2 Coríntios 12 - Kaxinawá Bíblia (BR)

Hamapai tibi Deusũ Paulo amanikiri hatu yuinikiaki, na hãtxarã

¹ Nama keskawẽ hawara nukũ Shanẽ Ibũ ea uĩmani ẽ matuki txani haskawẽ ẽ kẽtirumabia ekiri matu unãmahairakatsis ikĩ hawara nukũ Shanẽ Ibuã ea shabakabi unãmani ẽ matu yuiai nĩkairakãwẽ.

^2-4 Ma 14 bari kakẽ nai binua keyatapahaira anu Deus hiwemis pepanu ẽ yura kasmai ẽ yushĩ besti Deusũ ainitã ha hãtxa tsuã shabakabi yuitiruma Deusũ ea yuiniki. Haskara watã ea aininirã, ẽ yura kasmai ẽ yushĩ besti ea uĩmani Deusũ besti unaĩwẽ taeshũ eã ẽ matu yuitirumaki.

⁵ Haska ẽ ini ẽ hawẽ kẽtirubia ẽ hawẽ hawa keãmaki. Hakia haska babukĩ ẽ tenemis bestikiri txanikĩ ẽ yuitiruki, keĩnã, nukũ Shanẽ Ibũ ea merabewamiswẽ taearã.

⁶ Haska inũ, tatimabia ẽ keĩ hawara Deusũ ea ashũmis yuikĩ hãtxa txanima ẽ yuiaya hawara emebi ẽ akai inũ hawara emebi ẽ yuiai besti ikũwãkĩ hawara betsa betsapa Deusũ ea ashũmis ẽ ana matu yuikatsi ikamaki, mã tsuã ekiri haska xinãkĩ yuitirubumakenã.

⁷ Ha inũ, haska pepahaira ẽ uĩniwẽ taea keĩ ẽ hawẽruayamanũ Deusũ nemama Satanásã ea isĩ betsa inãkĩ ea musha tekea keska ea wani ẽ teneaii. Ha inũ, hawãra ea isĩ tenemaima tenekĩ

⁸ hau ẽ Shanẽ Ibũ ea shushawanũ, iwanã, dabe inũ bestiki ẽ ea aka

⁹ dabe inũ bestikiri ea yuikĩ: “Miwẽ nuikĩ ẽ mia duawamisrã, hatiwẽ besti mĩ benimatiruki. Isĩ tenei mĩ babubia mĩ ea dayashũkũkaĩkĩ ẽ kuxipa mĩ unãtiruki”, ea waniki. Haskakẽ yura babu haya Cristõ kuxipa hayakatsis iki haska emebi ẽ hawawatiruma ẽ hawẽ kẽtiruki.

¹⁰ Haskakẽ babui Cristõ kuxipawẽ ẽ kuxipatiruwẽ taea Cristo duawanũ, ika ẽ xinã txãkãmiski, eska tibiwenã, ẽ babuaiwẽ inũ, eki sinataibuwẽ inũ, ẽ yumaĩ hawaumawẽ inũ, ea tenãnũ ishũ ea itxakawaibuwenã, Cristowẽ dayai ẽ bika tenekubainaiwenã. Hanu ẽ babuhairaitianã, Cristõ kuxipa ẽ mekubaĩmiski.

¹¹ Haska tatimai ẽ keaĩ ẽ hawaumaki. Hakia mã ea kẽwãma danaĩbuwẽ taea ibubis kẽkĩ ẽ matu haska yuiaii. Ha unãnepabu parananãkĩ bemakis matu uĩmakĩ haska ekiri hawauma matu yuimisburã, hatũ hawawẽ ea binutirubumaki.

¹² Ha inũ, bika betsa betsapa mebiakĩ ẽ tenekubainimaki. Haska inũ, matube hiweshũ haska dasibi Jesusũ kuxipayabũ amis keska wakĩ eari habiaskari Deusũ kuxipa ẽ haya shabakabi matu uĩmakĩ dami betsa betsapa ẽ wakubainimaki, matũ berubirã.

¹³ Ha inũ, haska ikũwaĩbu maniabu dasibi duawakĩ ẽ yusĩmis maturi ashũkubaĩkĩ hatũ pei ẽ bibiamis matuna ẽ matu yukama ikimaki. Matũ pei mã ea inãkatsi ikama xinãkĩ matu bikawakatsi ikama matũ merabewati yukama ẽ kaneimamẽkaĩ. Matube hiweshũ matũ hamapai merabewati biama matũ huĩti ẽ nixmawaimamẽkaĩ. Ẽ haskakĩ kaneimakẽ ẽ txakabu ea hakimakãwẽ.

Dabe inũ bestiki Paulõ ana hatu uĩ kakatsi hatu banabimanikiaki, na hãtxarã

¹⁴ Dabeki ẽ matu yusĩtanima samama ana matuki banũ ika ẽ kakatsis ikĩ ẽ matukiri ana xinãtanaii. Hakia haska bakebu yumeriabumã hatũ hamapai xarabu hatũ ibubu mekeshuĩsma hakia ibubũ hatũ hamapai hatũ bakebu mekeshũshũ hatũ hawara bishũmis keskakĩ eã dukũ Cristokiri ẽ matu yusĩtani ẽ matũ ibuki. Matu haska wakĩ ẽ bakebu keska ẽ matu aniwẽ taeshũ matũ hamapai ẽ matu mẽkatsis ikamaki. Hakia mã Cristoki dasiabũ ẽ yusĩa ikũwãkĩ txibãmisbũ mã ekiri xinãtiruki. Haskawẽ taea Cristo besti mã txibanũbũ ẽ matu ana yusĩ kakatsis ikaii.

¹⁵ Matu anu hikitã matũ ibu keskakĩ matuwẽ nuihairakĩ matu merabewakatsis ikĩ ẽ hawara bikĩ dasibi ẽ pei putakĩ ẽ keyushanaii. Ha inũ, matu abuhairakĩ ẽ heneama ibiakũkainaya matunã, mã ea abu mirĩkĩ henekubaĩshanai?

¹⁶ Habiaskabiakẽ matũ pei biãkĩ ẽ matu daketapa waismabiakẽ ekiri tsuãra yuikĩ: “Nuku parãkĩ nukũ pei Paulõ hune biãkubaĩmiski”, iwanã, haratura eki beparamekĩ mã ea yuãtiruki.

¹⁷ Yusĩnã betsabu ẽ matu anu yunuxinabunã, habũ matũ pei itxawakĩ: “Ea bishũtãkãwẽ”, iwanã, ẽ hatu yunuamaki.

¹⁸ Ha inũ, Tito inũ ikũwaĩ betsa matu anu ẽ yunuxinabunã, pei matu biãkĩ matu parãxinabumẽ? Haskamaki. Habu ebetã yusĩmisbu keska xinaĩbũ habiaskari yusĩkĩ eãri ẽ hatu yunumistũ ẽ matu paraĩsmariki. Habukiri txakabu xinãyamakãwẽ.

¹⁹ Na eska ẽ matu yuiairã, hawara nũ matubetã kaneima ẽ ibubis nemakanaĩ ikimẽkaĩ? Haska ekiri mã xinã txakatirubumaki, ẽ matu haska waismabiakenã. Hakia nuku hãtxairã, Deusũ nuku unãti wakubainaya Cristoki dasitã nũ hawenabũ matu merabewakatsis ikĩ matuwẽ nuikĩ hawara inũ haskara Deusũ nuku amakatsis ikai shabakabi matu ashũkĩ dasibi nũ matu uĩmamiski. Haskakẽ ẽ betsabu inũ ẽ puibuũ, hawara nũ matu yuiai txibãkĩ matũ hiwea pewatã Cristoki txiti itã kuxipai ewarikubaĩkãwẽ.

²⁰ Ha inũ, tsuabũra ẽ hãtxa mã habũ danaĩ mã haskarara ẽ matu uĩ kashanai inũ, matũri haskarara mã ea uĩshanai matuwẽ ẽ dateaii, eska mã hiweamẽkaĩ ikarã, mã danãnanãbukuaĩwẽ inũ, huni betsa ikaiwẽ uĩ mã hatuki sinatamiswẽ inũ, mã pubeaĩwẽ inũ, mã ibubis keĩ binũnãnaĩwẽ inũ, hune mã yuãnanaĩwẽ inũ, mã shabakabi txitenamemiswẽ inũ, “Eã besti ẽ hatu binuaki”, mã ikaiwẽ inũ, mã merabenameismawenã.

²¹ Haska inũ, matũ mae ewapa anu ana ẽ kakẽ habũ txakabu betsa betsapa wakĩ kanekubaĩkĩ xinã betsa wariabumawẽ taeshũ Deusũ ea dakewashanaiwẽ ẽ dateaii. Uatiã mã txakabu heneriama ẽ matu uĩtanima keska ana habiaskaswẽ mã hiwea uĩ huĩti nixmahaira ẽ matuya kashatuxitiruki, eska tibiaibu uĩnã, tsuabura mã habũ txakabu heneriama haikaimas txakabuwẽ habũ xinã txakaibu inũ, huni dabe txutanameaibu inũ, aĩburi yura tibibube txutanameaibu inũ, atimapakĩ hatũ xinã benutã txakabu bestiwakubainaibuwenã. Ẽ betsabu inũ ẽ puibuũ, ẽ matu anu kariamakẽ matũ xinã betsa wai bebũkiri peparikãwẽ.