1 Timóteo 5 - Kaxinawá Bíblia (BR)

Ikũwaĩbu betsa betsapakiri merabewakĩ xinãtikiaki, na hãtxarã

¹ Kaneaibu pewakĩ hatu ha ayamakubaĩwẽ. Hakia anibũ kaneaya mĩ epa keska wakĩ hatu merabewakĩ hãtxa kuxipawẽ hatu bekũyã akama hatu pewẽ xinãmakubaĩwẽ. Berunã inũ huni ewã kaneaya mĩ betsabu keska wakĩ merabewakĩ hatu pewakubaĩwẽ.

² Yushabũ kaneaya mĩ ewa keska wakĩ hatu merabewakĩ pewakubaĩwẽ. Txipax inũ aĩbu ewãri kaneaya mĩ puibu keska wakĩ merabewakĩ hatu pewakubaĩwẽ, hatuwẽ kemuamarã. Haska wakĩ dasibibu hatu merabewakubaĩwẽ.

³ Aĩbu ewa beneyabiani ana bene hayabumã Jesus Cristo ikũwaĩbu txanima nuitapa kayabiaya hawenabu hayamakẽ Jesus Cristonabũ duawakĩ hau hatu merabewakubainũbũwẽ.

⁴ Hakia beneyabiani nuitapaibu hatũ bakebu inũ hatũ bababu hayarã, habũ dukũ hau hatu merabewakĩ hawẽ tapĩkubainũbũwẽ, hatunabu kayabibunã. Haska hatunabu merabewakĩ hatuwẽ nuikinã, Deus benimawakĩ xinã txãkãwãtirubuki.

⁵ Aĩbu ewa beneyabianibũ Jesus Cristo ikũwaĩ hawenabu hayama Deusũ hau hatu merabewanũ haska manakakĩ bariri inũ mexu merã Deus kẽwãkĩ habe hãtxakĩ hawẽ piti inũ hawẽ mabukiri yukamisbuki.

⁶ Hakia aĩbu ewa beneyabiani betsabũ Deusũ hãtxa xinãma patapakĩ hawara akatsi ikai amisburã, hiwebia hawẽ yushĩ ma mawaki. Haskawẽ taea Deus hatuki sinataikiki.

⁷ Haskakẽ hau ikũwãbumã hatukiri txakabu yuiyamanũbũ ikũwaĩbu yusĩkĩ hau hatunabu merabewakubainũbũ hatu yunukubaĩwẽ, hatu xinãmakinã.

⁸ Haskakẽ tsuabũra hawenabuskiri xinãkĩ hatuwẽ nuikĩ merabewama Jesus Cristo ikũwãbiai danãkanikiki. Hatunabuwẽ nuikĩ merabewamawẽ taearã, habũ ikũwãbumã xinã betsa waisma keska habũ ikũwãbiai xinã hayama nuima txakabuki.

⁹ Habũ ikũwaĩ yushabu 60 bariya unuri kai beneyatã betsawẽ kemukĩ heneama ipauni enauma ikũwaĩbũ merabewatirurã, eska atiki, hatu tanakĩnã.

¹⁰ Hatũ bakebu ma pe yumewani inũ, bai beaibu hatũ hiwetã itã Jesus Cristonabu betsabu duawakĩ beya wakĩ hatũ tae hutxupaunibu natiã hari nuitapaya merabewakĩ pe besti dayakũkainiwẽ taeshũ Jesus Cristonabũ ha pepabu besti hatukiri xinãkĩ hau merabewakubainũbũwẽ.

¹¹ Haska inũ, aĩbuaibu beneyabia hawẽ benẽ heneima kasmai mawaimakẽ yushaburiamarã, hau ikũwaĩbũ haska xarabu hau hatu tanatã merabewayamakubainũbũwẽ, Jesus Cristo dayashũkatsi yubakabiaima hakimatã huniwẽ kemui ana beneyakatsis itirubukirã.

¹² Hanua ana beneyama ikũwaĩbu merabewai hatube dayakatsi yubakabiaima ibubis xinã betsatã ha yubakaima ana xinãma kanei txakabuaya Deus hatuki sinatatiruki.

¹³ Haska inũ, yushaburiama hatũ piti inũ hatũ mabu inãkĩ mã hatu merabewaiwẽ taea haska besti bi ana dayakatsi ikama hiwe tibi anu besti hikikũkauni txikix pikutirubuki. Ha txikix pikuimarã, haska bestiama hiwe betsa tibi anu tsaushũ hatubetã txani yui inũ betsabuki txanitxakakĩ haska txani yui beyatirubuki, haskai txakabui pikuirã.

¹⁴ Ikũwãbumã hau nukuki kasheyamanũbũ aĩbu beneyabiaima ma hawẽ bene mawa kasmai henebainima yushaburiabumarã, hau ana beneyakubainũbũwẽ. Haskatã bake bitã hatũ hiwe meranua pe dayakĩ hau hatu duawakubainũbũwẽ.

¹⁵ Uĩwẽ. Hatiri aĩbu yushaburiama beneyabiani ana beneumakẽ hatu merabewabiabu ana Jesus Cristo txibãkatsi ikama Satanásã haska abuai txibaĩbu uĩkĩ eska ẽ mia yunuaii.

¹⁶ Hanushũ yushabu beneuma nuitapai enayakenã, hau hawenabũ merabewakubainũbũwẽ, ikũwaĩbukiri xinãkĩ hatu bika wamamarã. Hakia ikũwaĩbu itxashũ yushabu betsabu enauma besti merabewatirubuki, hatũ piti inũ hatũ mabu hawa hayamakẽ hatukiri xinãkinã.

^17-18 Mekenikabukiri ana mia yuinũ nĩkawe. Moisés Deusũ hãtxa kenekĩ: “Mĩ hemaĩtĩ anushũ mĩ ina awã hawẽ taewẽ mĩ shekiwã pema pema akĩ mia shemeshunaya dispiwẽ sheneshyamakãwẽ, hau dabukũ pinunã”, iwanã, yununiki. Haska yuikinã: “Dayakapabu hau hatu pakakubainũbũwẽ”, ani keska wakĩ mekenikabu tibi habũ matu yusĩaĩburã, haratura bestitũ Deusũ hãtxa matu yusĩ henekatsi ikama matu yusĩkĩ matu merabewakubainaibuwẽ taeshũ matũri ha matũ mekenika duawakĩ peiwẽ kasmai hawarawẽ merabewakĩ hawẽ hawara inãkubaĩkãwẽ.

¹⁹ Haska inũ, mekenikatũ txakabu wakĩ kaneaikiri huni bestitxai miki txanikĩ hakiri mia yuiai nĩkayamayuwe. Hakia mekenikakiri habias txakabukiri dabe kasmai dabe inũ bestitũ mia yuiaibu: “Txanimẽkaĩ? Txanimaraka?” ikĩ unãti watiki.

²⁰ Hanushũ txakabu wakubainaibu pewanũ itã Deuski hatu datemakĩ dasibiburi hau daterianũbũ itxashũ nĩkaibũ pewakĩ hatu mesewakĩ shabakabi nemakubaĩwẽ.

²¹ Natianã, Deus inũ nukũ Shanẽ Ibu Jesus Cristo inũ hawẽ nai tsuma katuabũ habũ ea nĩkaibũ ẽ mia yunu kayabiai ea nĩkawe. Mĩ haibuaibu kasmai yura betsabu tsuãra hamapai mekĩ txakabu waxinamẽkaĩ, txakabu wamamẽkaĩ, bebũkiri txakabu xinãma dasibibu habias ma miki txaniaibũ besti unãti watã hatu pe wakubaĩwẽ.

²² Ha dikabi hau tsuãra Deusũ daya ashunũ katukatsis ikinã, hĩ hĩ, iwanã, uĩriama mamepishũ hawaira Deus yukashũyamawe. Hakia hawẽ txakabu unãriama kanekĩ mĩ hawaira katukẽ: “Hawẽ txakaburã, unãma ikimẽkaĩ?”, iwanã, mikiri xinãtirubuki. Haska huni betsã txakabu mĩ pewashũtirumarã, mimebi mekekĩ uĩrakubaĩwẽ.

²³ Mĩ hatu babu mĩ isĩkũkaĩmiswẽ taeshũ ana ũpash besti akama uva vinho hushkeixtatã akubaĩwẽ, bari tibirã.

²⁴ Haska inũ, hatiri ikũwãbiakĩ yurabũ berubi txakabu wamisbuki. Betsabũ hune txakabu wariamisbuki. Haskaibu hatu uĩbiamisbukẽ miã hawa unãma hawaira hatu katukĩ mamepiyamakubaĩwẽ, txipu hatũ txakabu tashnitirukirã.

²⁵ Habiaskari wakĩ merabenãkĩ pepawaibu bebũkiri unãmisbuki. Hakia betsabũ txakabuwakĩ hune abiaya atimas tapĩriamisbuki.