2 Reis 2 - Kaxinawá Bíblia (BR)

Mawama hawẽ yura hirabiya Senhor Deusũ Elias nai anu aininikiaki, na hãtxarã

¹ Niwe kushipahaira shubi shubi imakĩ nai anu Senhor Deusũ Elias ainibaĩshanai kemaya Gilgal anua Elias inũ Eliseu kaĩkaĩkĩ

² Eliasĩ Eliseu yuikĩ: —Betel anu Senhor Deusũ ea hari yunuaiwẽ taea na habianu bashikuyuwe— aka hakia Eliseũ kemakĩ yuikĩ: —Senhor Deus hiwea inũ mĩ hiweawẽ taeshũ ẽ mia yubaii. Mimesti mĩ kai ẽ mia heneamaki— aka hanua ha dabe Betel anu buaibũ

³ hanua Betel anua Deusũ hãtxa yuishunikabu betsabu hiweabu kaĩbaini Eliseuki nukushũ yuikĩ: —Senhor Deusũ mĩ huni yusinã mia ikis mebiainã, mĩ ma unaĩ?— akabu hatu kemakĩ yuikĩ: —Haa. Ma habiaska ẽ unaiĩ. Hakia matunã, hawa hatu yuiyamakãwẽ— hatu wa

⁴ hanushũ Eliasĩ Eliseu ana yuikĩ: —Jericó anu Senhor Deusũ ea hari yunuaiwẽ taea na habianu bashikuyuwe— aka hawa nĩkama Eliseũ kemakĩ ana yuikĩ: —Senhor Deus hiwea inũ mĩ hiweawẽ taeshũ ẽ mia yubaii. Mimesti mĩ kai ẽ mia heneamaki— atã Jericó anu ha dabe ana buaibũ

⁵ hanua Jericó anua Deusũ hãtxa yuishunikabu betsabu hiweabu kaĩbaini Eliseuki nukushũ yuikĩ: —Senhor Deusũ mĩ huni yusinã mia ikis mebiainã, mĩ ma unaĩ?— akabu Eliseũ hatu kemakĩ yuikĩ: —Haa. Ma habiaska ẽ unaiĩ. Hakia matunã, hawa hatu yuiyamakãwẽ— hatu wa

⁶ hanushũ Eliasĩ Eliseu ana yuikĩ: —Hene Jordão anu ukeri Senhor Deusũ hauri ea yunuaiwẽ taea na habianu bashikuyuwe— aka hakia Eliseũ ana kemakĩ yuikĩ: —Senhor Deus hiwea inũ mĩ hiweawẽ taeshũ ẽ mia yubaii. Mimesti mĩ kai ẽ mia heneamaki— aka hanua ha dabe Hene Jordão anu buaibũ

⁷ 50 Deusũ hãtxa yuishunikabũ hatu txibaĩ hatu itxũ buaibũ ha dabe habu bebũ benãta mapushũ uiaĩbũ Hene Jordão kesha anu Elias inũ Eliseu nitã

⁸ hanushũ hawẽ yabukuti Eliasĩ pekatã sebikĩ txaipa watã hawẽ hene bekusha, hene dami hamebi tuash iki niti ikẽ ha dabe mai tsusĩ anu pukebaini

⁹ kesha betsauri kapukeshũ Eliasĩ Eliseu yuikĩ: —Ẽ mia henebaĩriama haska mĩ betxipaiai ẽ mia ashũtiru ea yukawe— aka Eliseũ kemakĩ: —Senhor Deusũ mia merabewakĩ hawẽ yushĩ kushipa mia atximakubaĩmis keska habias kushipa dabeki hau ea inãkubaĩshanũ haska ẽ mia ea akaii— aka

¹⁰ Eliasĩ shinãtã yuikĩ: —Hawama ea yukama itimaska mĩ ea yukaii. Ẽ mia henebainai mĩ ea uiãyã haska mĩ yukashu Senhor Deusũ mia merabewakĩ dabeki keska mia amakubaĩshanikiki. Hakia mia henebaini ẽ kaimakẽ haska mĩ ea yukashu Senhor Deusũ mia inãma ishanikiki— aka

¹¹ bai tanabaini habe hãtxa dabekubainaibũ hawaira hawẽ tarãbaĩti txi inũ cavalo dabeya txiya tashnibirãkĩ hatu pashkarabebaini niwe kushipa shubi shubi ibaĩkĩ Elias nai anu ainibainaya

¹² haskakainai Eliseũ uĩkĩ hui kushipawẽ kenakĩ: —Epaã, epaã, Israelĩ enabu mekenika cavalõ tarãbaĩti inũ hawẽ katsaubaũti cavalo detenamenikabu itxapabu ẽ uiaiĩ— atã hanua Elias haska kainima ana txĩtũkiranai uiãma inikiaki. Eliseũ Elias ana uĩtirumawẽ taea nuihairakĩ hawẽ tari ushnikĩ namakis dis atã

Elias keskariai Deusũ hãtxa yuishunika kushipa Eliseu iriakũkainikiaki, na hãtxarã

¹³ hanushũ Eliasĩ yabukuti manaũri inakaĩkĩ tĩ abaina bitã tsumabaini Hene Jordão anu txĩtũkirã hene kesha nishũ

¹⁴ ha kushipa hayawẽ Eliasĩ yabukutiwẽ hene bekushtã hamebi yuka ikĩ yuikĩ: “Eliasĩ mekenika Senhor Deusrã, hanimẽ?” ikaya hene dami hamebi tuash iki niti ikẽ Eliseu ana pukebainaya

¹⁵ kesha betsauri Deusũ hãtxa yuishunikabu Jericó anu hiweabu haska hene tuash atã pukebirani Eliseu huai uĩkĩ yuikĩ: “Uĩkãwẽ! Eliasĩ yushĩ Eliseu mamaki ma butuaki”, iake iaketã haki nukunũ ika bui Eliseu bebũ maĩ di iki beutã

¹⁶ habu Deusũ hãtxa yuishunika betsã yuikĩ: —Uĩwẽ! Mĩ dayaru nukuburã, 50 huni kushipabu nũ hayaki. Senhor Deusũ Yushinẽ Elias ainibiabaĩkĩ mati betsa anu henebaina kasmai, pashku napaku anu pakebainamẽkaĩ. Mĩ huni yusinã hau benatanũbũ betsabu hatu yunupa?— akabu hakia Eliseũ hatu yuikĩ: —Haskamahairaki. Hatu yunuyamakãwẽ— hatu wa

¹⁷ haska hatu yuibia hawa nĩkama hawẽtsaĩs yukakubaĩkĩ bikawabu atimas hatũ hãtxa ana nĩkakatsi ikama hatu yunukĩ: —Peki. Hamẽ haskatanũ ika mã ikanimẽkaĩ, hatu yunukãwẽ— hatu wa 50 hunibu hatu yunuabu bushũ Eliasĩ yura betxinũ ika shaba dabe inũ besti benabiabaunabu hawa betxiabuma

¹⁸ Jericó anu Eliseu bashikushina anu txĩtũbirani haki nukuabu Eliseũ hatu yuikĩ: —Eanã, bebũkiri ẽ matu yuiama ishiãmẽ? mã buyamanũbunã— hatu wanikiaki.

Jericó maewã anu ũpash txakabu txatxa habai Eliseũ hatu pewakĩ hatu hawama washunikiaki, na hãtxarã

¹⁹ Jericó anu hiweabũ Eliseu yuikĩ: —Haska na mae anu nũ hiwea mĩ uiainã, hiwea peki. Haskabia nukũ ũpash txatxa habai txakabuki. Ũpash txakabuwẽ taea nukũ yunu benebiai hawẽ bimi mawaira ismaki, mai txakabuwẽ taearã. Haska watã mĩ nuku merabewatirumẽ?— akabu,

²⁰ Eliseũ hatu kemakĩ yuikĩ: —Kẽtxa benaki sal mata ea beshũkãwẽ— hatu wa, beshũ inãbu

²¹ ũpash txatxa anu kashũ Eliseũ sal ha ũpash merã di akĩ yuikĩ: —Eska Senhor Deusũ yuikiki: “Ana matu tenãma inũ matũ bai anu hau yunu bimi ana txakabuyamashanũ matũ ũpash pewakĩ ẽ matu hawama washũshuki”, akĩ Senhor Deusũ matu ashũshuki— hatu wa

²² haska Eliseũ hatu yuima keska Jericó anua hatũ ũpash pehaira ikũkainikiaki.