1 Timóteo 6 - Kaxinawá Bíblia (BR)

¹ Hamẽ betsarã, tsuara huni betsã escravo dayarutunã, Jesus Cristo ikũwãkĩ hau hatũ tsuma duawakĩ nĩkai hau hatukiri pe xinãkubainũbũwẽ, hatu heneamarã. Hatu haska uĩmamakẽ Jesus Cristokiri nũ hatu yusĩaĩ inũ Deusũ kena yura betsabũ yuãtirubuki, “Hanis hatu yusĩkaniraka”, nuku wamakinã.

² Ha inũ, hatũ tsumapã Jesus Cristo ikũwãyã habetã ikũwãriairã, hawẽ betsa keskai hau haki mesekubainũbũwẽ. Uatiã imisbu keskama hau dayai peshũkĩ hatu binumakubainũbũwẽ, hatũ tsumapã hatu dayashũbiamisbu habetã ikũwaĩnã, betsa nuikipa keskaya hau haki txiti ikubainũbũwẽ. Na haska tibi yusĩkĩ hatu tapĩmakubaĩwẽ.

Hawara nũ hayawẽ besti benimakũkaĩtikiaki, na hãtxarã

³ Tsuãra hatu yusĩkatsis ikĩ hatũ xinã betsahaira itimaskakiri haska hatu yusĩanã, nukũ Shanẽ Ibu Jesus Cristõ nuku yusĩni keskama inũ haska hakiri xinãkĩ nũ hatu yusĩmis keskama hatũ xinãnẽ besti kẽkĩ yusĩkatsis ikanikiki.

⁴ Hawẽ taea besti keĩ unãmabia ha iki haskakiri xinaĩ hamebi hatũ xinã hatu atimapa wamamisbuki. Eska tibi hatũ xinã meranua tashnirã, hawara betsana ha hawena haska hayama uĩ haskai ha besti haska hayamẽ iki sinatairã, yuãnanaĩ betsabube danãnanaĩnã, abunameama sheti ikama hatuki ha ikirã,

⁵ yura betsa betsapabube hatũ yusĩa hãtxa kayabi unãbumabe kemanamei heneisma inũ haska ikũwãkĩ yusĩaĩwẽ taeshũ pei itxapa bitikiri xinãkanikiki. Hatu uĩrakubaĩwẽ.

⁶ Haskakiri nukubũ nũ hariri xinãkĩ ikũwaĩburã, txanima kayabiki. Deusũ hawẽ pepa tibi mabu keyumis keskama nuku inaĩ inũ nuku inãshanaiwẽ taea nũ benimahairakũkainaii. Haskakẽ natiã haska nũ haya bestiwẽ benimayunãkãwẽ.

⁷ Na mai anu tashnirã, nũ hawauma kaĩniki. Hanua mawakaĩkĩ nũ hawa buama iriashanaii.

⁸ Haskawẽ taea Deus nũ ikũwaĩburã, tari inũ piti inũ hanu ushati haya ha besti nũ hayarã, haskawẽ besti benimakubainãkãwẽ.

⁹ Hakia tsuabura mabu inũ pei bestiwẽ kemuaiburã, habũ hawa unãmawẽ taearã, birũ tibi keska hatũ kemu pae tibiwẽ hatu atxi keyua haska tibi tashniaiwẽ taea hawa xinãma: “Ẽ peaii”, i bestikĩ hamapai txakabu hawẽrua besti abui hawẽ hiwe txakai pikukũkaini hawẽ hiwea benui hanu kupiaitiã hawa pepa biama benushãkanikiki.

¹⁰ Pei inũ maburã, hatũ kemuti pae txakabũ hatu atxia hanu hayaki. Haska mabu inũ peiwẽ kemui Jesus Cristo ikũwaĩbu bestibu has besti dayanũ ika haska abuai hatũ xinã pe henetã ana Jesus Cristo ikũwaĩ xinãma ma hakimawẽ taea hanua hakiri hawẽ txakabu betsa betsapa tashnibirãkĩ hatu nuitapawamiski.

Jesus Cristo txibãkĩ hau pe besti yusĩkubainũ Paulõ Timóteo yununikiaki, na hãtxarã

¹¹ Hakia miarã, Deusũ ma mia hawena wakĩ katuniwẽ taeshũ hawara txakabu betsa betsapa betxitã danaĩ ana hari kayamawe. Mĩ pe dayai hiwekatsi ikairã, mĩ daya bikabiakẽ Deusũ mia unaĩwẽ taea ikũwaĩ nui abunamei kuxipai huĩti kuxiama babutã hatu uĩmai hatube hiwekũkaĩwẽ.

¹² Haska mĩ hiwea ikibi ika bibiatã mĩ benutiruma Deusũ mia inãkatsi mia kenakĩ katuniwẽ taeshũ haska mĩ ikũwaĩ mĩ ma itxabu anua shabakabi txanini hatu unãmakubaĩwẽ, Jesus Cristo txibaĩ txĩtuãma dasibi Deusũ mia yunumis dateama xinãkĩ akubaĩkinã.

¹³ Deusũ dasibi damiwakĩ hiwea hatu inãkĩ keyumis inũ nukũ Shanẽ Ibu Jesus Cristõ haska shabakabi huni dateama Romano shanẽ ibu Pôncio Pilatoski txanikĩ ma yuinitũ natiã nuku uĩaĩbũ mia merabewakĩ ẽ mia yunuaii.

¹⁴ Na haska tibi ẽ mia yunuai haska txibãkĩ mĩ hiwea pe mekeshũ kaneama mikiri pe hatu uĩmairakubaĩwẽ, hanu nukũ Shanẽ Ibu Jesus Cristo kuxipai huaitiã hau mikiri hawa txakabu tsuã yuiyamashanunã.

¹⁵ Hanushũ Deus dasibi binu keyuatũ hatũ besti pepa meke keyua hatũ yununika shanẽ ibubu dasibi inũ shanẽ ibu beshmasbu dasibiri binu keyuatũ hanu nukũ Shanẽ Ibu ana nuku anu tashnimakatsis ikĩ ma hanu yubakani meneaya nitxĩshanikiki.

¹⁶ Ha ibubis mawatiruma inũ, ha besti hiwemis shaba txashakapa hiweaki tsua hari haki kematirumarã, tsuã uĩtiruma inũ tsuã uĩnakama hiweaki. Haskakẽ hawẽ kuxipa pae nukaisma duawakĩ hau kẽwãpakenũbũwẽ, niti ikamarã. Haskakirã.

¹⁷ Tsuãra ikũwaĩ hawẽ pei inũ hawẽ mabu itxapa hayabũ xinaĩ: “Natiã ẽ mabu ẽ hayawẽ ẽ hawẽ hiwei peaki”, ikĩ hau ana haskakiri xinaĩ hawẽ kẽyamanũbũ hatu yuiwe. Ha haskakiri xinãmisburã, hatũ mabu txapumiswẽ hatu mestẽwãtã hiwematirumaki. Haskakẽ uatiã imisbu haska xinãma hakia natianã, Deusũ nuku benimawakĩ hatũ hamapai betsa betsapa yauxiama nuku inãkubaĩmis haska besti bi hau hiwekubainũbũwẽ.

¹⁸ Haska inũ, hatũ hamapai mabu haya betsaburi pashkashũti xinãkĩ haska Deusũ abuai aki hau pepakubainũbũ hatu yunuriawe.

¹⁹ Haska wakubaĩmiswẽ taeshũ Deus hatuwẽ benimakĩ hatũ duapa pepawẽ bari hawẽ heneaitiã Deusũ hatu manakushanai txanima hiwekuĩa kayabi bi haki nukunũbarikanikiki.

^20-21 Timóteoõ, mĩ xinã mekeirawe, haska Jesus Cristoki mĩ txiti ikawẽ taearã. Haskai betsabu tatimai unãnepanũ ika kemanamei ana Jesus Cristo ikũwãma hatũ xinã meribi watã ma txĩtuãbuki. Haskakẽ mianã, ha hãtxatxakaiburã, hatũ yusĩa txakabuwẽ parananaĩ: “Nukũ hãtxa unãnepati kayabiki”, ikĩ yusĩa pepa beshtenũ ikaibu hamẽ hatu nĩkayamakubaĩwẽ. Nukũ Shanẽ Ibũ hau hatube mia duawakubainũwẽ. Hatiski, ẽ hãtxarã. Paulo