2 Coríntios 8 - Kaxinawá Bíblia (BR)

Hawara mã haya yauxiama nuitapaibu pashkashũkubaĩtikiaki, na hãtxarã

¹ Ẽ betsabu inũ ẽ puibuũ, Macedônia mai pakea anua itxamisbu Deusũ hawẽ nuiwẽ hau Jerusalém anuabu nuitapaibu hatu merabewanũbũ, iwanã, Deusũ hatu duawamaimakiri ana ẽ matuki txaniaii.

² Hatu bika tenemabiaibũ yumãbiakĩ haska xinãma hatũ huĩti nixmama nuitapabiai benimakubaĩkĩ hawa yauxiama hatũ pei itxawakĩ: “Eskarabes nũ hayabũ hawara nũ haya hatu inãkĩ Jesus ikũwaĩbu Jerusalém anua merabewanãkãwẽ”, iwanã, itxapa itxawaimabuki, pei itxapa hayabu keskakinã.

³ Haska wakĩ hatũ xinãnẽ inãkuĩkĩ hawa yauxiama hati inãtirumabia binumaibu eã ẽ hatu uĩma ẽ matuki txaniaii.

⁴ Nũ haska hatu yunuamabia nuku ea akĩ: “Nukũri nukũ betsabu nũ hatu merabewakatsis ikaii”, ikĩ nuku yuikubainimabuki.

⁵ “Hati bikãwẽ”, ishũ nũ hatu manakamamabia haska Deusũ abumis keska wakĩ hatũ yurawẽ nukũ Shanẽ Ibu dukũ duawanũ ikĩ nukuri ha katxu merabewaimabuki, hatũ inãkuĩwenã.

⁶ Haskakẽ pei itxawakĩ Macedônia mai pakea anu itxamisbu anushũ Titõ hatu taewamaima keska wakĩ matu anu kashũri hau matũ merabewati pepa mã itxawaxina hau matu itxawamakĩ pewai kashanũ Tito nũ haska yunuxinaki.

⁷ Matunã, ikũwãkĩ betsabu mã hatu binumiski, Cristõ kakape ikũwãkĩ inũ, Deusũ hãtxa shabakabi unãkĩ inũ, shabakabi unãnepakĩ inũ, hamapai Deus mã ashũtiru akĩ inũ, haska merabewati nuku anua nui mã tapĩmiswẽ taea ikũwaĩbu betsa mã hatukiri xinaĩnã matũ nuikipa uĩmakĩ Jerusalém anuabu nuitapaibu hatu merabehairawakãwẽ, betsabũ akima binumakinã.

⁸ Haska matu yuikĩ ẽ matu yunuti mese washunamaki. Hakia Macedônia anuabũ hatu ashuĩmabu keska wakĩ Jerusalém anua nuitapaibu ikũwaĩbuwẽ maturi mã nuiai shabakabi dasibibu mã uĩmatirubuki, iwanã, ẽ matu haska xinãmaii.

⁹ Ha inũ, nukũ Shanẽ Ibu Jesus Cristo nai anua hawẽ Epa Deusbe hiwea habe shanẽ ibuhairabia dasibi hawenabia henebirã hawẽ pepawẽ matu pepawanũ ika matuwẽ taea nuitapai matuwẽ nui mawaniki, hawẽ taea mã nuitapama dasibi haska yubakani mã ibu washanunã. Haska matu washuniwẽ taeshũ mã hatu merabewatiruki.

¹⁰ Haska inũ, na haska merabenãtikirirã, eã haska ẽ matukiri xinaĩ matu yuinũ ea nĩkakãwẽ. Hatu merabewakatsis ikĩ bari betsatiã matũ pei itxawakĩ taewakĩ benimayabi mã ayamaki.

¹¹ Natiã ana matũ pei itxawakĩ haska mã hatu merabewakatsis iyama keska wakĩ benimai mã yubakai taeyama keska habias xinãwẽri ana benimakĩ matũ pei haki dasiwakĩ itxawakĩ keyutã hatu inãshãkãwẽ.

¹² Hanushũ tsuabũra txanima kayabi yura betsa merabewakatsis ikaibu Deusũ hatũ xinã nuima unãkĩ hatuwẽ Deus benimamiski. Hawara haya inũ hawara hayama xinãma hakia haska hawara pepa nũ haya nũ inãtirubu Deusũ nukukiri xinãmiski.

¹³ Haska merabenãtikiri ẽ matuki txaniairã, betsabu mã merabewamatiru hirabi matũ mesti mã atirumaki. Txipu mã nuitapatiruki. Haskakẽ hawara mã hayama iriaya habias keskari wakĩ matu manakutirubuki, iwanã, ẽ matu yuaii.

¹⁴ Natianã, Jerusalém anuabu ikũwaĩbu nuitapai piti eskarabes hayabuki. Hakia maturã, itxapa mã hayaki. Haskawẽ taeshũ txipu haburi itxapa hayabũ maturi eskarabes mã hayakẽ matu merabewatiruburiki. Haskai mã binunãnãtirubumaki, senẽbukuinã.

¹⁵ Haska Moisés keneni nĩkakãwẽ: “Nai anua duru Deusũ niri akai habũ itxapa tupikĩ itxawaibũ hanushũ betsabũri eskarabes tupikĩ itxawariatã habũ ha piti pi hawa bika teneama ipaunibukiaki”. Haska keska xinãkãwẽ.

Titobe buaibukiri Corinto anuabu Paulõ hatu banabimanikiaki, na hãtxarã

¹⁶ Hanushũ matu merabewakatsi iki nũ matuwẽ nuiai keskai Titori habias xinã haya matuwẽ nuiriai kakatsis iki kaya benimakĩ Deus pepa wakĩ ẽ kẽwaiĩ. Hau matu anu kanũ nũ nitxiã hawaira matu anu kaikiki.

¹⁷ Habiaska xinãyã daki ẽ yunua hawaira ea nĩkatã hamebi matu merabewakatsis iki matu anu kaikiki.

¹⁸ Tito matu anu kaya nukũ betsã Deusũ kakape datã akĩ pe yusĩ heneisma hakiri dasibibũ pe uĩkĩ yuimisbu Titobe nũ ha nitxĩriaii.

¹⁹ Haska inũ, hau Jerusalém anu nukube kakĩ nukubetã ha inãkuĩ pei bushanũbũ, iwanã, Macedônia anushũ ikũwaĩbu itxashũ ha huni katuimabuki. Ha inũ, nukunã, ikũwaĩbu betsabu nuitapaibu nũ merabewakatsis ikai habũ nuku uĩkĩ nukũ Shanẽ Ibu nũ duawai merabenaĩ nũ haska abuai nũ hatu uĩmakatsis ikaii, haska daya beyairã.

^20-21 Yurabũ nukukiri yuikĩ: “Ikũwaĩbũ pei itxapa Jerusalém anuabu itxawashunimabu haska Paulõ inũ habe buaibũ bukĩ haska waimabumẽ?” iki hau nukukiri xinã txakai ha iyamashanũbũ dasibi shabakabi pewakĩ haska Deus inũ yurabũ nuku amakatsis ikai hatu uĩmakĩ nũ pewanũbũ hawara yauxiama mã hatu inãkuĩshanai benuama aru pewatã nũ hatu bushũshanaii.

²² Ha inũ, betsarã, habube ẽ nitxĩainã, nukũ betsa ikũwaĩ pepa ma kayatapĩni txĩtuĩsma hamapai betsa betsapa pewanika ha dikabi mã haki txiti itiru ẽ ha matu nitxĩshũriaii.

²³ Hamẽ Tito ebe dayakĩ ebetã matu merabewamis mã unaiĩ. Hamẽ ha nukũ betsabu Macedônia anua ikũwaĩbũ katuimaburã, habe ẽ hatu nitxĩainã, Cristõ kuxipa hayaburi bukanikiki.

²⁴ Haskakẽ habu ha ikũwaĩbũ matu uĩayã haska mã hatuwẽ txanima nuiai hatu uĩmakĩ beyawashãkãwẽ. Mã hatu haska waya haska wakĩ nũ matukiri kẽwãkubaĩmis mã hatu uĩma kayabishanaii.