2 Samuel 15 - Kaxinawá Bíblia (BR)

Davi shanẽ ibu hawẽ bake Absalãonẽ mebinũ ika inikiaki, na hãtxarã

¹ Jerusalém anu Davĩ huni bake betsa Absalão hiwekũkaini ibubis shinã txakai keĩ shanẽ ibushanũ, iwanã, hawẽ cavalo tarãti pepa inũ cavalo kushipabu bitã 50 detenamenikabu katukĩ hatu tsumawatã ma hatu yunukubaĩmis

² penama tibi Absalão bututã hawẽ epa Davĩ hiwe anu hawẽ mae kenebaunibu hanu hikiti shui anu shaba tibi keshea Absalão nishũ shanẽ ibuhaira hawarakiri itxakanikatima Davĩ hau hatu pewashunũ yukakatsi hanu beaibu, bestibu hatu kenashũ Absalãonẽ hatu yukapakekĩ: “Haratu mae anua mĩ huai?” hatu apakeaya hatũ mae inũ haratura Israelĩ enabu shukua anua inũ haska shinãbirãkĩ shanẽ ibuhaira Davi hari yukai beaibu bebũkiri yuiabu

³ Absalãonẽ nĩkatã hatu yuikĩ: “Txanima hawara mĩ yukakatsi ikai peki, itxakanikatimarã. Hakia shanẽ ibuhaira mĩ yukai tsuã mia yuishũtiru hayamaki”,

⁴ iwanã, hatu yuikubaĩmis: “Eã matu merabewakĩ ẽ matu duawaya hawara yuka iki hau mã eanu beshanũbũ nukunabu dasibi shanẽ ibushuni ẽ matũ unãtinãkatsis ikai mã ea katutirumẽkaĩtsa”, ikĩ hatu yuikubainaya

⁵ tsuãra yukatanũ ika txaima huai hatũ beya txibãkĩ metaka atã haibuwakĩ ikushũ hatu tãtsu akubaĩmis

⁶ shanẽ ibuhaira Davĩ hau bika teneaibu hatu shabakabi pewashũshanũ Israelĩ enabu dasibi beaibu Absalãonẽ hatu nemakĩ haibuwakĩ hatu shinã betsamakĩ Davi hau ana shinãyamashanũbũ ibubis hakiri besti hatu shinãmakubainaya

⁷ hatu haska wakubaini 4 ano nitxĩtã hawẽ epa Davi anu kashũ Absalãonẽ yuikĩ: —Ẽ shanẽ ibuũ, haska ẽ Senhor Deus yubaima Hebrom anu kashũ ea atanũ ishũ ẽ mia yukaii. Katãpa?

⁸ Mĩ dayaru earã, Síria anu mae betsa Gesur anu hiweshũ yuikĩ: “Jerusalém anu ẽ ana hiweshanũ Senhor Deusũ ea yunua Hebrom anushũ txashuwã bake tesẽshũ txiwẽ menukĩ keyukĩ ẽ mia kẽwaĩ hushanaii”, akĩ Senhor Deus ẽ yubaimaki— aka

⁹ shanẽ ibuhaira Davĩ kemakĩ yuikĩ: —Unanuma katãwẽ— aka hakia Hebrom anu Absalão kariama ma hatu pewamis hari kakĩ

¹⁰ Israelĩ enabu shukuabu tibi anu hawẽ hãtxa bunikabu yunukatsi hatu yuikĩ: —Trombeta txã txã akubainaibu nĩkatã: “Hebrom anu ma shanẽ ibu bena dasibibũ Absalão ma katuabuki”, akĩ hatu yuiakeakebaũtãkãwẽ— hatu wa buabũ

¹¹ ha dikabi 200 hunibu Jerusalém anu hiweabu hawẽ hãtxa ikũwaĩ hawẽ txakabu unãriama Hebrom anu habe buriabũ

¹² txashuwã bake itxapa tesẽshũ txiwẽ menushũkĩ habetã Senhor Deus kẽwãtanũ, iwanã, Davĩ merabewanika betsa hawẽ kena Aitofel hawẽ mae Gilo anuarã, Absalãonẽ ha iyukatsi kena kashũ Absalãonẽ hatu yunua haskakubainaibũ Davi shanẽ ibu mebĩkatsis ikĩ Absalão kushipakĩ habũ txibãmis shaba tibi hatu itxawakubainaya

Jerusalém anua Davi hawaira pashanikiaki, na hãtxarã

¹³ haska Absalãonẽ akai unãtã hãtxa bunika Davi anu kashũ yuikĩ: —Israelĩ enabu itxapahairatũ Absalão txibanũ ishũ shinãkanikiki, shanẽ ibu wakatsi ikinã— aka

¹⁴ haska wa nĩkatã hawẽ shanẽ ibu beshmasbu dasibi Jerusalém anu habe hiweshũ mekeabu Davĩ hatu yunukĩ: —Dasibi menã hawaira tashniribainãkãwẽ. Nũ yane kamakẽ Absalão hukẽ nũ haskatã pashatirubumaki. Hawenabu beshũ nuku txakabuhaira wakĩ nenu Jerusalém anu nukube hiweabu nupe kenu txaipawẽ nuku dete keyui betirubuki. Menã burinãkãwẽ— hatu wa

¹⁵ hatũ shanẽ ibu kemakĩ yuikĩ: —Mĩ nukũ shanẽ ibuhairatũ haska mĩ nuku shinãshuna nũ mibe kaii— akabu

¹⁶ hanua Davi tashnikaĩkĩ hawẽ aĩ betsa betsapabu inũ, hawẽ bakebu hunibu inũ aĩbuaibu inũ, hawẽ shanẽ ibu beshmasbu inũ, hawẽ tsumabũ dayarubu hatu iyukĩ hawẽ hiwe hawẽrua hau habũ besti mekeshũkubainũbũ ha 10 hawẽ aĩ nãtakea habu dayashũmisbu habu besti bashibaini Jerusalém anua shanẽ ibuhaira Davi pashai kaĩkaini

¹⁷ habũ txibaĩbu dasibibube Davi kai maewã kesukauana hawẽ henea hiwe anu Davi hatube niti itã

¹⁸ hanushũ hawẽ shanẽ ibu beshmasbũ Davi hau keshebainũbũ ha dapi hatu nitxĩtã hanushũ hawẽ yura habũ mekemis Quereteu nawabu inũ Peleteu nawabu bebuaibũ ha katxu 600 detenamenikabu Geteu nawabu Davi dapi mapuabu Gate anua Davi dayashunũ ika habe benibu habe mapumisbu ha katxu hatu bebũ mapuriabũ

¹⁹ hatu haska waitiã huni betsa Filisteu Gate anua hawẽ kena Itai hushiã betxitã shanẽ ibuhaira Davĩ yuikĩ: —Haskai mia dikabi mĩ nukube huai, pashairã? Nawa betsa mĩ dama hushiã mĩ nukunabumaki. Haskamaki. Mĩ txĩtũkaĩtiruki, shanẽ ibu benabe unanuma hiweirã.

²⁰ Dama Jerusalém anu hiwetanũ ika mĩ hikishinaki. Haskawẽ taea: “Ebe kawe”, ẽ mia watirumaki. Hanira emebi ẽ kai ẽ unãmawẽ taeshũ mĩ nukube kanũ, iwanã, ẽ mia yuitirumaki. Minabu iyui mĩ hiwe anu txĩtũrikaĩtãwẽ. Mĩ haskakainairã, peki. Mĩ ewẽ nuiaya hau Senhor Deusũ mia duawakĩ merabewakubaĩshanũwẽ— aka

²¹ kemakĩ Itaĩ shanẽ ibuhaira Davi yuikĩ: —Mĩ mekenika Senhor Deus inũ mĩ ẽ shanẽ ibu matu dabe ikũwãkĩ ẽ matu txibaĩwẽ taeshũ ẽ mia yubaii. Hanira mĩ kaya mĩ dayarui ẽ mibe kaii. Mĩ hiwekẽ ẽ mibe hiweshanaii. Mĩ mawaya ẽ mibe mawariashanaii— aka

²² hawẽ hãtxa nĩkahairatã kemakĩ Davĩ yuikĩ: —Haskakenã, nukube kakũkaĩwẽ— aka habiatiãri Gate nawa Itai inũ habe beshiãbu Davibe bui

²³ Jerusalém anua kaĩbainaibũ hatu dapi hiwebaunabũ buaibu hatu uĩ hatuwẽ nui kasha txakayamaibũ Pashku Cedrom pukebainaibũ hatu txibaĩ shanẽ ibuhaira Davi pashku pukeriabaini hari tsua hiweabuma anu Davi bebushuni bai tanabainaibũ

²⁴ Pashku Cedrom pukeriabuma Deus hatube yubakani hãtxa aruni bau Levĩ enabũ iabainaibube Deusbe hatunabu hãtxashunika dabe Zadoque inũ Abiatar pashku kesha anu hatu bebũ buaibũ Abiatar dapi Deusũ hãtxa aruni bau tsauãbu Davibe bukĩ daĩbaĩbainaibũ

²⁵ shanẽ ibuhaira Davi kashũ Deusbe hatunabu hãtxashunika Zadoque yuikĩ: —Maewã Jerusalém anu Deus hatube yubakani hãtxa aruni bau bui txĩtũkaĩwẽ, Senhor Deus ewẽ nuikĩ ea merabewa ana txĩtũkirã hawẽ hãtxa aruni bau inũ hawẽ tari hiwe hania ẽ ana haki nukutirumẽkainã.

²⁶ Hakia ea hawa betxipaiama haska shinaĩ keska hau ea amashanũwẽ— iwanã,

²⁷ —Uiã. Mia inũ Abiatar Jerusalém anu matũ huni bake dabebe unanuma txĩtũbaĩritãkãwẽ, mia mĩ huni bake Aimaásbe inũ Abiatar hawẽ huni bake Jônatasberã.

²⁸ Jerusalém anushũ mã Absalão manaya enabube ẽ kaĩkirãshinaki. Hanu tsua hiweabumanu Hene Jordão napãpa puketi pe anushũ ẽ manayuaii, Absalãokiri haskarara hawẽ kaka mã ea yunuai manairã— hatu wa

²⁹ Levĩ enabu Deusũ hãtxa aruni bau hatu iamabaini Zadoque inũ Abiatar Jerusalém anu txĩtũbaĩshĩshũ harishũ manaibũ

³⁰ Olivas Mati anu hawenabube kai Davĩ hawẽ bitxi tae pekatã mapekei huĩti nishma kashai tariwẽ mayabukua kaya hanua habe buaiburi mapekeriai tariwẽ mayabukuria huĩti nishmari kashariakubainaibũ

³¹ Aitofel unanepatũ Davi merabewakubainima ana merabewama hakia natiã Absalão merabewaya Davi yuiabu hau Aitofelĩ haska shinaĩ Absalão amakatsi merabewakubainai hau haska amakatsi ikai Senhor Deusũ kanemashanũ Davĩ Senhor Deus dayuikĩ ea akaya

³² mati mamaki anu hanushũ Deus kẽwãmisbu anu Davi ma mapeketanaya unuria haki nukutanũ ika hawẽ haibu Arqueu nawa betsa Husai hawẽ tari ushnikia mai mishpuwẽ mapu tukua Daviki nukua

³³ Davĩ yuikĩ: —Ebe kakĩ ea hawa merabewamabia mĩ ana ea bika tenematiruki.

³⁴ Hakia Jerusalém anu txĩtũkaini kashũ nashi petã tari bena sawetã Absalão huai yuikĩ: “Shanẽ ibuũ, ẽ mĩ dayaruki. Habias mĩ epa ẽ merabewakubainima keska wariakĩ unanepa hãtxawẽ ẽ mia merabewakubaĩshanaii” akĩ haska Aitofelĩ shinãshũkĩ merabewabiamiskẽ miã hawẽ shinã betsa wamakĩ Aitofel ea nemashũkĩ mĩ ea merabewatiruki.

³⁵ Deusbe nukunabu hãtxashunika dabe Zadoque inũ Abiatarĩ ea merabewariakubaĩkanikiki. Shanẽ ibuhairatũ hiwe hawẽrua anushũ hawara dasibi nĩka keyukĩ matũ ea yuishũkubaĩshãkãwẽ.

³⁶ Hawara Zadoque inũ Abiatarĩ mia anua nĩkatã hatũ huni bake Aimaás inũ Jônatas yunuabu eanu beshũ habias hãtxa ea yuitirubuki— aka

³⁷ Davĩ haibu Husaĩ nĩkatã kai Jerusalém anu hikiaya habiatiãri Absalão shanẽ ibui haki txiti ikabube hikiriaya