2 Samuel 12 - Kaxinawá Bíblia (BR)

Natãnẽ Davi txitekĩ ha anikiaki, na hãtxarã

¹ Deusũ hawẽ hãtxa yuishunika Natã Davibe hau hãtxatanũ yunua ka haki nukutã ha bebũ nishũ Natãnẽ Davi yuikĩ: —Eska shabakabi mia miyuinũ ea nĩkawe. Mae betsa anua huni dabe hiweabu betsa mabuwãyã betsa mitanuma mabu eskarabesya

² ha mabuwãyã txashuwã inũ ina awa mirimahaira hayakẽ

³ hakia ha huni mitanuma txashuwã yushã pishta besti peiwẽ bima haya ibubis yumewakĩ hawẽ bakebubetã ewawakĩ habias kẽtxaki piai anua pimakĩ nushuai anua amakĩ hawẽ shutxi anu datãshũ ushãkĩ yumewakubaĩkĩ ha hunĩ hawẽ bake aĩbu betxipaikĩ akawaya

⁴ hanua shaba betsatiã huni betsa txai nimis bai tanabirani huni mabuwãyã hiwe anu uinũ ika hikia, hakia ha huni haki bayua hau bawashunũbũ hawẽ inabu anua huni mabuwãyãtũ hawẽ ina mekatsi ikama hakia ha huni mitanumã txashuwã pishta hamẽ biãshũ hawẽ dayarubu bawamatã ha huni hua mabuyãwãtũ pimaimakiaki— aka

⁵ Davĩ nĩkatã huni mabuwãyãki sinatahairakĩ Natã yuikĩ: —Deusũ nĩkaiwẽ taeshũ hãtxakĩ ẽ mia yuiaii, ha hunĩ itxakawakĩ txakabuhairawaimarã, hawẽ nuiama tenãtiki.

⁶ Hamẽ ha txashuwã pishta pakakinã, hawẽ karurã, dabe inũ dabeki hau inãshanũwẽ, ha hawa ibubis hawẽ nuiai uĩmama ikimawẽ taeshunã— ikaya

⁷ hanushũ Natãnẽ yuikĩ: —Ha hunikiri ẽ mia yuiairã, habia mĩ miaki. Haskawẽ taeshũ Israelĩ enabu mekenika Senhor Deusũ shabakabi mia yuikiki. Nĩkawe: “Israelĩ enabu mĩ shanẽ ibuhairakũkaĩshanũ ẽ mia katuniki. Bebũkiri Saulũ mia detekatsis ikaya hawẽ kushipa nemakĩ ẽ mia mekekubainiki.

⁸ Mĩ hatu mekekubaĩshanũ mĩ shanẽ ibu Saulũ hiwe hawẽrua inũ hawẽ aĩbuaibu ẽ mia yunuyamaki. Ha dikabi hawenabu anua Judá enabu tari pashkanibu ha Israelĩ enabu pashkabiabainibũ habu anu ẽ mia yunurianiki, ha dabe mekei mĩ shanẽ ibu ikũkaĩshanunã. Haska wakĩ ẽ mia yununi eskarabes mĩ shinãyã ẽ ana mia itxapa inãkeanaii.

⁹ Haskakĩ mĩ ẽ hãtxa ea nĩka pewama ikimashũ ẽ haska betxipaiai keska mĩ akama danaĩmamẽ? Amom nawabu Heteu nawa Urias hatu tenãmanũ, iwanã, hau Urias nitxĩshanũ mĩ Joabe yunua Urias hatu tenãmaimaki, hatu haska wamatã hawẽ aĩ mina wakĩ bikatsirã.

¹⁰ Haska wakĩ ea danãkĩ shinãma Heteu nawa Uriasĩ aĩ biãkĩ mĩ aĩwaĩmawẽ taeshũ eã minabu kupikĩ betsa betsapawẽ hatube ẽ mia bika tenemakubaĩshanaii.

¹¹ Eska Senhor Deusũ mia yuikiki. Minabũ hau mia txakabuwanũbũ ẽ hatu yunushanaii. Mĩ berubi mĩ aĩbuaibu betsa mia mebĩtã mia dapi huni betsa hiwea ẽ yunua shabakã bari txasha anushũ mĩ aĩ txutashãkanikiki.

¹² Hamẽ mia txutanameirã, hune mĩ ikimaki. Hakia eã hatu mia uĩmakinã, Israelĩ enabu dasibibũ uiaĩbũ ẽ hatu shabakãshũ txutanamemai uĩshãkanikiki”— akĩ Natãnẽ Senhor Deus hãtxa yuishuna

¹³ e itã haskaima Natã bebushũ Davĩ yuikĩ: —Senhor Deus danãkĩ txakabu betsa betsapa ẽ akimaki— ikaya kemakĩ Natãnẽ yuikĩ: —Mĩ txakabuwaimawẽ taeshũ Senhor Deusũ mia kupia mĩ mia mawama ishanaii.

¹⁴ Hakia Senhor Deus habi mĩ dakehairawaimawẽ taea mĩ huni bake Bate-Seba dama kaĩshina samama ha mia mawashũshanikiki— atã

¹⁵ hanushũ ana hãtxa wama Natã hawẽ hiwe anu txĩtũkaĩkẽ hanua Uriasĩ aĩki Davĩ bake waima ma kaĩshina Senhor Deusũ isĩ tenema txakayamaya

¹⁶ hawẽ bakewẽ nuihairai hawa piamahaira samakei meshu txaitanai hinamas maĩ tĩ ika dakashũ hau hawẽ bake shushanũ Davĩ Senhor Deus yukashũkubainaya

¹⁷ hanua anibu unanepabũ Davi merabewamisbu bushũ maĩ daka benitã pimanũ, iwanã, unãshubira yui pewabiabu hakia hatu nĩkabiatã hatubetã piama ikũkainaya

¹⁸ hanua 7 dia binutã hawẽ huni bake mawaya anibu unanepabũ hawẽ datei yuiti tenekĩ shinaĩ: “Hawẽ bake hiweyukẽ nũ daewakĩ hãtxa wabia nuku hawa nĩkamahaira ishiãki. Ma bakeishta mawakẽ harakiri nũ yuitirumẽ? Nĩkatã itimaskakawani ibubis itxakanikatiruki, hawẽ nui isĩ teneirã”, ika shinaĩ dateaibũ

¹⁹ hanua hune anibu unanepabu yuinameaibu uĩshũ hawẽ bake ma mawa shinãkĩ hatu yukakĩ: —Bakeishtarã, ma mawashumẽ?— hatu wa habũ kemakĩ yuikĩ: —Haa, ma mawashuki— akabu

²⁰ haska wabu nĩkatã maĩ daka benikaini ka hawẽ tari detsis pekatã nashi petã tari bena sawetã sheni inĩtiwẽ txa ikeaketã Deuski nukuti tari hiwe pũtea anu kashũ tari hiwe bebũ hemaĩtĩ dãti iki beti ishũ Senhor Deus kẽwãbai txipu benikaini hawẽ hiwe anu kashũ hatu piti yuka beshuãbu pikĩ nushukĩ yaniwaya

²¹ hatũ beya txibãmawẽ taeshũ anibu unanepabũ yukakĩ: —Shanẽ ibuũ, tsua haskatimabiakẽ nukũ beya txibãma mĩ hawai haskai? Mĩ bake isĩ tenei hiweyukẽ samakei mĩ bakewẽ taea mĩ kashakũkaĩshinaki. Hakia ma mawakẽ bis bis iki kashama benikirã mĩ ma piaii. Nuku tapĩmawe, haskara shinaĩ mĩ ikimẽkainã— akabu,

²² kemakĩ Davĩ hatu yuikĩ: —Ẽ bake isĩ tenei hiweyukẽ hau mawayamanũ ewẽ Senhor Deus nuitiruki, ishũ shinaĩ samakei ẽ kashakũkaĩshinaki.

²³ Ikis ma mawakẽ haska washũ ẽ ana hiwematirumawẽ taea hamẽ ẽ samaketirumaki. Haska watã ana txĩtũwãkĩ ẽ hiwematirumaki. Txipu eari mawatã ẽ haki nukui ka hari eki nukushanikiki— hatu wanikiaki.

Salomão kainikiaki, na hãtxarã

²⁴ Hanua hawẽ bake debuimakẽ hawẽ aĩ Bate-Seba Davĩ atimas daewashũ ana txutakubaina ana bake bima huni bake kaiã Davĩ kenakĩ: “Salomãoki”, anikiaki.

²⁵ Ha huni bake betxipaikĩ Deusũ hãtxa yuishunika Natã yuimakĩ Senhor Deusũ Davi unãmaimawẽ taeshũ hawẽ kena betsa wakĩ Davĩ kenakĩ: “Jedidiaski”, arianikiaki, nukũ hãtxawẽ: “Ha Senhor Deusũ betxipaikiki”, akinã.