini atimas hikiaya,

⁴⁰ Gilgal anu shanẽ ibuhaira Davĩ Quimã iyui kai hikikẽ Judá enabu detenamenikabu inũ Israelĩ enabu betsabu shukua detenamenikabu namakis habu pashama niti ikimabu Davi inũ ika Gilgal anuri bunibukiaki. Saul mawaimakẽ Hebrom anu Judá enabu yunui Davi shanẽ ibui taeaya Israelĩ enabu 10 shukuabu Jerusalém nortekiri hiwebaunabu ibubis kenai: “Nũ Israelĩ enabu kayabiki, Judá enabu nuku anua ma tari pashkaburã, inibuwẽ taea 10 shukuabu norte hiwebaunabu Israelki”, akĩ Jerusalém dapi inũ sulkiri hiwebaunabu: “Judáki”, akĩ kenakĩ taewanibukiaki.

⁴¹ Gilgal anushũ shanẽ ibuhaira Davi uinũ ika Israel shanẽ ibubu inũ hatũ anibu unanepabu dasibi Davi anu bushũ yukakĩ: —Mia inũ minabus inũ habũ mia txibãmisbu hatu ikĩ Hene Jordão matu pukemai bukĩ haskakĩ nukunabubia nuku hũtãbaĩ: “Inũ bekãwẽ”, ikama hatunas mia wai Judá hunibũ hatũ mesti shanẽ ibuyakanimẽkaĩ, mĩ nukũ shanẽ iburibiakenã?— akaibũ

⁴² Judá hunibũ nĩkatã Israelĩ hunibu yuikĩ: —Hamẽmẽs mã nukuki sinatatirumaki. Habia nukunabi kayabi nukũ shanẽ ibu nũ itãshinaki. Hawawẽ dabanã mã nukuki sinatai? Nũ shanẽ ibũ piti pishiãmẽ? Hawẽ hawa nũ bishiãraka. Nuku hawa inãmaki— akabu

⁴³ ha ikĩ Israelĩ hunibũ kemakĩ yuikĩ: —Matunabubia mã haska shinãmakẽ nukũ shanẽ ibũ nuku dasibi mekemiswẽ taea nukũ dukũ ikatsi nũ shinã taewashinaki, 10 shukua nũ matu binuabunã. Maturã, mã shuku bestitxaiki. Haskakĩ mã nuku danaĩ? Davi shanẽ ibuhairawanũ, iwanã, ana iweti shinãkĩ nuku dukũtũ nũ shinãshinaki, matu dukũmarã— hatu wabu txanima shinã pewabiai ha ibukuni Israelĩ hunibu binukĩ hãtxa kushipawẽ Judá hunibũ hatu ha a txakayamanibukiaki.