2 Coríntios 11 - Kaxinawá Bíblia (BR)

Yusĩnã betsabũ yusĩmis Paulõ danãnikiaki, na hãtxarã

¹ Haska hãtxai ẽ patapamisrã, tenetã mã ea nĩkatirumẽkaĩ. Haskakiri ẽ matu yuiai ea nĩkakãwẽ.

² Haska matukiri xinaĩ nui ẽ matu yauximisrã, ibubis ẽ yurawẽ matu yauxiama haska Deusũ matu abuai ea matu amamiski. Matu haska wakatsi ikĩ hawenabũ Cristo mã hawa heneyamashanũbũ ẽ haska matu yuiaii. Huni betsã hawẽ bake txipax tsuã pesariama huni betsa yubamis keska wakĩ eãri Cristokiri matu yusĩkinã, hawa txakabu hayama keska Cristo ẽ matu beismakatsis ikĩ ẽ matube yubakayamaki.

^3-4 Jesuskiri nũ ma haska matu yusĩbianikẽ yusĩnã betsabu bushũ matu parãkĩ haska Jesuskiri nũ matu yusĩsma Jesus betsa keska wakĩ matu yusĩaĩbu hawaira hatũ hãtxa hawẽrua abukĩ mã hatu nĩkakubaĩmiski. Ha inũ, nukubũ Deusũ Yushĩ Pepa matuki nũ ma matu dasiwabiayamakẽ yushĩ betsakiri matu yuiaibu mã hawaira atximamiski. Ha inũ, haska kakape nũ matu yuiama ibiayamakẽ kaka betsa mã hawaira txibaĩwẽ taea matuwẽ ẽ dateaii. Haska Éden bai anushũ dunũ Eva parani keska wakĩ hawara pepa Cristokiri mã ma hayabia henetã habũ txakabu txibaĩ mã hamakiri benuaibuwẽ ẽ matuwẽ dateaii.

⁵ Haska inũ, eã ẽ xinãnã, habu txipu kabiashũ hãtxa hawẽruawẽ matu yusĩkĩ ea binũkatsis ikaiburã, hawa ea binutirubumahairaki.

⁶ Habũ matu paraĩbu unãnepabu habũ hãtxa hawẽruabiakẽ ea ẽ hui kuxipamabia nukũ Epa Deus inũ nukũ Shanẽ Ibukiri tapĩnishũ matu ashũkubaĩkĩ ẽ matu uĩmamis keskawẽ habũ ea binutirumahairaki.

⁷ Matu anu kayamashũ Deusũ kakape datã akĩ matu yusĩkĩ ẽ hawara hayamabia pei inũ mabu matu yukakĩ ẽ matu txakabu wayamamẽ? Ẽ matu haska wama iyamaki.

⁸ Hamẽ matu anushũ matu yusĩkĩ matu duawanũ, iwanã, ẽ hawẽ dayatiru mae betsa anushũ ikũwaĩ betsabũ pei hatu mebĩkĩ akawatã hawẽ matu merabewai ẽ dayayunũ hatũ pei ea inãnibuki.

⁹ Hanua matu anu yusĩ hiweyui kashũ ẽ hawa hayamabia matu daketapa wakatsi ikama ẽ xinãyã nukũ betsabu Macedônia anushũ haska ẽ hayama ẽ binũ hatũ pei ea bumayamabuki. Mã ma ea haska wayamawẽ taea matu anu ana ẽ kakenã, mã ea ayama keska besti ea wakubaĩshãkãwẽ.

¹⁰ Matu merabewakatsi iki matuwẽ nuikĩ matũ pei ẽ bisma yuikĩ hãtxa txanima besti ẽ yuiai Cristõ unãyã hawara ẽ yusĩmis ẽ hawẽ keaĩ Acaia mai pakea anu maniabu tsuabũra ẽ hãtxa nematirubuma ishãkanikiki.

¹¹ Haskai haska ẽ hãtxai? Ẽ matuwẽ nuiamawẽ taeshũ ẽ yuiai? Haskamahairaki. Ẽ matuwẽ nuikĩ abuhairai Deusũ unaĩkiki.

¹² Deusũ daya ẽ amis keska habũ ea mawapaikĩ hau hawawẽra kẽyamanũbũ hatu nemakĩ haska matũ pei bikĩ ẽ matu itxakawaisma ẽ habiaska besti ikũkaĩshanaii.

¹³ Hamẽ haburã, Cristõ kuxipayakatsis ibiai yusĩnã kayabibumaki. Nuku keskakatsis ibiai peiwẽ kemui parananãmisbuki.

¹⁴ Haska inũ, Satanásãri nuku paranũ, iwanã: “Ẽ Deusũ tsumaki”, iwanã, nuku uĩmairã, haska

¹⁵ tashnishanai yuini hatuwẽ Satanás parananaĩ dayaikiki, “Nũ Deusũ tsumaburiki”, ikirã. Haskakĩ habũ nuku parãmisbu Deusũ hatũ txakabu unãtã hawẽ hatu kupishanikiki.

Paulõ yusĩbauni hawara bika teneni hawẽ keĩ hatuki txaninikiaki, na hãtxarã

¹⁶ Haska ẽ tatima keska ekiri xinãkĩ tsuabũra mã haska xinãmiskẽ haska mã habũ xinãmis ẽ tatima ibubis ẽ kẽtiru mã ana ekiri xinãyamanũbũ matu yui ẽ hawẽ keĩ hãtxai ea nĩkakãwẽ.

¹⁷ Haska nukũ Shanẽ Ibũ ea yunuamabia emebi ẽ xinãnẽ ẽ hãtxaii. Tsuara hamebi keĩ hãtxai tatima ikasmis ẽ unaĩ ẽ haskakiri keĩ hãtxai eari nĩkakãwẽ.

¹⁸ Habu keĩ ibubis hatũ unãnepawẽ binunãnãmisbũ eari haska keskariai ẽ imiskiri ẽ keĩmẽkainã.

¹⁹ Ha inũ, matu unãnepabia tatimabu hãtxai benimakĩ nemama mã hatu nĩkamiski.

²⁰ Haska inũ, habũri matu dayaru watã matu yunuabu mã hatu dayashũmiski. Matu parãbetanã, itxakawakĩ matũ hawara matu biaĩbu mã hatu inãmiski. Habũ matu tãpais akabu mã tenemiski, haskatimabiakenã.

²¹ Hakia nukurã, ha dukũ matu anu kai taeirã, nũ babu kaĩtãyamaki, dakekĩ haska yuitimabiakẽ ẽ matu yuiairã. Hakia natiã betsabũ hãtxa kuxipawẽ matu hãtxa wamis keska wakĩ eãri natiãri ẽ hãtxa tatima kuxipawẽ ẽ matu yuiaii.

²² Matu parãmisbũ habũ shenipabukiri kẽkĩ yuikĩ: “Nũ Hebreonawabu inũ, nũ Israelbu inũ, nũ Abraãonẽ bababuki”, ikĩ txanima yuiaibunã, eari ẽ habiariki.

²³ Ha inũ, habũ yuikĩ: “Nũ Cristõ tsumabuki”, iki Cristo dayashunaiburã, ẽ iriakũkainaii, Cristo dayashũkĩ hatũ daya binumahairairã. Mã eki hãtxai mã ea tatimawabianũ eã ẽ hatu binumiski. Ha inũ, Deusũ kakape ẽ yusĩayã itxapaki ea bitximisbuwẽ eã ẽ hatu binuhairaki. Ha inũ, hatikira ea kuxanibu tsuabũra tanatirubumawẽ taeshũ ẽ hatu binuhairaki. Ha inũ, ẽ mawakeãkũkainiwẽ ẽ hatu binuhairariaki. Ẽ haska tibi memis ẽ matuki txaniairã, earã, ẽ tatimamẽ? Ẽ tatimamaki.

²⁴ Deusũ kakape Cristokiri ẽ yusĩbaũmiswẽ taeshũ ea nemapaikĩ hanu ea akaibutiã judeu shanẽ ibubũ mekẽ bestitiki ea hatu kupimakĩ awa bitxi kuxatiwẽ hawẽtxaĩs 39 tibiki ea hatu pekux pekux amakubainabu ẽ mawakeãkũkaĩyamaki.

²⁵ Haska inũ, Cristokiri ẽ yusĩbaũmiswẽ taeshũ ea nemapaikĩ Romano shanẽ ibubũri dabe inũ bestitũ hi kuxatiwẽ ea hatu pekux pekux amayamaburiki. Haska inũ, ea tenãpaikĩ mãkãwẽ ea tsaka tsaka akĩ ea xinã nemanibuki. Ha inũ, Cristokiri ẽ yusĩkubaunaya niwe shashu dabe inũ besti habu tibi txakabuakeakeaya ẽ hasakeaniki. Ha shashu betsa anua mexu bestitxai inũ shaba bestitxai iã batapa anu shashuuma nunai tsuã ea neshetima hi tuashki mepia ẽ nunukũkauniki.

²⁶ Haska inũ, Jesusũ kakapekiri yusĩ nũ kakũkaunai haska tibi mese ẽ binukubaĩmis matu ana yuinũ nĩkakãwẽ. Ẽ hene pukei kaya hawaira bai mata bekĩ ea shashu narabea inũ maĩ pukei nua maeshbaĩ hasai ẽ mawakeãkũkainiki. Ha inũ, maĩ ẽ kaya yumetsubũri ea mesewatã ẽ hamapai ea bianibuki. Ha inũ, enabu inũ enabumã ea itxakawakĩ ea date date akubaĩyamabuki. Ha inũ, mae ewapa tibi anushũ inũ hanu hiweabumanushũ hunibũ ea itxakawanũbũ yuinaka pianãbũ ea pikeãyamaki. Ha inũ, iãnẽwanu niwe shashuwẽ ẽ kaya niwẽwã mese bekĩ ea datekubaĩyamaki. Ha inũ, nukubetã ikũwaĩbu habũ ikũwãtxakaibũ ea bikawakĩ ekiri txanitxakubaĩyamabuki.

²⁷ Ha inũ, ẽ dayatxakayamakũkaĩmiski, bika betsa betsapa tenebiakubainirã. Mexu betsa tukama ẽ usha tenemiski. Ha inũ, buni tenea inũ ũpash tenea piama ẽ ikũkaĩmiski. Ha inũ, matsi tari hayama hawa dakukuti hayamari ẽ matsi tenekubaĩmiski.

²⁸ Haska tibi ena tenebiakĩ ha xinãma ẽ betsabu mae tibi anushũ mã ikũwaĩbuwẽ ẽ matuwẽ nuihairakũkaĩmiski, haska tibi binuirã.

²⁹ Yura betsã bika tenei babuaya hawẽ nuikĩ ẽ habetã teneai keskamiski. Ha inũ, yura betsã ikũwaĩbu babu wakĩ txakabuwamaya tsuãra hatu txakabuwamaiwẽ ẽ hatuki sinatahairamiski.

³⁰ Ẽ hawa hayama emebi ẽ haska kẽtirumabia haska ẽ babumiswẽ taea ẽ keaiĩ.

³¹ Ẽ haska txani keãyã nukũ Shanẽ Ibu Jesus Cristõ Epa Deusũ ẽ hãtxa nĩkakĩ txanima hãtxa besti ẽ yuiai unaĩkiki, ha ikibi ini yurabũ kẽwãkubaĩshanaibunã.

³² Cristo ẽ ikũwãkĩ taewabirãxina ea haska wanibu ana matu yuinũ nĩkakãwẽ. Shanẽ ibuhaira Aretasĩ Damasco mae ewapa yunumistũ hawẽ soldadobu ea atximanũ, iwanã, ha mae hawẽ mixki kene sheshekaiã hanu kaĩbaĩti tibi anushũ ea hatu atximakatsi iniki.

³³ Haska hatu wamabiaya ikũwaĩbu betsabu ẽ haibuaibũ hanushũ uĩti kene shui anu kukiki ea nanetã dispiwẽ kukiki dũtãtã ea hanu buteabu ea atxipanãbũ ẽ pashakainiki.