2 Coríntios 13 - Kaxinawá Bíblia (BR)

Corinto anuabũ hau hatũmebi unãtinanũbũ Paulõ hatu yununikiaki, na hãtxarã

^1-4 Yurabu mai hirabi anu mekẽnũ ika Jesus babuyunikẽ hunibũ atxishũ cruzki netãtã tenaĩbu Jesusũ hatu nemamakẽ hanua ma tenãbu Deusũ hawẽ kuxipawẽ ana bestẽwaniki. Haskakẽ nukũ Shanẽ Ibu keska babuyui hawẽ kuxipa Deusũ nukuwẽ matu unãmamiswẽ taea niti ikama Cristobe nũ hiwekuĩkũkaĩshanaii. Habiaskabiakẽ Cristõ kuxipawẽ ẽ matu yunumismẽkaĩ mã unãkatsis ikaibu matu anu ana kashũ Cristõ hãtxa txanima kuxipawẽ ẽ matu ha atiru ẽ matu uĩmai kashanaii. Ẽ matu yusĩtani ana matu yusĩ matube ana ka hiwea ẽ yubakayama keska txai hiwebia matu dapishũ ẽ yuiai keska ana ẽ matu banabimai nĩkairakãwẽ. Haratubũra ikũwaĩbũ txakabuwakĩ hatũ huĩti ana pewariabuma ẽ ana hatuwẽ nuiama iki kashanaii. Eska Deusũ yunua Moisés hatu yununiwẽ besti nũ hatu unãti watiruki: “Tsuãra txakabuwai hawẽ hãtxa unãkĩ yura dabe kasmai dabe inũ bestitũ hakiri txanii pikuaibũ habũ hãtxa ikũwãtirubuki”, ini ha yusĩa txibaĩ matũ itxati anu itxashũ habu txakabumẽkaĩ haska unãtinaĩ txitenamei penamebukũkãwẽ.

⁵ Haskakẽ matu anu ẽ ana kariamakẽ Jesus Cristo matuki dasia mã haska ikũwãkĩ pewaimẽkaĩ. Matũmebi uĩkĩ matũ xinã uke merã unãkãwẽ. Betsabũ mã ikũwaĩmẽkaĩ. Betsabũ mã daki ikũwãbumaki. Matũmebi ibubis unãtinãkãwẽ, haska mã kaneamamẽkainã.

⁶ Hamẽ nũ habũ matu yusĩmisrã, hawa txakabu wakĩ daka kanekĩ nũ matu uĩmatxakai hawa txĩtuãma nũ Jesus ikũwaĩ mã nuku unãtirubuki.

⁷ Nukukiri xinãkĩ unãti wakĩ hatibũra nukũ yusĩa mã abuamabiakẽ haska nukukiri mã xinaĩ nũ hawẽ nuiamaki. Hakia mã pe besti hiwenũbũ nũ matuwẽ nuikũkainaii. Haska mã hiweabu hau hawa txakabũ matu atxiyamanũ Deusũ kuxipa nũ matu yukashũkubainaii.

⁸ Haska wakĩ txanima hãtxa nũ danãtirumaki. Hakia txanima hãtxawẽ shabakabi nũ matu ashuãkeakemiski.

⁹ Haska inũ, Deusũ matũ xinã kuxipa waya hau niti ikama mã pepaki nukunũbũ nũ babubia benimakĩ Deus nũ matu yuka heneshunama ikũkainaii.

¹⁰ Haskakẽ matu uĩ kashũ matu ha akĩ nixmawakĩ ẽ matu ana babu wayamashanũ hakia merabewakĩ ẽ matu kuxipa wakubaĩshanũ nukũ Shanẽ Ibũ hawẽ kuxipa ea inãniwẽ matu yamawama mã ikũwaĩbu ẽ matu kuxipa wakatsis ikaii. Haskawẽ taea matu anu kariama bebũkiri ẽ hãtxa keneshũ ẽ matu bumaiwẽ taeshũ xinaĩrakãwẽ.

¹¹ Ẽ betsabu inũ ẽ puibuũ, matu keneshũkĩ ma ẽ keyuai nĩkairakãwẽ. Epa Deusũ duawakĩ merabewakĩ unãnuma matu hiwemakatsi ikaya matũ huĩti benimakĩ hawara Deusũ matũ hiwea matu pewamakatsis ikai arikãwẽ. Ha inũ, punu nuka pesburã, hau merabenãkĩ matu benimawanũbũ Deus hatu yukashũkãwẽ. Mã haskai hiweabu Deusũ matu abukĩ matu unãnuma hiwemai matube hiwekũkaĩshanikiki.

¹² Ha inũ, nukunabu matuki nukuaibu Jesusũ kenawẽ yuka iki benimai ikukunãkubaĩkãwẽ. Ha inũ, ikũwaĩbu Macedônia anuabũ hatũ hãtxa matu bumariakanikiki.

¹³ Nukũ Shanẽ Ibu Jesus Cristõ hawẽ pepawẽ hau matu duawakubainũwẽ. Ha inũ, matuwẽ nuikĩ Deusũ hau matu merabewakubainũwẽ. Ha inũ, Deusũ Yushĩ Pepatũ hau dasibibu matu haibunamemakubainũwẽ. Hatiski, ẽ hãtxarã. Paulo