2 Coríntios 6 - Kaxinawá Bíblia (BR)

^1-2 Ha dikabi yura tibi Deusũ yuikĩ: “Ẽ tsuara nĩkakatsis ikaya mĩ ea kenaya mĩ hãtxa nĩkatã ha shaba ikaitiã ẽ mia mekekĩ merabewashanaii”, ikaya nĩkatã Isaíasĩ keneniki. Haska shabakabi ẽ matu xinãmai nĩkakãwẽ. Natianã, Deusũ matu nĩkakatsis ikikiki. Ha inũ, natiã matu mekekatsis iriaikiki. Haskakẽ mã Deusbe dayakĩ ashũmis matu yununũ nĩkakãwẽ. Hamẽmẽs Deusbe haibunamei beparameama ikũ kayabi Deusũ hawẽ pepa ma matu uĩmaki. Danãyamakãwẽ. Haskawẽ taea nukurã, nũ Deusũ daya ashũkĩ merabewai dayashunikabuki.

Hamapai bika Paulo tenemabiabu txĩtuãma shabakabi hatuki txaninikiaki, na hãtxarã

³ Deus nũ dayashunaiwẽ taeshũ hau tsuabũra: “Mã kaneaii”, iki hau nukukiri hãtxayamanũbũ pe hiwekũkaĩkĩ nũ tsua kanekĩ uĩmatxakaismaki.

⁴ Hakia nũ haskai Deusũ tsuma ikinã, eskawẽ nũ matu uĩmamiski. Hamapai bika nuku tenemaibu mei hawa hayama nuitapakĩ nũ hawa hatu kemama tenekubaĩmiski.

⁵ Eska tibi nuku wabu meirã, nuku unãbumã nuku kuxa kuxa akinã, nuku bitxikinã, nukuki shukubirã hãtxa txakabuirã, daya kuxipa meirã, usha tenekĩ buni tenetã nũ Deus dayashũkũkaĩmiski.

⁶ Haska inũ, nukũ hiwea pepa kayabi nũ hatu uĩmairã, tsua parãma inũ, unãnepai sinatama txanima nũ ikũ kayabi ikai Deusũ Yushĩ Pepatũ kuxipaya nũ Deusũ tsumabu txanima nui kayabi nũ hiwekũkaĩmiski.

⁷ Ha inũ, Deusũ kuxipa nuku merã nũ hayawẽ taea kaka txanima nũ yuimiski. Habias Deusũ kuxipa pepawẽ unãmakĩ nũ hatu atximamiski. Ha inũ, habiawẽri hakiri txakabu yuibiaibũ nũ hatu nemamiski.

⁸ Ẽ hanu haska wakĩ hatu merabewa bestiaitiã yura betsabũ nuku kẽwaĩbũ hatiritũ yuãkĩ nuku kẽwaĩsbumaki. Ha inũ, yura betsabũ nukukiri shetxakaibũ betsabũ nukukiri pe yui hãtxamisbuki. Ha inũ, yura betsabũ nukũ yusĩa danaĩ: “Matxupaki”, nuku wabiaibũ txanima yui besti nũ hãtxakũkaĩmiski.

⁹ Yura itxapabũ nuku uĩsma akawabiaibũ betsabũ nuku unãhairamisbuki. Danãkĩ nuku debu wapaibiabu habiaskabia nũ hiweyukũkainaii. Nuku itxakawabiakĩ hawa nuku tenãriabumaki.

¹⁰ Ha inũ, habũ nuku xinã nũ punu nuka dabanẽ xinãkanikiki, Cristo txibaĩ nũ xinãtxãkaĩ nũ benimabiakũkainaya nũ hamẽ nia nuitapai keska xinãmisbuki, nũ hatu tapĩmai itxapa enayabiakenã. Nukuburã, nũ hawa hayama keskabia dasibi Deusũ nuku haya wamiski.

¹¹ Corinto anushũ ebetã ikũwaĩbuũ, hãtxa matu bumai hawa huneama hãtxa shabakabi besti nukũ xinãnẽ hawa teshewama nũ matu yuiaiwẽ taeshũ

¹² haska mã nukukiri xinãmis xinaĩrakãwẽ. Nũ matuwẽ nuikĩ nũ matu danãmabiakẽ matũri matũ nui uĩmakĩ mã nuku hawa waismaki.

¹³ Ẽ matu yuiai ea nĩkakãwẽ. Mã ẽ bake keskabu ẽ matu waii: “Merabewai haska ẽ matuwẽ nuimis keskai duapai ewẽri nuikãwẽ”, iwanã, ẽ matu keneshunaii.

Ikũwãbumabe ketashametimakiaki, na hãtxarã

¹⁴ Haska matubũ mã ikũwaĩnã, ha habũ ikũwãbumabe Deusũ matu ana hatube ketashamekatsi ikama xinãnishũ xinãmiskiri matu yuinũ nĩkairakãwẽ. Hawara Deusuna peparã, ha danaĩ pepabe husitirumẽ? Shaba pebiakẽ mexũ haibuai shabatirumẽ?

¹⁵ Habiaskariai Cristo Satanásbe haibunaĩ pepatirumaki. Ikũwaĩbu betsari ikũwãbumari hatube haibunaĩ pepatirumaki.

¹⁶ Hanushũ Deus kẽwãti Templorã, hanushũ yushĩ dami betsa ha merãshũ kẽwãtirubumaki. Nukũ yurarã, hanushũ Deus hiwea kẽwãti Templo keskaki. Haska Deusũ hamebi ibubiskiri yuini nĩkakãwẽ: “Habu anu hiwei hatube nikũkaini ea ẽ hatũ mekenika Deus ikaya, haburã, enabu ishãkanikiki”,

¹⁷ ikaya kene betsawẽ ana habias hãtxawẽ Deus Yavẽ yuikĩ: “Habũ ea danaĩbu anua kaĩbaĩkĩ henebaĩkĩ ana txakabu mei atimapayamakãwẽ. Mã haskakũkainaya matuwẽ benimakĩ ẽ matu beyawashanaii,

¹⁸ matu haska watã ẽ bakebu matu wai matũ epa ẽ ikũkaĩshanaii”. Deus kuxipa dasibi binuatũ yuiai hawẽ hãtxa yuishunikabũ nĩkatã keneniki. Habiaskari ẽ matu yuiaii.