2 Samuel 1 - Kaxinawá Bíblia (BR)

Saul ma mawashina Davĩ bana nĩkanikiaki, na hãtxarã

¹ Saul Filisteu nawabube detenamei kashiã mawakẽ hanua Davi hari Amaleque nawabube detenamekĩ hatu maematã hawẽ detenamenikabube mae betsa Ziclague anu txĩtũtani hanu huĩrukuĩ usha dabei hiweyuabũ

² shaba dabe inũ bestitiã Saulũ detenamenikabũ tari hiwe pũtebaunabu anua huni betsa hawẽ tari buash buashpa hawẽ bushka mai hashaira Ziclague anu hui Davi bebũ hikitã haki datei dãti iki maiki beti ikaya

³ Davĩ yukakĩ: —Mĩ harakiria huai?— aka kemakĩ yuikĩ: —Israelĩ enabu Filisteu nawabube detenameaibu anua hunei pashakirãshina ẽ huaii— aka

⁴ hui kushipawẽ Davĩ yukakĩ: —Hawa haskashinabumẽkaĩ, menã ea yuiriwe— aka kemakĩ yuikĩ: —Detenamenikabu hatiri pashaibũ hakia Israelĩ enabu itxapari mawariashinabuki. Habu bestimarã, shanẽ ibu Saul inũ hawẽ bake Jônatas dikabi tenãriashinabuki— aka

⁵ ha huni hatũ kaka beshuã Davĩ ana yukakĩ: —Saul inũ hawẽ bake Jônatas mawai haskatã ishiã mĩ unaĩ?— aka

⁶ ha hunĩ kemakĩ yuikĩ: —Mati Gilboa anu kashũ Saul hĩ iki hawẽ hashiwẽ mesteã nia Filisteu nawabu hatũ cavalo katsaumea beaibu ẽ uiãyã

⁷ nasaukekauã Saulũ ea uĩtã ea kena: “Ẽ mia nĩkai ea yuiwe”, ea aka,

⁸ “Mĩ tsuamẽ?” ea aka, kemakĩ: “Ẽ Amaleque nawaki”, ẽ wa

⁹ ea yuikĩ: “Ea dapi huwe. Ẽ shinã pashabia ẽ isĩ tenetxakayamaiwẽ taeshũ ea merabewakĩ menã hawaira ea tenãriwe”, akĩ ea yunua

¹⁰ tĩ ika daka ana haska benitã hiwetiruma uĩkĩ ẽ tenãshinaki. Haska watã ha shanẽ ibũ ouro maiti sawea mabishũ hawẽ mebi metsekĩ mesiritã mĩ nukũ shanẽ ibukẽ ẽ mia beshũshuki— aka

¹¹ hatu haska yuia nĩkatã Davi inũ habe mapuabu punu nukai keyutã hatũ tari ushniakeakebaũtã

¹² Saul inũ hawẽ bake Jônatas ma mawashinabu inũ Israelĩ enabũ Senhor Deus detenameshũmisbu Filisteu nawabũ ma hatu detekĩ maemakĩ keyushinabuwẽ taea hatuya kashai bis bis ikubaini bari txai tanai piama samakeaibũ

¹³ ma bari kakẽ kashai neseabũ ha berunã hatũ kaka bekĩ banabimashu ana kenashũ Davĩ yukakĩ: —Miarã, mĩ haniamẽ?— aka kemakĩ yuikĩ: —Ẽ nawa betsaki, Amaleque nawa minabube hiweatũ bakerã— aka

¹⁴ hanushũ hãtxa kushipawẽ Davĩ yuikĩ: —Shanẽ ibu wakĩ Senhor Deusũ katuni dateama haskakĩ mĩ nukũ shanẽ ibuhaira deteshinamẽ?— atã

^15-16 hawẽ tsuma betsa kenashũ yunukĩ: —Iyushũ tenãwẽ— iwanã, hatu tenãmariama ha huni Davĩ ana yuikĩ: —Shanẽ ibu Senhor Deusũ katuni mĩ tenãshinarã, ibubis mĩ nukuki txanishuwẽ taea mĩ mawairã, minaki— akaya Davĩ tsumapã ha Amaleque nawa detekĩ tenanikiaki.

Saul inũ Jônatas mawashinabu shinaĩ hatu manui Davi hatukiri kãtanikiaki, na hãtxarã

¹⁷ Saul inũ Jônatas mawashinabu shinaĩ nui Davi kãtai

¹⁸ Israelĩ huni bake Judá enabu dasibi hau hari hatu haska yusĩkubaĩshanũbũ Davĩ hatu yunua na habias kãta kene hawẽ una Reto anu kenenibukiaki.

¹⁹ “Davi nui kãtakĩ ani ẽ matu yuiai nĩkakãwẽ: Peirawa! Israelĩ enabuũ, matũ manã mati matipa anua matũ mẽtsisipa kushipabu mã hawẽ kẽmis ma mawabuki. Matũ detenamenikabu kushipabu ma debuabuki.

²⁰ Gate anu kashũ hatu banabimayamakãwẽ. Ha dikabi Asquelom bai tanabaĩkĩ hatu yuiriakubaĩyamakãwẽ, hau Filisteu nawa aĩbuaibu Deus ikũwãbumã haska kaka nĩkatã benimai hau ishtxu ishtxu iyamanũbunã.

²¹ Gilboa mati matipaã, hanua detenamenika kushipabũ mabu pema pema ashiãbu inũ Saulũ nemati mane txapui hawẽ txasha ma pui itxai keyuaiwẽ taea hau mĩ mai anu ui inũ bishi nibi miki ana niri iyamashanũwẽ.

²² Saul inũ hawẽ bake Jônatas hatuki sinataibube detenametani txĩtũbirãkĩ hatũ pia inũ hatũ matxatu txaipa mẽtsisipabu hawẽ hatu deteshina hatũ himi inũ hatũ sheni iruma bei txĩtũbirãkĩ mekubirãmisbu ana haskatã haska watirubumahairaki.

²³ Saul inũ Jônatasã, matu betxipaikĩ matukiri pe shinãmisburã, mã hiweshina inũ mã ma mawabiashina tsuã matu dabe pashkatirubumaki. Tete hawaira nuyakaĩmis inũ leãonẽ kushipa mã hatu binuaki.

²⁴ Israel aĩbuaibuũ, tari tunanepa inũ tari mayunepa Saulũ matu sawemakubaĩkĩ tari betsa ouro yumẽyã matu dauwamashinawẽ taea Saul shinaĩ haya kashakubaĩkãwẽ.

²⁵ Haskatã detenamenika mẽtsisipabu kushipabia detenameti bai anua debui niri ishiãburã, matũ mati keyatapa anua Jônatas mawariashinaki.

²⁶ Jônatasã, mĩ ẽ betsa keskawẽ taea mia manui ẽ huĩti ẽ nishmahairaki. Hawarawẽ beparãkĩ ea huneama mĩ ea duawakubaĩkĩ aĩbuaibũ ea betxipaiaibu hatu binukĩ pepawakĩ mĩ ea haibuhaira wakubaĩshinaki.

²⁷ Pemahairaki! Detenamenikabu kushipabu hatu tenãkĩ niri akĩ hatũ detenameti mabu hatu yamawashinabuki”, iki kashawẽ kãtai Davi haskanikiaki.