2 Coríntios 5 - Kaxinawá Bíblia (BR)

¹ Haska inũ, na mai anu nukũ yurawẽ nũ hiwea peã shubuwẽ nũ hiweyua keskabukiaki, hatiara hawaira nũ debushanairã. Hakia nai anu nukũ hiwe nũ hanu hiwei kashanairã, Deusũ ma nuku akibi ashuniki, yurabũ hiwe wamis keskamarã.

² Haskakẽ na mai anu nukũ hiwea txakabuwẽ nũ nuitapayuaii. Hanua txipu nai anu nukũ hiwe pepa anu hiwei kakatsi iki nũ manayukubainaii.

³ Na nukũ yura mawa txapukẽ hawaira nũ hawa saweama keska ishanai nũ unaiĩ. Hakia yura bena txipu Cristõ nuku inãyã nũ tari bena sawekĩ akawashanaii.

⁴ Natiã nũ hiwearã, hawawẽ haskatima nũ bika teneyuaii. Mawatã nũ txapukatsi ikamabia nũ ma mawa kasmai nũ hiweyuarã, Jesusũ nai anu nuku ainitã hiwea bena inãkĩ nukũ yura bena nuku inãshanai nũ manaii.

⁵ Deusũ nuku haki maewakatsi bebũkiri yubakatã hawẽ Yushĩ Pepa hawẽ unãti watã kanetima nuku inãni hawẽ taeshũ nũ bishanairã, nũ hayaki.

⁶ Haskawẽ taea nũ benimakũkainaii. Na nukũ yurawẽ nũ hiwea nukũ Shanẽ Ibube benãta nũ hiweyua nũ unaiĩ.

⁷ Ha shabakabi nũ uĩyamabia uke merã xinãkĩ nũ ikũwaiĩ.

⁸ Na nukũ yura nũ henebaĩshanaii, nukũ Shanẽ Ibube hiwei kakinã. Hawa dateama punu nukama nũ hiweyukũkainaii.

^9-10 Ha inũ, dasibi nukuburã, nũ hamakiri kama nukũ Shanẽ Ibuhaira Cristo hanu tsaushũ unãti wamis anu haki nukutã nuku tibibũ habis nũ beisshãkanaii. Nuku tibi unãkĩ Cristõ nuku manakuakeakeshanikiki, na yurawẽ hiweshũ nũ pepa amis inũ nũ txakabu amis unãtã nuku tibi kupikinã. Haskakẽ na mai anu nũ habe hiweriama kasmai nũ habe hiwei kashanairã, nukũ yurawẽ nukũ Shanẽ Ibu nũ benimawakatsi ikaii.

Cristõ Deus nuku daewashũkĩ nuku haibuwamanikiaki, na hãtxarã

¹¹ Haskakẽ nukũ Shanẽ Ibũ kuxipa meseki datekĩ hawẽ kaka pepakiri yurabũ hau Jesus ikũwanũbũ nũ hatu yusĩbaunai haskai nũ hiwemis Deusũ nuku unãhairaikiki. Haskawẽ taeshũ hau mã tapĩrianũbũ pe hiwekĩ hãtxa txanima nũ matu yusĩmis unãkĩ mã xinãtiruki.

¹² Haska yurabũ xinãmis keska xinaĩ nukũmebi nũ keãmaki. Hakia nukukiri hãtxakĩ nukukiri pe xinãkĩ mã nuku kẽwãtirubuki. Betsabũ yura bemakis uĩkĩ unãti wamisbuki, hatũ huĩti hatu shabakabi uĩyamabiarã. Haska nũ yusĩmis besti ẽ matu yuiai ea nĩkakãwẽ.

¹³ Nũ patapa unaĩsmapa keskabukiaki. Hakia abukĩ nũ Deus duawaibu yura betsabũ nuku uĩkĩ haska nũ dayamis nĩkama yuikĩ: “Paulo inũ habetã yusĩmisbu patapa unaĩsmapabuki”, ikaiburã, haskakĩ Deus nũ duawamis yura betsabũ unãbumaki. Hatuwẽ nuiyamakãwẽ. Ha inũ, yura betsabũ nuku uĩmisshũ nukukiri yuikĩ: “Shabakabi hatu yusĩkanikiki”, mã imisburã, matu merabewanũ, iwanã, nũ akubainaii.

¹⁴ Cristo nuikipatũ nũ hawẽ kuxipayabu nuku ma mestẽwanishũ nuku txishukubainikiki. Dasibibuwẽ taea huni bestitxai nuku mawashuni ikũwãnishũ nũ unaiĩ. Habiaskariai habũ ikũwãshanaibu itxapaburi habe mawanibu keskaki.

¹⁵ Cristo mawairã, dasibi hatu ishuniki. Hamẽ ikama habu hiweabu ishuinã, hau ana hatũmebi hatũ xinãnẽ besti hiweyamanũbũ hau ha hiweshũshanũbũ hatu ishuniki, mawatã ana hatu bestẽshunirã.

¹⁶ Haska inũ, nukunã, haska ikũwãbumã xinaĩ hãtxamisbu keska nũ ana hatũ xinã keskamaki. Ha dukũ Cristokiri xinãkĩ: “Yura kayabi bestiki”, iwanã, nũ xinãbiaya Deusũ nuku ma betsa wakẽ betsahaira Cristokiri nũ ma xinaiĩ.

¹⁷ Hanushũ tsuabũra Cristo ikũwaĩ haki nukui dasiayarã, habũ xinã sheni Deusũ betsa waya hawara mekĩ txakabuwamis henetã hatũ Shanẽ Ibu Cristo txibãnũ ika yura bena keskabuki.

¹⁸ Na haska Deusũ daya tibirã, Cristo hamebi hawẽ Epa daewakĩ hawẽ haibuaibu nuku wamaniki. Haskawẽ taea nũ daenamei haibunamenũbũ nuku katunishũ hawẽ kakape nuku yusĩmakubaũmiski.

¹⁹ Na habias Deusũ xinãni ẽ matu ana yuiai ea nĩkakãwẽ. Cristowẽ yurabũ txakabu ana xinãtimawani Cristobe Deus dayakĩ yura dasibibu hatu haibuwakatsis ikĩ habũ Cristo unãtã ikũwaĩ hau unãnuma hiwekubaĩshanũbũ na txanima hãtxa nũ hatu yusĩkubainũ nuku yununiki.

²⁰ Haskakẽ Cristõ kuxipa nũ hayawẽ taea nũ hawẽ hãtxa bushunikabuki. Nukuwẽ Deus hãtxai keskaya Cristo ea ashũkĩ nũ matu yukashũmiski. Eskaki. Matu yuinũ nĩkakãwẽ. Nukuwẽ taeshũ Deusũ hãtxa ikũwaĩ Cristo matu mawashuniwẽ Deus daewai habe haibunamekãwẽ.

²¹ Jesus Cristo hawa txakabu meamahairabiakẽ hakia nukũ txakabuwẽ taeshũ txakabu memis keska wakĩ Deusũ Cristo aniki. Nũ Cristowẽ taea pepa keskabu Deusũ nuku ana kupikatsi ikama: “Ẽ haibuaibu txakabu hayama keskaki”, iwanã, Deusũ nukukiri haska xinãmiski. Haskakẽ Cristo matu mawashuniwẽ taea Deusbe haibunamekubaĩkãwẽ.