2 Samuel 18 - Kaxinawá Bíblia (BR)

Detenamekĩ Joabẽ Absalão tenanikiaki, na hãtxarã

¹ Hawẽ detenamenikabu hatu unãti wakĩ dasibibu Davĩ hatu tana keyukĩ ha dukũ 1.000 huni shukuabu tibi pashka keyutã shukuabu tibi anua huni bestitxai shanẽ ibu wakĩ keyuriatã hanushũ ana hatu pashka betsa wakĩ 100 hunibu tibi shanẽ ibu beshmas hatu katumariatã

² dasibibũ detenamenikabu shanẽ ibuhaira dabe inũ besti katukĩ Zeruiã bake Joabe inũ, Joabẽ betsa Abisai inũ, Gate anua Filisteu nawa Itai katushũ hau hatu yunukubainũbũ hati shukua detenamenika Joabe anu yunukĩ hati shukua betsa habiatiri detenamenika Abisai anu yunukĩ hati teshekãshu habiatiri detenamenika Itai anu yunukĩ keyutã hawẽ detenamenikabu dasibi Davĩ hatu yuikĩ: —Mã detenamei kayarã, ẽ matube kaii— hatu wa

³ hakia habũ kemakĩ: —Haskamaki. Shanẽ ibuũ, nukube kayamawe. Nuku deteaibũ nũ pashaimẽkaĩ. Nuku namakis tenãkanimẽkaĩ. Absalão inũ hawenabũ nuku detenũ ika huama hakia mia besti tenãkĩ yamawakatsis ikanikiki. Haskakẽ mia mĩ nukũ shanẽ ibu nũ mia mekei yaushihairaii, nuku 10.000 keskarã. Haskawẽ taea mĩ nukũ shanẽ iburã, na habia mae mishki kenebaunibu anu mĩ niti ika pehairaki. Na habianushũ betsabu mĩ hatu yunutiruki, hau nuku merabewai bunũbunã— akabu

⁴ hatũ hãtxa pe nĩkatã shanẽ ibuhaira Davĩ hatu kemakĩ: —Hawara pe mã shinãkĩ mã ea yunubaina ẽ matu ashũtiruki— hatu watã hawaira hikiti shui anua kaĩtã Davi shabakã nishũ hatu uiãyã detenamenikabu shukua tibi 1.000 pashkashu 100 tibi hatũ shanẽ ibuya maewã Maanaim anua kaĩbaĩbainaibũ

⁵ Joabe inũ Abisai inũ Itai habu tibi kaĩriabainaibu Davĩ hatu yuikĩ: —Mã ewẽ nuaiwẽ taeshũ ẽ bake Absalão atxitã ea pe mekeshũtãkãwẽ— hatu wapakeaya haska Absalãokiri Davĩ hatu yunuai dasibibũ nĩkabaĩbainaibũ

⁶ Absalão Israelĩ enabu shanẽ ibushunaya hawẽ detenamenikabube detenamenũ ika maĩ bui Efraim pashku napãpa anu ni shukua tsukus anu Davĩ enabu inũ Absalãonẽ enabu nukukunãtã detenamei taei

^7-8 Davĩ enabũ hatu maemakĩ detekĩ mirima tenãkubaini mai pakea hirabi anua hatu detekubaĩkĩ matxatu txaipawẽ mawaira shabakãshũ hatu tenãtirubumabia pashai bui ni shukua tsukus anu hiki irui yumaĩbu mirimahaira hatu tenãbu habias shabaki 20.000 hunibu mawanibukiaki.

⁹ Detenameaibu napumã Absalão mulo katsaumea kaĩkainaya atxitanũ ika Davĩ enabu hatxũ kushibaĩkĩ txibãbainabu muloki katsaua Absalão pashai kushikaini hi ewapa pũyã tiniã tebebakaĩkĩ Absalãonẽ bu txaipa hi pũyã tuashki ustãkĩ yabukĩ mestẽwã dunukẽ mulo besti ha mais kushikainaya

¹⁰ Joabẽ detenamenika betsã Absalão dunua uĩbaini kashũ Joabe yuikĩ: —Absalão hi pũyãki hawẽ buwẽ yabukutã dunua hukĩ ẽ uĩbiranaii— aka

¹¹ kemakĩ Joabẽ hawaira yuikĩ: —Uĩbiakĩ hawakĩ habianua tenãkĩ mĩ maĩ pakeama ishumẽ? Mĩ haska wabiranaya benimakĩ 10 prata pei heshe ewapa inũ txinesheketi bena hawẽrua ẽ mia inãkeanaii— aka

¹² hakia ha hunĩ Joabe kemakĩ yuikĩ: —1.000 prata pei heshe mĩ ea inãbia nukũ shanẽ ibũ bake ẽ hawa haki sinatakĩ itxakawãtirumaki. Hawẽ bake Absalão mekenũ ishũ nukũ shanẽ ibuhaira Davĩ mia inũ Abisai inũ Itai matu yunuai dasibitũ nũ nĩkabiranaki.

¹³ Haska mĩ ea yunuai keska ẽ abirãshurã, ẽ hamẽ akeãshuki. Hakia dasibi yuka imiswẽ taeshũ nukũ shanẽ ibu nũ parãtirumaki. Tapĩtã hawẽ bake ẽ tenanãkẽ hau ea kupinũ hatu yunuaya miã mĩ ea hawa nemashũtirumaki— aka

¹⁴ Joabẽ kemakĩ yuikĩ: —Hatishuĩra hamẽ ẽ mibe hãtxatirumaki— abaĩ Absalão dunua anu kashũ hashi dabe inũ besti bushũ hawẽ huĩti anu ha dabe inũ bestiwẽ txatxi txatxi aka mawai shãkã ikaya

¹⁵ hanua 10 hunibu habũ Joabe merabewaibu kaĩbirã Absalão keshebaũshũ namekĩ txatxi txatxi akabu mawaya

¹⁶ hatũ mimawati trombeta hau txã txã anũbũ Joabẽ hatu yunua txã txã akaibu nĩkatã Absalãonẽ Israelĩ enabu detenamenikabu txibãkĩ hatu detekubainaibu henetã Joabẽ hatu ma kenawẽ taea Joabe anu txĩtũbiranaibu

¹⁷ Absalãonẽ yura buteshũ bukĩ ni tsukus anu kini ewapa anu hawẽ yura putatã, mishki tũku sharabu bitã bitãkĩ hawẽ yura atximakĩ haki maspu wakĩ keyatapawabu hatũ shanẽ ibu Absalão ma mawa unãtã Israelĩ enabũ habũ txibãkubaĩshinabu datei hatũ hiwe tibi anu hunei pashai buake buakenibukiaki.

¹⁸ Absalão mawariama hiweyushũ hatu yunukĩ: —Ẽ huni bake hayama ikikaimẽkaĩ. Haki ẽ kena ẽ netaĩ mishki keyatapa ea washũkãwẽ— hatu wa mishki keyatapa nitxĩshũkĩ ha napãpa hawẽ kena Shanẽ Ibuhairatũ Napãpa anu nitxĩshunabu hanu hawẽ kena shinãpaketi haki hawẽ kena netanikiaki. Natiã ha mishki shinãmati keyatapa uĩkĩ kenakĩ: “Absalão Shinãmatiki”, ikubaĩmisbuki.

¹⁹ Absalão ma mawakẽ Deusbe nukunabu hãtxashunika Zadoque huni bake Aimaásĩ Joabe yukakĩ: —Ha haki sinatai Senhor Deusũ hatu maemakĩ pewashũshurã, hawaira kaĩ nukũ shanẽ ibuhaira anu kushikaĩ yuitãpa?— aka

²⁰ hakia Joabẽ kemakĩ yuikĩ: —Ma nukũ shanẽ ibuhairatũ bake mawashu haki txanikĩ datekĩ mĩ punu nukawai katirumaki. Shaba betsatiã kaka betsa bui mĩ ana txanikũkaĩshanaii. Ikis huni betsa kayutiruki— atã

²¹ dabekekaũ hawẽ detenamenika betsa Etiópia nawa yuikĩ: —Haska mĩ uĩshu nukũ shanẽ ibuhaira hawaira kushikaĩ yuitãwẽ— aka Joabe bebũ ha Etiópia nawa dãti ika benitã kushikainaya

²² hawẽ shinã betsa wakatsi ikama Aimaásĩ Joabe ana yuikĩ: —Habiaskabiakẽ Etiópia nawa itxũ txibaĩ kushiriakaĩtãpa?— aka hakia Joabẽ kemakĩ ana yuikĩ: —Haskai katanũ ika mĩ ea ikai? Ea nĩkawe. Mĩ shanẽ ibu banabimabia hawẽ manakuti mĩ bitirumaki— aka

²³ Aimaásĩ kemakĩ: —Haska txanima mĩ ea yuibia nĩkamas ẽ ha itxũ kushikainaii— aka hawẽ shinã unãkĩ Joabẽ yunukĩ: —Peki. Txibaĩ kushikaĩtãwẽ— aka pãpa anu kushikaini Aimaásĩ Etiópia nawa daĩbaini ha dukũ bebui kaya

²⁴ maewã hikiti shui beputi dabe namakis anu Davi tsaukẽ ha hikiti shui mekenika ha mishki kenebaunibu beputi mamaki mapekekaĩ nishũ teskãshũ txaihaira uĩkĩ huni bestitxai kushikiranai betxitã

²⁵ hui kushipawẽ shanẽ ibu banabima, benimakĩ shanẽ ibuhaira Davĩ yuikĩ: —Huni bestitxai hukĩ kakape beikiki— aka

²⁶ mekenikatũ huni ha katxu kushikiranai uĩkĩ ana hui kushipawẽ yuikĩ: —Huni betsari kushikiranikiki— aka shanẽ ibuhaira Davĩ ana kemakĩ: —Habiatũri kakape beikiki— aka

²⁷ hawẽ mekenikã ana yuikĩ: —Hari kushikiranai ẽ uĩmis ẽ unaiĩ. Zadoquẽ huni bake Aimaáski— aka shanẽ ibuhaira Davĩ kemakĩ yuikĩ: —Harã, huni pepaki. Txanima kakape beikiki— aka

²⁸ Aimaás txaima kematã shanẽ ibuhaira Davi bebũ maĩ beutushitã beti ishũ yuikĩ: —Unanuma hiwewe. Mĩ shanẽ ibu mia mebĩkatsi ikaibu nuku hatu maemamakĩ keyushuwẽ taeshũ mĩ shanẽ ibũ mĩ mekenika Senhor Deus ha besti kẽwanãwẽ— aka

²⁹ hawẽ hãtxa nĩkabiakĩ Davĩ hawaira yukakĩ: —Ẽ bake Absalãonã, haska pe kayamẽ?— aka Aimaásĩ kemakĩ yuikĩ: —Mĩ tsuma Joabẽ mia anu ea nitxiãyã itimaskahairaibu ẽ nĩkabirãshuki. Hakia haskakãshu ẽ unãmaki— aka

³⁰ nĩkatã shanẽ ibuhaira Davĩ yunukĩ: —Benikaũ ukeri nishũ manayuwe— aka haska yunua Aimaás ikaya

³¹ habiatiãri Etiópia nawa hikishũ shanẽ ibuhaira Davi yuikĩ: —Shanẽ ibuũ, kaka pepa ẽ mia yuiaii. Nĩkawe. Mia pepa washũkĩ dasibi miki sinataibũ kushipa nemakĩ hatu maemakĩ nũ keyushuki— aka

³² Etiópia nawa shanẽ ibuhaira Davĩ yukakĩ: —Ẽ bake Absalãonã, haska pemẽ?— aka Etiópia nawã yuikĩ: —Miki sinataibu inũ mĩ shanẽ ibu mia mebĩkatsis ikaibu inũ mia txakabuwanũ ikaibu ha huni ishu keskai hau ikubaĩshanũbũwẽ— aka

³³ hawẽ bake ma mawa unãtã huĩti meteshekei nishmahairatã mae hikiti shui mamaki dĩtu betsa manaũri anua kashanũ ika kai tapaitiwẽ inakaĩkĩ yuikĩ: —Ẽ bake Absalãonẽ! Ẽ bake Absalãonẽ! Mĩ shãtukũ ea ẽ mia mawashũpanã mĩ mia mawashuki. Ẽ bake Absalãonẽ! Ẽ bake Absalãonẽ!— ikũkaini dĩtu merã hikia kasha txakayamaya