2 Coríntios 4 - Kaxinawá Bíblia (BR)

Jesus Cristokiri yusĩkubauni eskanibukiaki, na hãtxarã

¹ Haskakẽ Deus nukuwẽ dabanã ikĩ hawẽ yuba benakiri nũ yusĩnũ ishũ nuku yununiwẽ taea hawẽ babui punu nukai nũ beshtekeisbumaki.

² Hakia hawa dakeama hawara huneshũ nũ aisma inũ, matxupakĩ tsua nũ paraĩsma inũ, Deusũ hãtxa hamakiri yuikĩ nũ betsa waismaki. Nũ haska wamiswẽ taea hiwekĩ nũ yusĩmis Deusũ unãyã hawẽ hãtxa nũ matu shabakabi yusĩkubaĩmiski, hau dasibibũ nukũ yusĩa nĩkatã hatũ xinã pewanũbunã.

³ Cristokiri nũ hatu yusĩaĩ ha hãtxa tsuãra nĩkamarã, hãtxa bepukuaki. Habu hatũ txakabuwẽ benushanaibũ nĩkatirubumaki.

⁴ Tsuabũra habũ ikũwãbumarã, na mai anushũ hatũ shanẽ ibu Satanásã hatu parãkĩ hatũ xinã nemakĩ bekũ keska hatu wamiski. Haskawẽ taeshũ Cristo, Deus itsa hiwea mekenika kuxipa yurabu mawashũtã hatũ txakabu ana xinãma buakatsis ini nĩkabiakĩ kaka pepa shabakabi ikũwãtirubumaki.

^5-6 Haska inũ, mai damiwakĩ Deusũ yuikĩ: “Mexu anua hau shabayunũwẽ”, anishũ habiatũri nukũ huĩti anu shaba peshani keska wakĩ Deusũ Cristo nuku unãmaya hawẽ kaka pepa Cristokiri nũ shabakabi matu unãmakubainaii. Haskakẽ yusĩkĩ: “Jesus Cristo nukũ Shanẽ Ibu kayabiki”, ikĩ, “Jesus Cristo abuhairakĩ nũ matũ dayaru bestiki”, ikĩ shabakabi dasibibuki txani ibubis nũ keĩsmaki.

Bika tenebiakĩ Paulõ Deus ikũwãkubainikiaki, na hãtxarã

⁷ Ha inũ, Deusũ yusĩkĩ hawẽ pepakiri nuku tapĩmaya dasibi kuxipa Deusuna inũ nukũmebi nũ hawauma hau mã unãnũbũ nukũ yura babuhaira, mai xumu pusimis keskabianu hawẽ kakape nukũ huĩti merã nuku netãtã hawẽ tsumabu Deusũ nuku waniki.

^8-10 Haska inũ, Jesus anibu keska wakĩ nukuri itxakawakĩ tenãkatsis ibiaibũ hamapai bika betsa betsapa nuku waibu tenekĩ Jesus Cristo nukũ Shanẽ Ibu hiweatũ nuku merabewakubainai txĩtuãma dasibibu nũ hatu uĩmakubainaii. Haska tibi Jesus Cristõ nuku merabewamis matu yuinũ nĩkakãwẽ. Hamapai bika betsa betsapa nuku tenemakĩ harakiri nuku pashatimawabiaibũ nukũ Shanẽ Ibuã bai nũ manaka besumawamaki. Ha inũ, nuku tenãkatsis ibiaibũ hatuwẽ datekĩ nukũ Shanẽ Ibu nũ henebaĩsmaki. Nuku nemanũ ishũ kushakĩ nuku di abiaibunã, hawẽ taeshũ nuku yamawatirubumaki.

¹¹ Natiã nukuri hiweyushũ Jesus nũ txibaĩwẽ taeshũ nuku tenãkatsis ibiaibũ Jesus ini keska hiweriakĩ nukũ yurawẽ nũ haskashunai dasibibu nũ hatu uĩmakubainaii.

¹² Haskakẽ shaba betsa nũ matu mawabiashũshanaya Jesus Cristokiri nũ matu yusĩmiswẽ taea niti ikama maturi benuama mã habe hiwepakeshãkanaii.

¹³ Haskakiri Davĩ kenekĩ: “Deus ikũwaĩ hakiri ẽ hãtxakũkainaii”, ini keskai nukubũri Deus ikũwãriai hawara nũ ikũwaĩ nũ hakiri yui hãtxariakũkainaii.

¹⁴ Ha inũ, Jesus mawa Deusũ bestẽwanishũ nukuri bestẽwãkĩ maturi bestẽwãriatã Deusũ ibubis nuku habis beismakĩ nuku iyushanai unãkĩ hawẽ hãtxa nukũri nũ yusĩkubainaii, hawa dateamarã.

¹⁵ Haska inũ, Deusũ matu pepawaya mirimabũ Jesus Cristo ikũwãtã benimakĩ mã Deus kẽhairawanũbũ hawara matuwẽ taea bika tenekĩ matu merabewanũ ika nũ ikũkainaii.

^16-18 Hawara bika shabakabi mekĩ nũ teneai hawaira keyushanaiwẽ nuiama haska Deusũ mekekĩ niti akama nuku habe hiwemashanai uĩriamabia xinãkĩ nũ uĩkatsis ikaii, ikibi ika hunea keskarã. Ha inũ, natiã na hiweawẽ nũ hiweairã, bikaixta nũ teneai hawama keskaki, hawaira hayabiatã keyumisrã. Hakia haska hawẽ taea nũ bika teneairã, Deusũ pewẽ kupikĩ nuku benimawatxakayamashanai akũhaira bikatsi nũ manaii. Haskakẽ nukũ yura ewanai babui mawabiaya bari tibi Deusũ nukũ hiwea tibi uke meranua nuku benawakubainaya punu nukai nũ txĩtũtirubumaki.