2 Coríntios 3 - Kaxinawá Bíblia (BR)

Corinto anua ikũwaĩbu uĩkĩ Paulõ hatu yusĩmiskiri unãtirubukiaki, na hãtxarã

¹ Na haska ẽ ana matu yuiairã, ana nukũmebi nũ kẽkatsi ikamabia txanima besti ẽ matu yuiai nĩkakãwẽ. Tsuãra hatu yusĩtanũ ika hukĩ habũ keneya bemisbuki. Hamẽ nuku ikirã, huni betsã keneya nũ mapuisbumaki. Hanua matũ mae anuari nũ kaya hau merabewakĩ nuku i pewashanũbũ matũ keneya nũ kaismariki.

² Nũ ma matu yusĩmiswẽ taea matũ xinã betsa watã matũ hiwea betsa watã mã ma pepa besti hiwea hatu uĩmairã, haska nũ matu yusĩmis unaki kenea keskama nukũ huĩtiki kene nea keska dasibibũ ha kene uĩa keska wakĩ matu uĩkĩ unãkanikiki.

³ Deusũ hawẽ yunuti inũ hawẽ nemati Moisés inãkĩ mixkiki Deusũ kenekĩ netãni keska wakĩ natiã shabakabi matu uĩnũbũ nukũ yusĩawẽ Cristõ hawẽ Yushĩ Pepawẽ txĩta tushkutimawẽ matũ huĩtiki kenea keska wakubainikiki. Hakia Deus hiweatũ Yushinĩ matũ xinã betsa wamakĩ matũ yuraki hawẽ kene netã keska waikiki.

^4-5 Ha inũ, nukũmebi nũ ikai keskai nũ kẽtiruma inũ nukũmebi nũ hawa atirumabia hawara dasibi nuku amakĩ Deusũ hawẽ kuxipawẽ nuku amamiski. Na haska ẽ matu yusĩmisrã, Cristowẽ taea Deus nũ ikũwãpakeaii, nũ ana txĩtuãmarã.

⁶ Jesus Cristo mawaiwẽ Deusũ hawẽ nuku yuba bena wai maewakinã, ana hakiri kenewẽ akama iniki. Hakia ha binumakĩ hawẽ Yushĩ Pepawẽ aniki. Haskawẽ taeshũ tsuabura Deusũ hawẽ taeshũ nuku tapĩma nũ hawẽ dayarubu besti nuku wamiski. Hamẽ Moisés Deusũ yusĩkĩ hawẽ yunuti inũ hawẽ nemati inãkinã, tsuãra ha yuba meneamakẽ hawẽ hatu kupikatsi amaniki. Hakia Deusũ Yushĩ Pepatunã, nuku haska wama ha binumakĩ hawẽ yuba benawẽ nuku hiwea inãkubainikiki, nũ habe hiwepakeshanũbunã.

⁷ Deusũ hawẽ yunuti inũ hawẽ nemati mixkiki keneshũ Moisés inã hatu unãmakĩ yuikubainũ ika mati anua Moisés butukẽ hawẽ besu txashakirãkiranai maĩbiaya hawẽ datekĩ Israelbũ Moisés beistirubuma inikiaki. Haska hatu wabiani dasibi Deusũ yunuti inũ hawẽ nemati Moisés inãni tsuabũra txibãtirubuma ha dayani kanemisbu Deusũ hawẽri hatu kupishanikiki, niti akama Deusuma mawa kayabi tenemakinã.

⁸ Hakia haska nukũ txakabu Cristõ buakatsis inikiri Deusũ Yushĩ Pepatũ nuku yubakĩ hawara Deusũ Moisés yusĩa yusĩ hawẽ besu txasha txasha iki kuxipai txani pehairabianikẽ hawẽ Yushĩ Pepatũ haska wani ana binumaikiki.

⁹ Eskati wakĩ aniki, ana matu yuinũ nĩkakãwẽ. Hawara Deusũ Moisés yusĩni pebiakẽ tsuãra: “Dasibi Moisés hãtxa ẽ txibãtirumaki”, ishũ txakabuwaibu hawẽ taeshũ unãtã hatu kupiti kaka waniki. Haska hawara Moisés yuini kuxipabiakẽ Deusũ hawẽ bakewẽ taeshũ binumakĩ Deusũ nuku ma pepawaikiki.

¹⁰ Haska inũ, haska Deusũ Moisés yusĩni pebia hawauma keska hawẽ yuba benawẽ binuhairaikiki.

¹¹ Ha inũ, hawara mixkiki Deusũ Moisés keneshũ inãni hawẽ yuba pebia beshtekei beshmasaya hanua Cristowẽri nuku ana yuba bena wani nũ ma tapiã pehairakũkaĩshanikiki, niti ikama ikibi ikirã.

^12-13 Eska Israelbũ Moisés besu uĩkĩ hawara txashahaira maĩ beshmasai hau uĩyamanũbũ Moisés tari tuashwẽ hawẽ besu hunei bepukukũkaini keskama haska nukũri nũ ikũwaĩbu Cristo manakakĩ nukũ hãtxa hakiri huneama hawa dateama shabakabi nũ yusĩkubainaii.

^14-16 Haska Moisés hãtxa danãkubiranaibu hatũ huĩti Deusũ kuxiwani keska wakĩ natiã habias yubani hãtxa betsabũ danãriaibu hatũ huĩti Deusũ kuxiwariamiski. Moisés hãtxa keneni yuiaibu hatu nĩkamamakĩ bepukĩ hunemiski. Tsuabũra Cristo danãkĩ Moisés hãtxa nĩkatirubumaki. Tsuabũra na habiatiã Deus kẽwãnũ, iwanã, benakĩ Deus unãkatsis ikaibu hãtxa shabakabiwẽ Deusũ hatu nĩkamamiski. Haskakẽ Cristo ikũwanũ ikaibu Deusũ hatũ huĩti ana kuxiwama inũ Moisés hãtxa ana bepuama shabakabi tapĩkĩ nĩkatirubuki.

¹⁷ Hanua nukũ Shanẽ Ibu inũ hawẽ Yushĩ Pepatũ habiaskas xinaĩbũ hawẽ Yushĩ Pepatũ nuku mekeaya txakabũ nuku ana tsumama inũ pepanũ, iwanã, hawẽ yunuti inũ hawẽ nemati Deusũ Moisés yusĩniwẽ nuku ana bikawatirumaki.

¹⁸ Haskakẽ dasibi nũ Jesus Cristo ikũwaĩburã, ha yusĩniwẽ nukũ besu inũ nukũ xinã nuku ana bepuamaki. Nukũ Shanẽ Ibũ nukũ xinã nuku betsa wakubainaya hawẽ kuxipawẽ ha itsa nuku wakubainikiki. Unãshubira nukũ hiwea betsa wakĩ nuku pewakubainikiki. Nuku haska wakĩ nukũ Shanẽ Ibũ hawẽ Yushĩ Pepawẽ nuku hatu uĩmakubainikiki.