2 Samuel 17 - Kaxinawá Bíblia (BR)

Aitofelĩ yuba hãtxa Husaĩ itimaskawanikiaki, na hãtxarã

¹ Hanushũ hawaira merabewakatsi ikĩ Aitofelĩ ana Absalão yuikĩ: —12.000 detenamenika pepabu hatu katunũ ishũ ẽ shinaiĩ. Na habias meshu merã Davi detetanũ ika hatubetã ẽ txibãkatsi ikaii.

² Ikis Davi inũ hawenabu babua punu nuka maniabu hatu datetushikĩ hawaira nũ hatu tenãtiruki. Datei hawenabu dasibibũ henebaini pashaibũ hatũ shanẽ ibuhaira Davi besti nũ tenãtiruki.

³ Huni bestitxai mĩ tenãkatsis ikaii. Nũ mia haska washunaya mĩ epa ana hayamakẽ Israelĩ enabu ẽ mia daewashũshanaii, hau mia ana danãyamanũbunã. Haskawẽ taea dasibibu unanuma hiwekubaĩshãkanikiki— aka

⁴ Absalão inũ anibu unanepa merabewanikabũ nĩkatã hawẽ yubati hãtxa pe betxipaiaibũ

⁵ hakia hawẽ shinãri hau hatu yuiyunũ Arqueu nawa Husai hau kenatanũbũ Absalãonẽ hatu yunua yuitanabu

⁶ Absalão anu Husai hua Aitofelĩ haska hãtxa yubakĩ yuishũshu Absalãonẽ Husai yukakĩ: —Haska Aitofelĩ ma nuku yubashurã, hawẽ hãtxa txibãkĩ nũ atirumẽ? Nũ atirumaraka. Haskara miã mĩ shinaĩmẽkaĩ, nuku yuiwe— aka

⁷ kemakĩ Husaĩ yuikĩ: —Haska shinaĩ pe yuibiamis ikis haska yubakashurã, pemaki. Ẽtseri mia yuinũ nĩkawe.

⁸ Mĩ epa inũ hawẽ detenamenikabu mẽtsisipa pubẽhairabuki. Ursa yushã pubẽ hawẽ bakebu biãbainabu pubẽhairakĩ benai keskai sinatai mĩ epa mesehaira dakaki. Mĩ unaiĩ. Ha dikabi mĩ epa ma detenamei beyawẽ taea hawenabube ushama hakia tari benãta hunea ushakũkainikiki.

⁹ Na habia ikis mishki tãpe merã kasmai, benãta tari hune anu ikaki. Hamẽ betsarã, detenamenikabu itxapama duakabi mĩ hatu yunua mĩ epã enabube detenamei mina hatiri mawakubainaibũ hakiri banabitã: “Davĩ enabũ ma minabu hatu maemakĩ keyuabuki”, iwanã, yuikubainaibu dasibibũ habiaskas shinãtirubuki.

¹⁰ Minabu pubẽ sinatabu inu betsa leão keskabia haska nĩkatã punu nukai babuhairashãkanikiki. Mĩ epa inũ hawenabu habũ txibãmisbu pubẽhairaburã, Israelĩ enabu dasibibũ unãhairakanikiki.

¹¹ Eã ẽ mia yusiainã, eska shinãkĩ ẽ mia yuiai nĩkawe. Israelĩ enabu huni dasibibu norte Dã anua inũ sul Berseba anua namakis hiweabu ianẽwã kesha mashiti keska mia anu hau itxai keyushanũbũwẽ. Ma mĩ hanu hatu itxawa mĩ epã enabube detenamenũ ika miã ibubis hatu yunui hatube kashãwẽ.

¹² Hanira kawanai haki nukutã nũ deteshanaii. Basnũwẽ basi metxa wamis keska wakĩ nũ hatu atxishanaii. Mĩ epa inũ hawenabu hunibu tenã keyukĩ nũ betsa heneama ishanaii.

¹³ Hakia mae betsa mishkiwẽ kenebaunibu anu pashai hikiaibũ Israelĩ enabu huni dasibibũ dispi bushũ hawẽ mishki kene tseka tseka akĩ keyutã dispiwẽ neatã sharabaĩbaĩkĩ pashku anu puta keyukĩ mishki bestitxai nũ henetirumaki, haska watã hatu dasibi tenãkĩ keyukinã— aka

¹⁴ haska wa nĩkatã Absalão inũ Israelĩ enabu anibu unanepabu yuinamei: “Aitofelĩ nuku yusiaĩ hãtxa pebia Arqueu nawa Husaĩ nuku yusiaĩ hãtxawẽ Aitofel binumakĩ pewaikiki”, inibukiaki. Absalão txakabuwamakatsi ikama Aitofelĩ yusiã hãtxa pepa Senhor Deusũ hatu txibãmakĩ amama inikiaki.

¹⁵ Hatu hãtxa wabaini kashũ hawẽ yusiã hãtxa Aitofelĩ Absalão inũ Israelĩ enabu anibu unanepabu hatu yuishu inũ hawẽ yusiã hãtxa hatu yuiriashu Deusbe hawenabu hãtxashunika Zadoque inũ Abiatar Husaĩ hatu banabimatã

¹⁶ ana hatu yuikĩ: —Davi inũ hawenabu hari tsua hiweabuma anu bushiãbu hau hatu tenãyamanũbũ hanua hene puketi pe anu ana ushama Hene Jordão kesha betsauri hau hawaira pukebaĩtanũbũ hawairakaĩ Davi hau yuitanũbũ matũ huni bakebu yunukãwẽ— hatu wa

¹⁷ Jerusalém anushũ hau hatu uĩyamanũbũ Deusbe hawenabu hãtxashunikabũ huni bake dabe Jônatas inũ Aimaás hatu yunukĩ nitxiã mae betsa Jerusalém binubaũ hawẽ kena Rogel anushũ manai maniabũ hawẽ dayaru aĩbu yuia ha aĩbu hawaira kashũ hatu yuia Davi yuinũ ika hawaira ha dabe kaĩbainaibũ

¹⁸ hakia haskabainaibũ berunã betsã hatu uĩtã ha dabetũ Davi banabimanũ ika buaibũ hawaira kaĩ Absalão banabima hatu yunua txibaĩbũ hanua habu bui mae betsa Baurim anu hatũ haibũ hiwe hemaĩtĩ anu hikitã, habianuri ũpash bimisbu kini mishki kenebaunibu anu hunei hikiaibũ

¹⁹ hanushũ hawẽ ainẽ beputi ewapawẽ hatu bepushũ ha mamaki shekiwã trigo shemeshina heshe barĩ wãkĩ beshna tsuã hawa unãmakẽ

²⁰ ha katxu hatu itxũ hatu benai Absalãonẽ dayarubu bushũ aĩbu yukakĩ: —Aimaás inũ Jônatasrã, hani bukãshumẽ?— akabu aĩbũ hatu beparãkĩ yuikĩ: —Nenu nuku daĩbaĩkãshuki, henekiri bukinã— hatu wa, henekiri bushũ benakubaũtani hatu betxiama Jerusalém anu txĩtũbainaibũ

²¹ ma buabu uĩtã hatu bepeãbu ũpash biti kini anua Aimaás inũ Jônatas kaĩbaini kushibaĩ shanẽ ibuhaira Davi anu bushũ yuikĩ: —Aitofelĩ hau matu tenaĩ benũbũ hatu yunushukiaki. Hawaira benitã hene pukeribaĩtãkãwẽ— hatu wabu

²² hatũ hãtxa nĩkatã Davi inũ hawenabu beni keyutã hawairabaini Hene Jordão ma puke keyubainabũ ma penakẽ hene kesha tsua ana hanu hayabumakẽ

²³ hawẽ yusiã hãtxa nĩkatã ashuãbumawẽ taea Aitofelĩ unãtã punu nukai huĩti nishmatã hawẽ jumentoki katsaumekaini kaĩkaini hanua kaini anu kashũ hanushũ hawẽ hiwe inũ hawẽ mabu inũ hawẽ yunu bai betsa betsapa hawenabus hatu yunu keyutã habiatiãri dispi bua hiki neshatã ibubis tenesheketã mawa hawẽ epa maiwanibu dapi maiwarianibukiaki.

Mae betsa hawẽ kena Maanaim anu Davi hikinikiaki, na hãtxarã

²⁴ Hene Jordão pukebaĩshina nortekiri bui maewã betsa hawẽ kena Maanaim anu Davi hawenabube hikiaya, hawẽ bake Absalãonẽ Israelĩ enabubetã Davi txibaĩ Hene Jordão pukeriabainaibũ

²⁵ Joabe Davibe kashiãwẽ taeshũ hawẽ detenamenikabu shanẽ ibu bena katukatsi ikĩ hau hatu bebushunũ Absalãonẽ Amasa katunikiaki. Amasã eparã, Ismaelĩ enabu betsa hawẽ kena Itra inikiaki. Itra Abigailbe txutanamemisrã, Abigail inũ hawẽ betsa Zeruia Naásũ bakebu inikiaki. Zeruia Joabẽ ewa inikiaki.

²⁶ Gileade mai pakea anushũ Absalão inũ Israelĩ enabu habe bushũ hatũ tari hiwe pũtebaunabũ

^27-29 Maanaim anu Davi kai hikitushiaibũ hatu betxibirãkĩ shinãkĩ: “Hari tsua hiweabumanua punu nuka, bunibirani ũpash manubirãkanikiki”, iwanã, hatu i pewakĩ hatu duawakĩ haki dakati inũ, mai kẽtxa inũ, mai kẽti inũ, hatũ piti shekiwã dabe trigo inũ, cevada duru inũ, tsui inũ, yusu ewapa inũ, yusu peshemishtĩ lentilhas inũ, buna bata inũ, awa txutxu katsai buspuai inũ, ina awa inũ txashuwã txutxu tãki Davibe beabũ hau pinũbũ hawẽ dayarubu hatu bumashuni Amom nawabũ mae hatũ kena Rabá anua Naásũ huni bake Sobi inũ, mae betsa Lo-Debar anua Amielĩ huni bake Maquir inũ, Gileade mai pakea mae betsa Roguelim anua Barzilai shanẽ ibũ ha dabe inũ bestitũ Maanaim anu Davi hikia betxibirã duawanibukiaki.