2 Samuel 16 - Kaxinawá Bíblia (BR)

Zibã Davi haibuwai habe hãtxanikiaki, na hãtxarã

¹ mati mananã atimas binubaini Davi ana kai, Davĩ haibu Jônatasã bake Mefibosetẽ dayaru hawẽ kena Ziba hawẽ hiwe anua kaĩkirani uĩtanũ ika Daviki nukui kakĩ jumento pepa dabe ha kabekãtiyaki 200 misi ewapabu saku tibiki nanekĩ inũ, 100 uva bimi tsusĩ tsãpawakĩ keshtu sharabu watã sakuki matawatã inũ, 100 bimi piti hushiã saku tibiri matawatã bitxi bishtu uva vinhori haki nanetã dũtãbaũkĩ beshe pewatã bui Daviki nukua

² dasibi uĩkĩ shanẽ ibuhaira Davĩ Ziba yukakĩ: —Haskakĩ na haska tibi mĩ beai?— aka daewakĩ Zibã kemakĩ yuikĩ: —Na jumento daberã, shanẽ ibũ enabus katsaumebaĩtirubuki. Misi inũ bimirã, berunãbu mĩ detenamenikabũ pitirubuki. Hanu tsua hiweabumanu bui hĩ ikĩ vinho atirubuki— aka

³ Davĩ ana yukakĩ: —Hania, mĩ shanẽ ibu Saul ipaunitũ baba Mefiboseterã?— aka Zibã kemakĩ yuikĩ: —Haska hawẽ hutxi Saul shanẽ ibukũkaini keska Israelĩ enabu dasibibũ shanẽ ibu wakĩ ana katutirubuwẽ taea shinaĩ ẽ tsuma Mefibosete Jerusalém anu bashikuyushuki— aka

⁴ hawẽ hãtxa nĩkatã: —Mefibosete ẽ pepawabiani ana hakiri shinãma hawẽ hamapai tibi Mefibosete hayani mebĩtã ikis dasibi ẽ mia yunuai minaki— aka Davi bebũ dãti iki beti ishũ Zibã kemakĩ yuikĩ: —Peki. Mĩ ẽ shanẽ ibu kayabiwẽ taeshũ mĩ ea merabewaya ẽ mia shinãkubaĩshanaii— aka

⁵ hanua Davi ana kai mae betsa hawẽ kena Baurim daĩbainaya huni betsa Saulũ enabu Gerã bake hawẽ kena Simei ha bebũ tashnikirã hawenabu inũ hawẽ tsumabu detenamenikabũ Davi mekebiabũ hãtxa txakabuwakĩ itxakĩ

⁶ Davi inũ hawẽ shanẽ ibu beshmasbukiri mishki tũku puta puta akubaĩkĩ

⁷ haki sinatahairakĩ yupukĩ Simeĩ Davi yuikĩ: —Miarã, mĩ huni pubẽ txakabuki. Nenu huama kawe, kawe— akĩ

⁸ —Saul shanẽ ibuai mebĩkĩ mĩ hawenabu txakabuwakubainiwẽ taeshũ Senhor Deusũ mia ma kupiaki. Mĩ shanẽ ibuai mebĩtã mĩ bake Absalão Senhor Deusũ shanẽ ibu waikiki. Ibubis mĩ txakabũ mia ma atxia miarã, mĩ huni betsã himi akubaĩmiski, hawa pepa wamarã— akaya

⁹ Zeruiã huni bake Abisaĩ Davi yuikĩ: —Haskakĩ ha huni kamã mawa pisi mayai keskakĩ mĩ ẽ shanẽ ibu mia yupukĩ yuaĩmẽkaĩ? Kashũ hawẽ bushka teshtetãpa?— aka

¹⁰ hakia shanẽ ibuhaira Davĩ kemakĩ yuikĩ: —Zeruiã bakebuũ, matu akamaki. Ea besti yupukĩ yuinũ ha huni Senhor Deusũ ma yunuamẽkaĩ. Senhor Deusũ ma yunuarã: “Haskakĩ mĩ shanẽ ibu yupukĩ yuaĩ?” akĩ, tsuã ha huni beshtetirumaki— atã,

¹¹ Abisai inũ hawẽ shanẽ ibu beshmasbu Davĩ ana hatu yuikĩ: —Ẽ bake kayabitũ besti ea tenãpanã ha huni Benjamimnẽ enabu dikabitũ ea yupuikiki. Nemayamakãwẽ, habiaska Senhor Deusũ yunuakirã.

¹² Haska ikis ea bika tenemaibũ Senhor Deusũ uĩkĩ ekiri pe shinãkĩ ea ana duawakubaĩshanimẽkaĩ, na yuputi hãtxa txakabu ẽ nĩkai keskamarã— hatu wabaini

¹³ Davi hawenabube bai tanabainaibũ manã matxi tãtãbaini kakĩ Davi yuãkĩ yupukubaĩkĩ mishki tũku inũ mai mishpu Davikiri Simeĩ puta puta akubainaya

¹⁴ Simei ana shinãma Davi inũ hawenabu bui Hene Jordão kesha anu niri itã punu nukabaina huĩrukuĩ maniabũ

Jerusalém anu Absalão hikinikiaki, na hãtxarã

¹⁵ Jerusalém anu Absalão hikinũ ika kaya Israelĩ enabu itxapabu inũ Aitofel txibaĩ buaibũ

¹⁶ hanua unuriari Davĩ haibuhaira Arqueu nawa Husai Absalãoki nukui hui kushipawẽ yui sai ikũkirani: —Nukũ shanẽ ibui hiwekũkaĩshãwẽ! Hiwekũkaĩshãwẽ!— ikaya

¹⁷ metukĩ Absalão shinã txãkãma Husai yukakĩ: —Ea kẽwãkĩ ẽ epa mĩ haibuwanirã, ana shinãma mĩ ma putamẽ? Haskai mĩ habe kama ishiãmẽ?— aka

¹⁸ beparãkĩ Husaĩ kemakĩ yuikĩ: —Ẽ katirumaki. Hau shanẽ ibukũkaĩshanũ tsuara Senhor Deus inũ Israelĩ enabu dasibibũ ma katushinabe ẽ bashikuyuaii.

¹⁹ Ha dikabi tsua ẽ merabewatirumẽ? Mĩ ẽ haibũ bakeki. Haska mĩ epa ẽ merabewakubainima keska wariakĩ unanepa hãtxawẽ ẽ mia merabewakubaĩshanaii— aka hawẽ hãtxa Absalãonẽ nĩkatã

²⁰ hanushũ txipu Absalãonẽ Aitofel yukakĩ: —Ẽ epakiri nũ haskashanai? Hawa mã ea shinãmakĩ yusĩtirumẽ?— aka

²¹ Aitofelĩ kemakĩ Absalão yuikĩ: —Hawẽ hiwe hawẽrua hau mekeshunũbũ hawẽ 10 nãtakea aĩ hawẽ dayarubu mĩ epã hatu bashibaĩshina habu tibi txutã keyuwe. Mĩ haska waya Israelĩ enabu dasibibũ nĩkakĩ mĩ epa danãkĩ mĩ sinatamai unãshãkanikiki. Ha dikabi habũ mia txibaĩbu dasibibu ana benimashãkanikiki— aka

²² hawẽ yusiã txibãkĩ Davĩ hiwe hawẽrua mamaki tari hiwe wakĩ pũteshunabu Israelĩ enabu Jerusalém anu hiweshũ uiaĩbũ hawẽ epã 10 nãtakea aĩ hawẽ dayarubu tibi Absalãonẽ hatu txutãkubainikiaki.

²³ Haskakũkainaitiã hawara akatsi yukakubainabu Aitofelĩ hatu shinãshũkĩ kemaya ha dukũ Davĩ ikũwãpauni keska wakĩ hawẽ bake Absalãonẽ ikũhairawariakubainikiaki, Deus yukai keska wakubaĩkinã.