2 Pedro 1 - Kaxinawá Bíblia (BR)

Pedrõ hatukiri xinãnikiaki, na hãtxarã

¹ Ẽ Simão Pedro Jesus Cristõ tsuma hawẽ kuxipaya ea waniki. Nukũ mekenika Deus Jesus Cristõ kaneisma nũ ikũwaĩbu keska mã nuku txibãkĩ ikũwãriaibuwẽ taeshũ ẽ matu kene bumai uĩrakãwẽ.

² Deus inũ nukũ Shanẽ Ibu Jesus haibuwakĩ mã hatu unãhairaya unãnuma matu hiwemakĩ matu duawatxakayamai bikubaĩkãwẽ.

Deusũ katuaburã, ewatikiaki, na hãtxarã

³ Deus kuxipa paepatũ haska hatũ abuai keska hawẽ hiwekĩ nũ hakiri xinãkubainũbũ nuku inãki, Jesus Cristo nũ ikũwãyã Deusũ nuku kenatã hawẽ daya pepa nũ hayashanũbũ hawẽ kuxipa meribiwẽ nuku katukinã.

⁴ Na haska tibi nuku amairã, haska bebũkiri Deus ibubis hãtxai hawẽ kuxipahairawẽ yubakani txanima betsa waisma haska ikũwãkĩ mã xinã betsa watã mã ma Deusũ beya ibu wawẽ taea na mai anushũ txakabu kemu paewẽ ikaibu hatu binui mã ma Deusunabu pashatirubuki.

⁵ Haskawẽ taea mã ikũwaĩ kuxipakĩ eska tibiwẽ ana matsãkĩ binumakubaĩkãwẽ. Jesus Cristo ikũwaĩ matũ xinãwẽ pe hiwekubaĩkãwẽ. Ana Deusũ kakape nĩka pehairawatã

⁶ ibubis matũ yurakiri xinã pewatã mekekubaĩkãwẽ. Haskai mã hĩ hĩ imis tapĩ beshtekekubaĩkãwẽ. Haskai Deusbe mã haibunamehairai

⁷ matubetã ikũwaĩbube haibunaĩ beyanamei haska tibiwẽ nuii hiwekubaĩkãwẽ.

⁸ Mã haska tibi haya mã hawẽ ewairã, txanima nukũ Shanẽ Ibu Jesus Cristo unãkĩ mã hamẽ haibuwamaki. Ha inũ, matũ hiwearã, hamẽmari ishanikiki.

⁹ Hakia tsuabura haskakubainabumarã, bekũmã hawẽ hiwea haskashanai unãtiruma keskabuki. Deusũ hatũ txakabu ma hatu buashũbiani ana habũ xinãkatsi ikama hakimatã Deuskiri ana xinãbumaki.

¹⁰ Ẽ betsabu inũ ẽ puibuũ, Deusũ matu kenashũ katutã hawena meribis matu wakatsis iniki. Mã hawenabu heneama ikatsis ikaiburã, txanima ikũwaĩ mã haki nukukatsis ikai matũ xinã mestẽtã ikubaĩkãwẽ. Haska tibi ẽ matu yunuai keskairã, mã haskakubainaiburã, babui txakabuwẽ taea kanei mã txĩtuãma ishãkanaii.

¹¹ Mã haskai hiwekubainaibu benimakĩ matu kẽwãtxakayamakĩ hawẽ mae bena anu hanu mã hikinũ hawẽ beputi matu bepẽshũtã: “Neri hiki bekãwẽ”, matu washanikiki, hanu nukũ mekenã Shanẽ Ibu Jesus Cristõ matu bitxikinã, niti ikama mã habe hiwepakeshanũbunã.

Deusũ hãtxarã, hamẽmakiaki, na hãtxarã

¹² Ma bebũkiri txanima hãtxa matu yusĩabu unãkĩ mã mestẽwani mã hawẽ hiwea haska dasibi matukiri xinãkĩ eãri matu xinãmakĩ ẽ henekatsi ikamaki.

¹³ Natiã ẽ hiweyuarã, txanima haska ẽ xinãmis na hãtxawẽ matu e imakĩ matũ xinã ẽ ana matu mestẽwãmakatsis ikai ea nĩkakãwẽ.

¹⁴ Nukũ Shanẽ Ibu Jesus Cristõ ma hanu ea yuini ma ẽ mawashanairã, ma kemaikiki.

¹⁵ Na eska matu ashũkinã, ma ẽ mawaimakẽ haska xinãkĩ Jesus Cristokiri yusĩa mã ana xinãkubaĩshanũbũ ẽ matuki shabakabi txaniaii.

¹⁶ Nukũ Shanẽ Ibu Jesus Cristo kuxipahairai ana hushanaikiri shabakabi matu yusĩkĩ hawẽ beparãti miyui hawẽrua nũ matu yuiama iniki. Hakia nukũ Shanẽ Ibu kuxipai txashahairai ibubis nukũ beruwẽ uĩnishũ matu parãma nũ matu yuiniki.

¹⁷ Hawẽ Epa Deusũ kẽwãkĩ kuxipa wai nũ uĩayã haskabiama Deusũ hawẽ hui tashnimakĩ hawẽ bake pepa wakĩ hãtxa wakĩ yuikĩ: “Narã, ẽ bakeki. Ẽ abuhairaii, ẽ Katuarã”, ikai

¹⁸ hawẽ hui nai anua huai nukubũ nũ nĩkaniki, nukũ Shanẽ Ibu ha mati meribi anu habe nũ mapuabunã.

¹⁹ Haska wakĩ Deusũ hãtxa yuishunikabu hawẽ bakekiri hatu kenemani hanu shabakabi Deusũ nuku unãmakĩ keyuniki. Haska ha hakiri kenenibu txanimaki, xinaĩrakãwẽ. Haskakiri mã tapĩkubainairã, matũ hiwea mã pewakubainai hanu nukũ Shanẽ Ibu huaitiã dasibi matũ hiwea matu betsahaira washanikiki.

^20-21 Haskawẽ taea Deusũ hãtxa yuishunikaburã, hatũmebi hatũ xinãnẽ hãtxataskama hakia Deusũ hawẽ hãtxa hatu yuimaya Yushĩ Pepatũ hatu merabewakubainikiaki. Haskarã, txanimaki. Haska wakĩ Deusũ hatu yusĩkĩ kenemaniwẽ taeshũ haska Deusũ hatu yusĩmani keska wakĩ hatu yusĩriakubaĩkãwẽ. Na hãtxa ẽ matu yuiairã, hakimayamakubaĩkãwẽ.