2 Coríntios 10 - Kaxinawá Bíblia (BR)

Paulo yuãmisbu shabakabi hatu unãmanikiaki, na hãtxarã

^1-2 Haska bestibu mã ekiri hãtxamis ẽ Paulõ ẽ matu yuiai ea nĩkairakãwẽ. Matu anushũ betsabũ yuikĩ: “Paulo nukube hiwea hãtxahairaisma yunuama unãshubira nuku hãtxa wabiamis txaikeshũ nuku keneshũkĩ hãtxa kuxipawẽ yunukĩ nuku ha amiski”, iwanã, mã ea yuãbiamisbũ haska duapakĩ ẽ xinãmis matu yuinũ nĩkairakãwẽ. Haska mã yuibiaya hãtxa kuxipawẽ ẽ matu kũyã atirubia haska duapakĩ unãshubira Cristõ yurabu yusĩkubaini keska wakĩ hãtxa shãkamawẽ yuikĩ matu kũyã akatsi ikama matu anu ẽ ana kakẽ habũ ea shenĩkamisbu ẽ hatube hãtxakatsi ikamaki. Hatũ xinã betsa wamakĩ hau ana hamakiri xinãtxakayamanũbũ hatu meshtãmakãwẽ.

³ Hanushũ tsuabũra nukũ Shanẽ Ibu txibãkatsi ikabumã yura betsabu parãkĩ hawara ibubis akatsi ikai akĩ yura betsabu binunũ, iwanã, hatube sinataibube detenamei hatũ mabu kuxipa tibiwẽ haki txiti itã detenamei hawẽ kuxipai hiwemisbuki. Hakia habu keskama

⁴ nuku ikirã, hawara Deusũ nuku amakatsis ikai akĩ Deus inũ Cristo danaĩbu ha txakabuki txiti ika hawẽ kuxipaibu binumai Deusũ kuxipawẽ hatu ha akĩ nũ hatu nuitapawatiruki, detenameai keskakinã.

⁵ Haska inũ, haska Deus danaĩ unãnepabũ xinãmis hawauma wakĩ Deus nũ hatu unãmakatsis ikaii, hatũ txakabu beshteketã xinã betsatã hau Cristo txibanũbunã.

⁶ Cristokiri nũ matu yusĩbia mã nuku txibãmakenã, nũ matu kupikatsi ikamaki. Menã hawaira nuku nĩkatã txibãkĩ pewarikãwẽ. Mã ma pewakẽ tsuabura huĩti kuxibu nũ kupishanaii.

⁷ Hatiritũ xinã txakakĩ yuikĩ: “Cristoki dasia nũ hawenabuwẽ taea ẽ unãhairaii”, mã ikaibunã, nukurã, nũ habias Cristoki dasia nũ hawenaburiki, uĩkĩ hau xinãnũbuwẽ, shabakabi nũ ikũwaĩnã.

⁸ Ẽ matuki hawẽtxaĩs haska Cristõ hawẽ kuxipa ea yununikiri hawa dakeama ẽ txanimis hawẽ taeshũ matu beshtekĩ txĩtũmakatsi ikama hakia hawẽ merabewakĩ nukũ Shanẽ Ibũ kuxipawẽ ikũwãmakĩ ẽ matu kuxipa wakatsis ikũkainaii.

⁹ Na kene ẽ matu bumaiwenã, hawẽ taeshũ matu datẽnũ, iwanã, ẽ matu bumamaki.

¹⁰ Hamẽ bestibũ ẽ kene uĩtxakakĩ yuikĩ: “Hãtxa bika inũ kuxipa keneshũ nuku yunubiai Paulo nuku anu hiwea unãnepa keskama huni babu hawẽ hãtxa hameaĩ tsuã kẽwãtirumaki”, mã imiski.

¹¹ Haska hari bestibu yui mã hãtxamisrã, nũ txaikeshũ matukiri kenewẽ nũ matu yunumis keska wakĩ kashũ matu bebũshũri habiaska mã imis hãtxa kuxipawẽ nũ matu shabakabi yui kashanaii.

Yusĩnã betsa kẽmisbu Paulõ hatu txitenikiaki, na hãtxarã

¹² Haska nũ yusĩmis yusĩnã betsabũ hatũ yusĩawẽ matu nuku danãmakĩ putamakatsi ikanikiki, haska hatũmebi yusĩtxakai kanei ẽhẽ iki atimapakinã. Ha binunãnaĩ keaĩbu keska nũ haska hayamaki.

¹³ Hanira kashũ hawẽ daya nũ ashunũ hatishũ besti Deusũ tanashũ nuku yununi anu besti dayai nũ kẽtiruki. Hakia hanu nuku yunuama anu ibubis dayama haskawẽ taea ha binumai nukubu nũ keãmaki. Deusunã, haska tibi hanu kesua anu nũ kanũ nuku henea nũ kamiski. Haskawẽ taea matu Corinto anuabu mã ikũwãriabuma anu nuku yununiki.

¹⁴ Haskawẽ taea nuku dukũ matu anu Deusũ nuku yunua kashũ nukũ dukũ Deusũ kakape Cristokiri datã akĩ nũ matu yusĩ taewaniki. Hamẽ hari Deusũ nuku yunuama inirã, nukurã, haskarara nũ matube ikeanaii.

¹⁵ Nukuburã, huni betsabu ma dayani anu hikitã nũ kẽkatsi ikamaki, nukũ dayamawẽ taearã. Hakia nuku ikirã, matube dayakĩ nũ taewaniwẽ taea matũ mae anushũ mã nuku merabewaya ana itxapabu matu ikũwãmakĩ nũ ewawakatsi ikai nũ matu manaii.

¹⁶ Haskawẽ taea nuku kairã, mã nuku merabewaya Jesuskiri kakape bui mã Corinto anuabu bestima habu txai hiweabu anu tsuã hatu yusĩriama anu yusĩ nũ dayakatsis ikaii. Nũ haska dayakũkainairã, yusĩnã betsã yusĩawẽ nũ kẽkatsi ikamaki.

¹⁷ Haskakẽ tsuara kẽkinã, hau nukũ Shanẽ Ibu besti kẽwãkubainũbũwẽ.

¹⁸ Hanua ibubis hawẽ xinãnẽ besti hamẽmẽ keaĩnã, Deusũ abuama hume humepamiski. Hakia tsuara ha nukũ Shanẽ Ibukiri pe hãtxairã, hakiri pe xinãkĩ kẽwãmiski.