2 Samuel 11 - Kaxinawá Bíblia (BR)

Huni betsa Urias hatu tenãmatã hawẽ aĩ Bate-Seba hanubi Davĩ binikiaki, na hãtxarã

¹ Shaba betsatiã bari pakei ni hua tueaya hatũ beya txibaĩ shanẽ ibubu detenamei bumisbutiã Davĩ hawẽ detenamenika shanẽ ibu Joabe inũ hawẽ detenamenika shanẽ ibu beshmasbu inũ Israelĩ enabu detenamenikabu dasibi hatu yunua bushũ Amom nawabũ mai pakea anushũ hatu detekĩ maematã hatũ mae ewapa hawẽ kena Rabá hatu mebiaĩbu hakia Davi hatube kama Jerusalém anu niti ishiã hiwea

² shaba betsatiã huĩrukuĩ dakabai ma bari kai hikiaya Davi benikauni hawẽ hiwe sapa sheni manaũri anu nishũ uĩbaũkĩ aĩbu hawẽruahaira batxiuma nashiai

³ betxitã: “Tsuamẽkaĩ? Uĩtãkãwẽ”, iwanã, hatu yunua bushũ yukatani beshũ yuikĩ: “Eliãnẽ aĩbu bake Bate-Sebaki, Heteu nawa Uriasĩ ainã”, akabu

⁴ hau ishũtanũbũ hawẽ dayarubu Davĩ hatu yunua yuitã ishũtanabu Davĩ bitxishũ txutakĩ hawẽ hura irumawawẽ taea aĩbu txuki nashitã hanua hawẽ hiwe anu txĩtũkainima

⁵ ana himi ikama hanu himi imis binukainaya ma bake bima tuya unãtã hau Davi banabimatanũ hawẽ tsuma yunua kashũ: “Bate-Seba ma tuyakiaki”, iwanã, Davi yuia

⁶ hanushũ nĩkatã hawẽ detenamenika shanẽ ibu Joabe anu hawẽ hãtxa bumakĩ Davĩ yuikĩ: “Heteu nawa Urias hau huyunũ ea anu nitxĩyuwẽ”, iwanã, hatu yunua, bushũ habias hãtxa Joabe yuiabu Davi anu Joabẽ Urias yunua

⁷ hukirã Davi bebũ nitushiai Urias Davĩ yukakĩ: “Joabe inũ nukũ detenamenikaburã, haskara kaya detenameaibu kaka beshũ mĩ ea yuiai?” aka Uriasĩ haskaibu dasibi yuia

⁸ nĩkatã hanushũ beparãkĩ hau hawẽ aĩ anu katanũ Davĩ yuikĩ: “Mĩ hiwe anu kashũ mĩ tae txuki petã mĩ aĩbe huĩrukuĩ ushayutãwẽ”, aka Davĩ hiwe hawẽrua anua Urias kaĩkainaya Uriasĩ hiwe anu piti pepa inãkuĩkĩ shanẽ ibuhaira Davĩ hatu bumashũbia

⁹ hawẽ hiwe anu Urias kama Davĩ hiwe hikiti shui dapi shanẽ ibuhaira Davi mekemisbube Urias meshu merã ushashinaya

¹⁰ hawẽ hiwe anu Urias kama ushashinai Davi yuiabu Urias hau hunũ Davĩ kena Urias huai Davĩ yukakĩ: —Txaihairakea mĩ hua punu nukabia haskai mĩ hiwe anu mĩ kama ishiaĩ?— aka

¹¹ kemakĩ Uriasĩ yuikĩ: —Hi pũyã tinĩ wãshũ shubu keska washũ Senhor Deusũ hãtxa aruni bau tsauĩmabu habias keska anu Israelĩ enabu 10 shukuabu Jerusalém nortekiri hiweabu detenamenikabu inũ Judá enabu detenamenikaburi pi ushakanikiki. Ẽ detenamenika shanẽ ibu Joabe inũ mĩ shanẽ ibu beshmasbu habias anuri kene anuma nashabakã ushariakubaĩkanikiki. Detenameaibu keskai ẽ hiwe anu hikishũ pikĩ nushukĩ ẽ aĩ txutakĩ haska dasibi betsa betsapa ẽ atirumaki, bika tenebiakinã— aka

¹² haskabiaya Davĩ ana nitxĩkĩ: —Haskakenã, ikis ana bashikuyuwe, meshukiri mĩ kaya ẽ mia nitxĩshanairã— aka Davĩ haska wa hawẽ hiwe anu ana kama meshukiri habianua katãkatsi Jerusalém anu Urias bashikukẽ

¹³ habias shabatiã hau habetã piyunũ itã Davĩ pimakĩ Urias paẽhairawa hanua meshu merã Urias Davĩ hiwe anua kaĩkaina hawẽ hiwe anu ana kama hakia Davĩ hiwe hikiti shui dapi shanẽ ibu mekemisbube Urias niti ika ana ushashinaya

¹⁴ penama Davĩ nĩkatã detenamenika shanẽ ibu Joabe hawẽ hãtxa keneshũ Joabe anu Urias inã bushũ

¹⁵ Joabe inã bepẽshũ haska Davĩ keneshina hune Joabẽ yuikĩ: “Hau hatube detenamenũ Urias dukũ hatu bebũ nitxĩshãwẽ, detenamehairai meseaibu anurã, hau ha dukũ tsakakĩ tenanũbunã”, aka

¹⁶ haska keneshũshina uĩkĩ nĩkatã hau hatube detenametanũ ishũ hawẽ detenamenikabu yunukĩ Amom nawabũ maewã Joabẽ hatu ana keshemabaũkĩ hanu Amom nawa mẽtsisipahairabu mapuabu bebũ Joabẽ Urias yunukĩ nitxiã

¹⁷ hatũ maewã mekekĩ Joabẽ detenamenikabu detenũ ika hawaira kaĩbirã betsa betsapa hatu detekĩ Davĩ detenamenika shanẽ ibu beshmasbube hatube detenamei mawabũ txipu hatu benabaũkĩ ha mawabu anuari Uriasri tenãbainabu betxiriatã

¹⁸ Amom nawabũ maewã mebinũ ika hatube detenamei haskashinabu Joabẽ Davi anu hãtxa bumakatsi ikĩ

¹⁹ hatũ hãtxa bunika Joabẽ yunukĩ yuikĩ: “Haskai nũ hatube detenamekũkirãshina shanẽ ibuhaira Davi mĩ dasibi banabimakĩ keyua

²⁰ shanẽ ibu sinatahairakĩ, mia yukakĩ: ‘Ha maewã anuabu detenũ ika haskai ha dapihaira bushiãbumẽ? Maewã mishki kenebaunibu mamakishũ mishki tũku putatirubu haskai nukunabũ unãma ikasi hatu dapihaira bushiãbumẽ?

²¹ Mae Tebes anushũ mishki kenebaunibu mamakishũ hawẽ deneti mishki aĩbũ hatu anu putakĩ Jerubesetẽ bake Abimeleque tenaĩmaburã, habunã, shinãma ikanimẽkaĩ? Haskakĩ maewã mishki kenebaunibu anu dapihaira bushiãbumẽ?’ ikaya kemakĩ eska washãwẽ: ‘Ha dikabi mĩ shanẽ ibu beshmas Heteu nawa Urias hatube tenãriashinakiaki’, akĩ ea yuishũtãwẽ”, aka

²² hatũ hãtxa bunika kai hikishũ haska Joabẽ dasibi yunushina shanẽ ibuhaira Davi yuikĩ keyua haska Joabẽ yuishina keskai Davi sinatahairaya

²³ hanushũ hãtxa bunikatũ yuikĩ: —Hemaĩtĩ shabakãshũ nuku detenũ ika Amom nawa detenamenikabũ kaĩbirãkĩ habu dukũtũ nuku binutã nuku detebaunabu txixtekiri hui mae hikiti shui anu nũ hatube txĩtũkiranaya

²⁴ hanushũ mishki kenebaunibu anushũ pia kuĩwẽ nuku tsaka tsaka akaibũ mĩ shanẽ ibuhairatũ detenamenika shanẽ ibu beshmas betsa betsapabu hatu maemakĩ tenãkĩ hanushũ ha dikabi Heteu nawa Urias hatube tenãriashinabuki— aka

²⁵ haska wa nĩkatã hatũ hãtxa bunika Davĩ kemakĩ yuikĩ: —Eska Joabe ana yuitãwẽ: “Ha mawashinabuwẽ haskaira hatuwẽ dateyamawe, detenamearã, habiaskakirã. Hakia ana kushipahairakaĩ ha maewã yamawakĩ mã detekĩ keyutiruki”, akĩ haska Joabe yuikĩ mĩ hatu shinã txãkãwãtiruki— aka

²⁶ hanua Bate-Sebã ma hawẽ bene Urias mawashina nĩkatã 7 dia kashakũkaini maĩshĩkẽ

²⁷ txipu Bate-Seba kasha neseshĩkẽ hau itanũbũ Davĩ hatu yunua ishũtanabu hawẽ hiwe hawẽrua anu Davĩ maewashĩshũ aĩwãshina bebũkiri tuyaima huni bake kaĩbiakẽ haska Davĩ Urias itxakawaimawẽ taea Senhor Deus hawẽ benimama inikiaki.