2 Coríntios 7 - Kaxinawá Bíblia (BR)

¹ Ẽ betsabu inũ ẽ puibuũ, haskakẽ Deus nukuki hawẽ pepa yubakani hawẽ hãtxa nũ hayaki. Haskawẽ taeshũ nukũ yura inũ nukũ yushĩ mekei Deuski mesekĩ ana hawara txakabũ nuku atimapa watiru ana akama henetã pepai hawenas ikubainãkãwẽ. Haskai nũ hawama dasibi Deusunabu itirubuki.

Paulõ yunua txibãkĩ ashuaĩbu benimahairanikiaki, na hãtxarã

^2-4 Mã pe hiweabuwẽ taea matukiri nĩkatã xinaĩ hawa dateama matukiri shabakabi hãtxakĩ ẽ matu kẽwaiĩ. Hamapai bika nũ tenerabebiai haska mã pe hiweabu nĩkai ẽ huĩti benimahairaii. Matũ txakabu henetã nuku keskakĩ Deus duawanũ ika mã hiweaya matuwẽ nuihairai ẽ matuki ana ha ikamaki. Haskarã, ma bebũkiri ẽ xinãwẽ ẽ matukiri txanimaki, ẽ matube hiwekatsi ikai inũ ẽ matube mawakatsis ikairã. Hanua nũ tsua txakabuwaismabiakẽ yura eskarabes matu anushũ nukukiri xinã txakakĩ: “Paulo inũ habetã yusĩmisbũ nukũ hamapai biãkĩ nuku nuitapawakĩ itxakawakĩ nuku paraĩmabuki”, ikaibu nũ hatu haska waismawẽ taeshũ hatu ikũwãyamakãwẽ. Hakia nũ matũ haibuaibuwẽ taea matuwẽ nuihairakĩ nũ matu pe xinãmis keska wakĩ nukukiriri pe xinãkãwẽ.

⁵ Macedônia mai pakea anua nũ huai yura itxapabũ nuku yumãwãkĩ nuku haska wakubiranimabu matu yuinũ nĩkakãwẽ. Deus danãkĩ nuku itxakawakĩ bikawakĩ nuku deteaibũ harakiri haskatima date paepai nũ hani haskatã huĩrukũtirumahaira ikimaki.

⁶ Hakia haska yura babu punu nukabu Deusũ benimawamistũ nukũ haibu Tito nukuki nukumakĩ Deusũ nuku benimawaimaki.

⁷ Ha Tito hikituxikĩ nuku benimawai bestiwẽma hakia haska matube pe hiwetã matube haskaxina txaniai nĩkai inũ haska ha huni hawẽ ibuã aĩbe hiwea nitxĩmashũ ikis mã ha huni merabewai inũ, haska mã ea uĩkatsis ikai Tito nukuki txaniaya ẽ xinã txãkaĩ matuwẽ ẽ tse ikũkainimaki.

⁸ Hanushũ ẽ kenewẽ ẽ matu dakewakĩ huĩti nixmawakĩ ẽ matu tsiũ akima ẽ unaiĩ. Ha inũ, matu haska bumai eari ẽ huĩti tsiũ iriayuimaki. Ẽ matu haska waima ẽ ana haskakiri matu xinãmaki.

⁹ Hanushũ ẽ matu haska waya matũ txakabu unãtã xinã betsa watã hawara Deusũ matu amakatsis ikai dateama mã akimaki. Ha inũ, matu ha abiakĩ nũ hawa matu txakabuwama ikima mã unaiĩ. Hakia nukũ hãtxa nĩkabiatã matũ xinã mã betsa wamakenã, Deusũ matu kupikeanimaki. Haskawẽ taea natiã matuwẽ ẽ benimaii.

¹⁰ Tsuabũra ikũwãkĩ nũ txakabu wai unãtã henenũ ikĩ xinã betsa wai nukũ huĩti nixmaya hau nukũ txakabu nuku buashunũ Deus benakĩ nũ ea akaya benimakĩ nukũ txakabu ana xinãma nuku hakimawakĩ Deusũ nuku buashũmiski. Hakia habũ Cristo ikũwãbumanã, hatũ txakabu unaĩ punu nukabia hatũ xinã betsa wama Deusũ hatu merabewama mawa kayabi hayapakeshanikiki.

¹¹ Hakia maturã, matũ txakabu haska Deusũ matu unãmaiwẽ matũ huĩti nixmabiatã pepanũ, iwanã, ẽ yusĩa txibaĩ ẽ haska abuai ea uĩmai eki mesekĩ ha hunĩ txakabukĩ matu txakabuwaima haska waima ẽ matu xinãma matu datei haki sinatatã pewai hawa kuxi dakewakĩ mã nemaimaki. Haska ẽ matu waima ha huni pewai mã hawa hawẽ txakabu ana habe hayama nũ unaiĩ.

¹² Eskawẽ taeshũ ẽ matu ha aniki. Ha huni hawẽ ibuã aĩbe hiwea merabewanũ, ikama inũ hunĩ hawẽ aĩ ma mebiã merabewanũ ikamari hakia haskama nukuwẽ nuikĩ haska nukũ yusĩa mã txibãkatsis ikai Deusũ matũ xinã unãmaya mã unãnũbũ: “Mã itxamis anua ha huni nitxĩrikãwẽ”, iwanã, matu anu kene bumakĩ ẽ matu haskakiri xinãkĩ bumayamaki.

¹³ Hawaira ẽ yunuti txibãkĩ mã akimakẽ ana huĩti nixmama matuwẽ hanũkaĩ nũ xinã txãkaiĩ. Haska bestiwẽma Tito matube hãtxakĩ matũ xinã pe unãtã matuwẽ xinã txãkãkirani nukuki ana nukutã matukiri nukuki txaniaya haska tibi matukiri nĩkatã nũ benimahairakũkainaii.

¹⁴ Haska hãtxa txanima nũ matu yuimis keska wakĩ Tito matu anu ẽ nitxĩriama matukiri kẽwãkĩ ẽ kaneama ikimawẽ taea ẽ hawa matuki txakabumaki. Haskawẽ taea txanima hawara matukiri ẽ yuima mã habiaskaki. Haska ẽ Tito yuima keska uĩmakĩ mã beyawaimawẽ taea nũ matu kẽhairawaii.

¹⁵ Ha inũ, haska eki inũ ẽ keneki mesekĩ Tito beyawakĩ mã iakeakekĩ ẽ kene ẽ matu anu bumayama nĩkatã ẽ yunuti mã txibãmis xinaĩ matu uĩtãyamashũ Titõ ana matu abuhairakubainikiki.

¹⁶ Mã txĩtuĩsmawẽ taea ẽ matuwẽ benimahairariakũkainaii.