2 Pedro 2 - Kaxinawá Bíblia (BR)

Yusĩnã parananãmisbu eskashãkanikiaki, na hãtxarã

¹ Israelbu ẽ shenipabu anu Deusũ hãtxa yuishunika matxupa naxui ika hayanibuki. Habiaskariai matu anuri yusĩnã matxupa matu naxui iria hayabuki. Habu hatũ hãtxa hawẽruabia hatũ xinã txakabuwẽ matu daũkĩ akawakanikiki, nukũ Shanẽ Ibũ ma nuku meketi pewabianikẽ hawẽ kuxipa danaĩ parananaĩburã. Haska matu yusĩkĩ husiaibu Deusũ hawaira hatu kupishanikiki.

² Hatũ hiwea kemu pae hamapai txakabuwẽ ikaibu yura itxapabũ hatu txibaĩ Jesus Cristõ bai txanimabiakẽ hawẽ taea ikũwaĩbu yuaĩ hãtxa txakabukanikiki.

³ Habunã, matũ pei itxapa binũ ishũ txani hãtxa yusĩkĩ matu parãkĩ itxakawashãkanikiki. Haskanũbariaibu ma bebũkiri Deusũ hatu kupini hawa betsa waismawẽ taeshũ tsuã Deus hatu daewashũtirumawẽ taeshũ Deusũ hatu kupikatsi manayuikiki.

⁴ Hawẽ nai tsumabu hatiritũ hawẽ hãtxa nĩkabuma hatũ txakabu Deus hakimakatsi ikama hakia mai kini keyatapa shãkĩhaira mexu merã hanua pashatirubuma anu hatu putatã neshashũ hatu mekeyunikiaki, txipu hanu kupiaitiã hatu unãti wakatsirã.

⁵ Ha dikabi Noé hiweatianã, ha mai ha dukũ damiwani anu yurabu txakabubu kupinũ, iwanã, hatũ txakabu hakimakatsi ikama Deusũ hene yunushũ habu hasai keyuaibũ Noé pashashanũ ika hawẽ hiwea txakabu buama Deuskiri besti txanikũkaĩkĩ hawẽ yurabu sete besti habube pashaya hanua habuã Noẽ hãtxa nĩkakĩ Deus nĩkaisbuma hatũ txakabuwẽ hasai keyunibukiaki.

⁶ Natiã tsuabũra hawẽ hãtxa nĩkama txakabukubainaibu Deusũ hatu kupishanai hau bebũkiri dasibi txakabumisbũ Deusũ eskaibu hatu kupini hau hakiri unãshanũbũ mae dabe Sodoma nawabu inũ Gomorra nawabu kupikĩ txiwẽ hatu menu keyukĩ Deusũ hatu yamawakĩ mapu besti hatu wanikiaki.

^7-8 Deusũ hatu haska waitiã Sodoma anu Abraãonẽ berẽ Ló nawabube hiweshũ hatũ txakabuwẽ betsa betsapaibu hatube naxui ika hiweshũ bari tibi haskaibu uĩ inũ habu nĩkai hatũ txakabuwẽ taea huĩti nixma haska washũ hatu merabewatimakẽ txutaname bestinũ ika kemukĩ Ló bikawaibũ hatu kuariama Ló huni pepakẽ Deusũ pashawanikiaki.

⁹ Noé inũ Ló Deusũ pashawanishũ tsuabura hawenabu ikatsis ikĩ hatũ hiwea Deus inãmisburã, hawẽ taeshũ hawara bika tibi hatu memabiaibũ nukũ Shanẽ Ibũ unãkĩ hatu txakabu binumariakubaĩtiruki. Hamẽ habu txakabumisburã, hanu bari hawẽ heneaitiã hatu unãti watã hatu kupishanai unãriaikiki.

¹⁰ Nukũ Shanẽ Ibuã hatu kupikinã, habu dasibibu hatũ kemu pae heneisbuma inũ hawẽ kuxipa danãkubainaibu hatu ashanikiki. Habu yusĩnanaĩ parananãmisburã, huĩti kuxitã tsua nĩkaisma inũ kẽkĩ xinã betsa wakatsi ikabuma hawaki dateama hatũ hãtxawẽ yushĩ txakabu hatũ shanẽ ibuya hatu itxakĩ ha amisbuki.

¹¹ Hakia Deusũ nai tsumabu kuxipa yununikabũ hatu binũbiashũ hatũ kuxipa uĩmakĩ hatukiri yuikĩ Satanás hawẽ tsumabuya hatu txitekĩ ha aisbumakiaki, Deus hãtxashũkinã.

¹² Ha hunibu parananãmisburã, hawa nĩkati kayabi hayabumaki, yuinakapã xinãyã keskaburã. Yuinakarã, txanima hawẽ nĩkatinĩs hiweabuki, tsuãra atxishũ deteshũ pimisbu inũ pisbumarã. Ha parananãmisbu haska keskabuki. Deusũ bai kayatapiakiri unã pewamabia hakiri hãtxatxakamisbuki. Hakia haskabu mawairã, yuinaka deteabu imis keskashãkanikiki.

¹³ Habuã dukũ yura betsabu nuitapawaxina habuwẽ taeshũ Deusũ hatu manakukĩ kupia nuitapahairariashãkanikiki. Habu parananãkĩ habũ xinaĩ shabakabi hamapai txakabu aki: “Nũ benimakũkainaii”, iki hiweshũ mã ikũwaĩbu beyusai anu matu naxui itã matube benimawanũ ika mã hawẽ dakeai habũ matu husimakĩ atimapa tibi wakĩ matu dabĩwãmisbuki.

¹⁴ Ha parananãmisbunã, hatũ kemu paewenã, aĩbu tibi ha abuai kasmai ha itxakawa bestikatsis ikai hatu amisburã, haskawẽ taea hatũ txakabu itxapa mataki, hawa henetirubumarã. Hatũ kemu paewẽ ikũwaĩ huĩti babubu parãkĩ hatu txakabuwamamisbuki. Hatu haska wamamisbu hatũ kemu pae heneisbumarã, habis ha hunibu Deusũ unãtã hatu kupishanikiki.

¹⁵ Haska Beorĩ bake Balaão ini keskai hatu uĩmatxakai pepa ana txibãma haki petxitã kanei hatũmebi benukĩ ha parananãmisbũ Deusũ hãtxa ana nĩkabumaki. Hamẽ Deusũ hãtxa hatu yuishũbiamis Balaão peiwẽ kemukĩ Deusunabu yupukĩ txakabuwapanã

¹⁶ Deusũ hãtxa xinãma kaneaya hawẽ burro hãtxaismabia hunĩ hãtxawẽ yuimakĩ Balaão tatima ikaskaini kapanã hawẽ burrõ hãtxawẽ nemakĩ Deusũ kũyã anikiaki.

¹⁷ Ha yusĩnã paranãmisburã, ũpash bana tashka heneuma keska inũ nai kuĩ niweya bebiai uiuma hawa txa akama keskabuki, hatũ yusĩa hawa pepa hayamarã. Ha habu haskamisburã, Deusũ hatu kupia ikibi ika meirã, hanu mexu tẽ ikihairai anu hatu putashanikiki.

¹⁸ Hawara hãtxakĩ yuiaibu hawẽrua kemutapabia hamẽki. Habũ dama ikũwãkĩ taewaxina mestẽriabuma ha txakabukiri yusĩkĩ txanima hãtxa hatu henemakanikiki, hatũ yura atimapa betsa betsapatikiri hatu yusĩtxakakinã.

¹⁹ Habu txakabũ hatu tsumawawẽ taea ha hunibũ hawa hatu nematirubumaki, ha ikũwãkĩ taewaibũ akaiburã. Nuku tibirã, hatũ nuku mekearã nũ hawẽ tsumawẽ taea ha parananãmisbũ tsumarã, txakabu bestiki, tsuã danãkĩ henetirumarã.

²⁰ Ha dukũ Nukũ Shanẽ Ibu mekenã Jesus Cristo unãtã hatũ txakabu putakĩ pewabiani habias txakabũ ana hatu atxishũ yabuarã, beshmas ibiani ana txakabui pikuhairamisbuki.

²¹ Ha dukũ Jesus Cristo txibãti unãma ikaiburã, mawaira txakabuma ikeãkanaii. Hakia Deusũ hãtxa meribi hatu yusĩabu unãtã ana txibãkatsi ikama danãkĩ henei txakabui pikukubaĩmisbuki.

²² Ha panananãmisbu haskakiri hatu yuini txanima habiaskakanikiki. Uĩrakãwẽ. “Kamã hanãtã txĩtũkirã ana hawẽri pimisbuki. Ha inũ, ina yawa pupushaira datxukĩ shũpĩwãbiabu ana txĩtũkaĩ pupuski irumai ana hawẽ meweki pukumiski.” Haska ẽ matu yuiai keskakanikiki, txakabui ana pikuirã.